No ta tur loke ta Bria ta ORO

Part #6

Tur kos ta parse perfekto. Sky no tin nada di keha.

Un temporada si tabata duru pe. Aiyden a bai afó pa largu tempu i e tabata sintié su so. Tur ora nan ta papia na videochat si. Distansia no ta nifiká nada pa nan hamber seksual. Via potrèt i video mes nan ta manda potrèt sunú etc pa otro.

Sky ta yega den su kantor un di e biaha nan ku Aiyden a bai afó pa business largu. For di ora e habri e porta un holó dushi ku ta bini di e bukèt di flor grandi ku tin buta riba su mesa ta dal e.

Kontentu e ta kore bai wak e karchi. E ta kue su selular den man kla pa e bèl Aiyden pa yam'é danki. Paso ta su hasi pa malkriá asina aki. Pero e a pensa..mihó mi lesa ki ko'i kèns e a skirbi manera semper promé e bèl e. Pero ta super lief di su parti.

E ta lesa e karchi : Dushi ta duel mi hopi ku tin distansia entre nos e último tempu nan aki. Pero no laga esaki parse manera mi no kier bo òf deseábu. Mi tin mes òf mi ta durf di bisa mas deseo ku for di dia nos a konosé otro.

Awwww Sky ta pensa...Aiyden e ta eght lief. E ta sigui lesa.

Lo mi kier bo aworakí i pa semper sin importá ki pasa..mi rikesa ta abo.

Ku un kara kontentu e ta sigui lesa kla pa bèl Aiyden.

Felis aniversario. Danki pa ta un bon mama i kasa. Hopi Amor Victor.

Sky ta laga su telefon kai. I kuminsá yora sin por kontrolá su mes. Awe ta nan aniversario di kasamentu i e a lubidá por kompleto. Su mente tabata mas den un aventura na lugá di su mes famia. Hinter e feeling di angustia i kulpa ta kai riba dje manera un piedra gigantesko ku e no por karga.

Sin por konsolá su mes e ta keda yora pa loke ta parse pa semper. E ta sinti kon su stoma ta kuminsá bira i ta disidí di bai kas. E no ke mira nada i niun hende aworakí. E kier djis bai kas subi kama drumi i yora. E kier e lágrima nan laba tur su angustia bai kuné. E lo kier e lágrima inundá tur e sensashon di mal mama i mal kasa ku e tin.

E ta yega kas e ta yora atrobe den outo promé e bai paden. E ta logra haña un forsa i drenta. Asina e habri porta di kas un holó dushi di kuminda ta yam'é bon bini. E ta rekonosé mes ora ku ta su kuminda faborito. Pòkchòp den fòrnu ku batata machiká i hopi sous. E ta sigui wak rònt i mira Victor ta kushinando.

Victor ta bira wak e "heeey dushiii mi no ta sa ku bo bini kas trempan awe..mi ta kier a sorprendé bu. E muchanan ta keda serka mamai awe. I ma Bisa Hannah bai beach i spa ku su amiganan. E tuma e dia liber. Kemen awe bo ta dimi dimi"

E palabranan aki ta pasa manera un kuchú den e kurason di Sky. Tur muestra di amor aktualmente e no meresé. E mester wòrdu bati i mata. E mester wòrdu mara kantu di un muraya i bati ku piedra. Su kasa ta hasi todo por todo pa nan union i e di ayabanda ta buskando un otro hòmber pa subi. I riba nan dia di aniversario. Tur e pensamentu nan aki ta drei den e kabes di Sky.

Sky bringando pa aktua normal ta bisa "danki, mi ta bai dal un baño i mi ta bini"

"wèl ta nèt. E no ta kla ainda..falta par di minüt. Pa ora bo kaba di baña e lo ta kla."

Sky ta kana duru drenta baño. Apénas e a drenta i e lágrimanan ta kore riba su kara atrobe. E no tin idea kon e mester deal ku e reto aki. E a yora te pèrdè rosea. E no sa kon i ku kua kara e lo enfrentá Victor. Pero e no kier defroude èkstra dor di no apresiá tur loke e a hasi i prepará awe pa kome. Sky ta wak su mes den spil i purba hisa su animo i bai pafó.

Ora e sali e ta mira ku e mesa ta drecha kaba i e kuminda ta buta riba mesa.

E ta kai sinta banda di Victor i keda wak abou. Victor ta puntr'é? "Kiko e no ta dushi? Bo no tin hamber?"