حب ما بعد الاربعين بقلم ام احمد الناشربارق العراقي

الجزء 9و10

الناشربارق العراقي
حب مابعد الاربعين
الجزء التاسع
بقلم ام احمد
واجه يوم الجمعة ومن صارت الثامنة اندك الباب جنت بعدني نايم گمت اريد اشوف منو جانت ام علي بالباب
صباح الخير
صباح الخير
هاي بعدك نايم اتصورت تكعد من وكت ادخلي ام علي هسه اصحصح ودخلت ومن وصلت لباب المطبخ وكفت
شبيج ام علي ادخلي
لا ميصير ادخل خلي انظف الكراج والحديقه ومن تروح للجامع اني انظف البيت
زين ليش متنظفين الجوه وبعدين تطلعين عل بره ظلت ساكته
شوفي ام علي ترى اني ماعندي شي ومراح اسوي شي الج
لا مو هيج ابومها انت افتهمتها غلط
شلون
يعني ادخل البيت وانت وحدك واگفه شويه
لحظه اني مو وحدي
چا منو وياك
زوجتي
شنو
ام علي اني هم اعرف بااصول شلون ادخلج للبيت وبس اني وياج
ظلت ام علي مرتبكه ومصدومه وگالت اني اروح ابو مها
اوگفي شنو شبيج
ماكو شي اني اطلع
وخلت وطلعت واني مافهمت شبيها ليش تفاجأت من گتله زوجتي شنو متعرف اني مزوج بس هيه شافت مها بس لاعباله اني مطلق او ارمل ومن عرفت لا انصدمت ظليت افكر وسويت الي اكل واكلت وگلت اروح عليها وافتهم منها بس هيه ليش هيج انقهرت بس لا عجبتها اكيد عجبتها
ليش مااعقد عليها يم شيخ بس وتكون مرتي بالسر الى ان اكدر افتح اله بيت ظليت اتصفن بعدين گلت لا منذر ليش تزوجها بالسر هاي مسكينه وجار الزمن عليها تگوم انت هم تظلمها لو تزوجها گدام العالم لو لا.
وللعصر اخذت مها ورحت عليهم وطلع ابنها ودخلنا البيت اجت والدتها وسلمت عليه وتشكرت مني عل مساعده كانت عائله كلش بسيطه حتى اثاث ماكو گعدنا بالگاع وشويه اجت ام علي سلمت وگعدت وظليت ساكت مااعرف احجي شي امها گاعده وشويه اجت گعدت شويه ليغاد مني وگالت اني اسف لان عفتك ومانظفت الك
ام علي اني جاي اخطبج تقبلين نتزوج
ظلت ساكته ومحجت شي كانت مصدومه كلش
ام علي اني معجب بيج بس اصبري الي كم يوم اكدر ارتب اموري واجي اخطبج رسمي
گامت عل حيلها وگالت وزوجتك شسوي اله
شدخل زوجتي بالموضوع
ابو مها اني مو هجامت بيوت
لا بس اني وزوجتي علاقتنا شبه منتهيه هيه تبقى بيتها وانت بيتج
لا ابو مها اني ماادخل عل ضره اعذرني ابو مها
شكو بيها
اني قبل اربع سنين ازوجت واحد وجان مزوج بقى وياي شهر ورجع زوجته مااريد اخوض نفس التجربه
زين ام علي عرضي قائم منا لاسبوع تفكرين بيه ورجعي الي خبر
وخليت وطلعت اني صح عجبتني ماانكر بس مااكدر اطلق جنان اني عايفها علمود بناتي واذا طلقت جنان واخذت البنات راح تربيهم نفس تربيتها الصگط واذا اخذتهم مينطيني گلبي اخليهم تحت رحمة زوجت اب مهما كان جنان ابد متضرب بناتها ولاتعنفهم حتى لو كانت وسخة ومهمله اني مبقيها علمود بناتي

الناشربارق العراقي
حب مابعد الاربعين
الجزء العاشر
بقلم ام احمد

ظليت يومين افكر باام علي انه هيه راح توافق واذا رفضت فهي تضيع عليها فرصه اني صح عجبتني بس ماهدم حياتي بناتي علمودها تريد ازوجها بس مااطلگ جنان.
وره يومين امي عزمت الكل لان تصادف السنويه مال الوالد ورحت اني وبناتي جانت رقيه كلش نحسه بس اني مااريد تبقى بس ويه امها ظلت مجلبه بيه مگدرت اخذ راحتي وگته سوا اكل وزعوا عل ناس محتاجه الكل كان مخبوص بالتحضيرات وصبوا اكل وكعدنا اكلنا بس رشيد كان معصب كلش وبس يدردم بس هوسه مااعرف شبيه المهم عل اكل ظل گالب وجه اني ضوجتني رقيه ومها ظلت تلعب متقبل تجي تاكل حسيت روحي طفرت وشويه رشيد ظل يسب ويفشر عل ايڤين محبيت ادخل يمكن اكو شي بينهم بس مدااعرف شنو وانتهت العزومه ورجعت للبيت محمل اكل لان بزعت من اكل ام كفشه ظليت انتظر رد ام علي بس ظاهر هيه تريدني اتوسل واني مهما كان عندي عزة نفس ماانذل علمود مره وعفتها الشغله ولا رحت ولا سالت ومرت ايام واني بين شغل وبناتي وبيتي من اشوف مها ترد روحي كلش احبه وهيه دلوعه وتاخذ احسن الدرجات وجنان تقريها جنان تهتم بالدراسه هم بيه ايجابيه
تقربيا صار شهر اني مرايح لااهلي ومن طلعت من شغل رحت لاهلي كانت بس امي بالمطبخ تعجبت وين رشيد گالت نايم سكتت كعدت اكلت وگتله يمه انت اكلج ميتعوض ليش متجين تعيشين وياي احسن من اهنا ضحكت امي وگالت يمه ريحة ابوك بالبيت حسيت امي مقهوره سالته يمه شبيج
والله مااعرف شگلك
شكو يمه احجي خوفتيني
رشيد
شبيه ابو بلاوي
متصير عصبي
يمه احجي
ضرب ايڤين وطردها
ليش
ماادري ميگول شوف منذر اريدك تحجي وياه بهدوء ترى البنيه دره مال الله بس هو اخوك مخبل شوف شبيه
زين يمه يصير خير اكوم انام والعصر اشوف
فدوه لگلبك ابني والله انت بميت رجال بس حظ ماكو
اووف يمه اگوم احسن متبدين
ورحت وظليت افكر بهذا اخوي ليش يضربها المرته اذا هيه ممقصره وياه
والعصر من گعدت جان رشيد طالع يمكن عرف بيه موجود وراح أمسح بيه الگاع المهم اجه اخويه سمير كان دكتور ومرته موظفه بدائره الصحة وظلينا نسولف وفكرت باام علي بلكي يلكون اله شغله احسن من بهذلت التنظيف وصيتهم يخلوها بالهم حتى لو هيه رفضت الزواج تظل جيرانا ولازم اساعدها وگتله لسمير انت من تشوفها گول الها جانت مرت سمير تحب السولف ومتسكت دقيقة وحده وظلت تسولف ومن وصلت سالفه رشيد بدت امي تغمز الها متريد اعرف شي انداريت عل امي يمه خلي نسمع الحقيقه خليني اسمع اكيد ابنج غلطان لان عرف اني اهنا
وظلت مرت اخويه تكول رشيد بااخر فترة كل يوم يضربها لايڤين ويطردها بالشارع وهم ياخذوها يمهم ومن يسألوه يگول مرتي وحر بيها ظليت اباع عل امي وكلت الها ليش متحجين ليش تخلين بنت العالم هيج يصير بيها
اوو يمه هو انت عصبي ومتتحجى‘
من بدايه گتلج ابنج مو ادمي لاتزوجيه
يمه صار شهر هو شاد وياها كل اشهر المضت همه زينين
زين انتظر رشيد افندي وافتهم منه وين يروح انطيت السويج لاابن سمير وگتل دخل سيارتي بالكراج مال اهلك حتى يعرف اني رحت وباليل اجه رشيد واتفاجا بوجودي وارتبك سلم وكعد
احجي رشيد شبيك ويه مرتك
ابو مها انت اخويه وكبرتني وسويتني رجال مااريد احد يدخل لا انت ولاغيرك
انت رجال وتطلع عضلاتك عل البنيه مراهقه وتضربها وتطردها غير نفتهم السبب
ماكو سبب كرهتها مااريدها
ولك وهو شنو لعب مال زعاطيط هذا زواج
منذر شوف مااريد مرتي اريد اطلگها
لا مو بكيفك رشيد افندي متطلگ بدون سبب مقنع اقتنع بيه اني
انت لاتدخل مو ابويه انت اذا عندك قوانين روح طبقها عل استاذة مالتك وماكمل حجي الا واني ضربته وامي وكفت بينه ظليت اغلط عليه واسب بيه وگتله باجر اجي اشوف مرتك بالبيت لا اطردك من البيت افتهمت وخليت وطلعت