#العجوز_والقبيحة
- اي خالة وبعدين
- بعدين تزوج الثانية بس طبعا بعد عركة شكبرها شكدها لان الخاتون تريد عرس جانت وهي متزوجة قبل
- يعني شنو مطلقة هي ؟
- اي و اللي افتهمتة هي حابة ابني من جانت متزوجة وتطلكت علمودة ولهذا السبب هو جان كاتل نفسة عليها بعد صدك جذب مندري
- زين وجمانة شنو صار بيها
- والله يمة ما ادري كالو سافرت لان حالتها النفسية صعبة خاصة بعدما عرفت بزواج صادق وما عندي عين اتصل بيها او احجي وياها
- شنو ذنبج انت المهم خالة وبعدين
- وبعدين انكلب حال البيت من جنة لنار وصادق اتخبل علينا وسوة مرتة هي وبس من نحجي وياه ميسمعلنا و اذا حجينا ويا مرتة هاي معناها قامت القيامة
- زين شنو هي حلوة يعني وهيج تولع بيها
- والله يمة هي خلقة الله ما يصير احجي عليها بس استغفر وجهها ما بي نور محمد اني اكلج هي صاحبة جسم وتهتم بروحها بس لا خلقة ولا اخلاق
ابو صادق من القهر جانت تهيج علي القرحة وتدهورت صحتة كلش جنا اذا ندزة على دوة او وصفة طبيب هي تتخبل من يمها وتكلة عدهم غير ولد مو بس انت ابنهم ويكربون عليك
- الله اكبر
- اسد ميقبل على حجيها و يعاركها دائما هي من تشوف اسد عصبي تسكت جانت تخاف منة بس همين ما سلم منها وخلت الاخوة يتعاركون
- شون
- كالتلة اخوك يباوعلي بنظرات ويتجاوز علية خلتة يتضارب ويا اخو وطبعا ورة كل عركة ومشكلة لازم يراضيها بقطعة ذهب ترسها ترس بالذهب
وهي مثل المشايفة تلبس كل شي بحيث من تمشي عبارة عن ذهب وماشي
جنت استحي واخجل اخذها وياية لان ياهو اليشوفها يعاتبني شون رضيت بيها مرة لابني وعفنة ذيج الوردة بس اني شبيدي غير قسمتة هيج
- اسمحيلي خالة هاي مو قسمة هاي قلة عقل
- مو شلون مجان
هاي من تشوفنا متجمعين وكاعدين احسبي وراها مشكلة تكلة يحجون علية ويكلولي انت وين ومرتة القديمة وين واحنا حتى اسمها مجايبي بالطاري
- شكد خبيثة هي شسمها صدك
- كوثر
- اي خالة وبعدين
- الحجي دخل مستشفى قبل لا يتوفى و جان اسد وصديقة هذا رابي ويا الولد واحبة مثل ابني وجوارين عشرة عمر هو واهلة يتناوبون ع البيتوتة
- ليش وصادق وين
- ما تخلي يجي ويبات تكلة ابقى يمي بحجة اخاف لوحدي وتخاف مني عود اني اسمعها حجي واضوجها فيروح هيج ساعة ويرجع صارت عندة قساوة مو طبيعية كامت تتعمد تطلعة عود دتغيرلة جو وهو ماشي وراها على هواها
- زين عمو توفى هسة بهاي الفترة
- اي توفى وراح لدار حقة قبل سنتين ونص تقرببا
دخلنا بدوامة الورث والحصص ماكو بعدها مطالعة الاربعين وصادق يريد قسام شرعي ويريد نقسم الورث والبيت
بس المرحوم جان كاتب البيت بأسمي وموصي المحامي انه يكون برة الورث ومالة علاقة بباقي املاكة
صادق من سمع بهالحجي تخبل خو مرتة كل يوم مشكلة واسمعها تكلة هاي العجوز جذابة ومتريد تنطيك حقك وحتاكل كل شي عليك وتنطي لاسد واحنا جاينا طفل
- يعني صارت حامل
- اي حبلت وجابت ولد
- خالة تعبتي انت باجر نكمل سوالف حكوم اسوي عشا علمود دواج
- ضوجتج مو
- لا يوم بالعكس
بست راسها
اني اريدج ترتاحين وتاخذين دواج بموعدة
وبصراحة جعت هههه
- ههههه يلة كومي نسوي سوة لعد
- لا يوم ارتاحي انت واني اكمل كل شي
ابقي كاعدة هنا
كمت طلعت الغراض ودا اسوي بالعشا وصافنة بهالابن ليش هيج علمود شنو ديسوي كل هذا معقول طمع الانسان يخلي ينسى اهلة وفضلهم وتعبهم علي افكر واجر حسرات
تالي خالة الظاهر حست علية
- يمة لا تقهرين روحج اني صوجي حجيتلج
- خالة صعبة يعني تعرفين من ودي املخة واكلة بسنوني هي الام تتعوض لو الاب احد بعد يملي مكانة والله صعبة
- شسوي بعد هذا امر الله والصار واني خايفة علي لا يجي يوم ويندم على كل السواه بينا وبجمانة وبأخو
- هسة مو اسد اخوه وياه ليش مو مثلة
- يا يمة يا بلسم الله خلق أخين ما خلق طبعين
- اي صحيح الله كريم هي تصفى
- ونعم بالله
نصي النار شوية حتى لا ينحرك
- هههههههه صار
- هههه شو تضحكين
- ذكرتيني بأمي جانت تعاني من عندي لان كل شي اسوي استعمل نار عالية اتلاحك علي ويطلع زين بس امي تظل بقلق تخاف من النار العالية
- امج عايشة ؟
- امي ؛
ما ادري والله
