نبعه

اول

مساء المحبه والخير ع عيونكم
مثل ماوعدتكم بقصتي الجديده ..
هذا الجزء الاول ..
القصه من الريف ...لكن تعذروني لجهلي باللهجه الريفيه الجميله
واتمنى احداث القصه تعجبكم

قصة
#نبعه
ج 1

من التعب غطيت بنومتي وماحسيت بالدنيا ..
بس سمعت صوتها تصيح عليه بعصبيه
- ولج كومي ماشبعتي نوم ..كومي يالمطيه .. صار ساعه اصيح عليج وانت ماتسمعين
فزيت من نومتي وحسيت برجفه بجسمي ... صوتها عالي والجو بارد ...واسمع صوت اذان الفجر ..
جاوبتهه
- اي يمه كعدت ...جايه ..جايه
ركضت توضيت وصليت ..ورجعت لكيتها بالمطبخ تحضر للخبز ... عجنت ..وهي حضرت الريوك
ساعه وشعلت التنور... وبديت اشنك ...
طلع الفجر وضوت الدنيا ...وصعدت العجين للسطح يم التنور
وبديت اخبز ...
كل يوم هذا شغلي ...
اكعد من الفجر عالخبز ومن اكمل يتريكون ابويه واخواني ...واطلع اني وصفيه مرة ابويه للسوك ..يجي ويانه ثامر اخويه بسيارته البيكب ..ناخذ الزرع ونكعد اني وياهه نبيعه ....
ويبقن نسوان اخوتي اثنين بالبيت ينظفن ويسون الغده لان بكعدن متاخرات شويه مو مثلي ..
ماتت امي من عمري سنتين... اني اصغر وحده
يكولون صابهه مرض ماعرفو شنو
اخذوهه اطباء الى ان ملو
بعدين فروهه عالاضرحه ... ورادو اتطيب
بس راحت الى رحمة الله
وكلنه جنا صغار وابويه تزوج وره وفاة امي بشهور قليله
اخويه الجبير طه ..واختي نعمه اصغر منه هم راحت الى رحمة الله عالولاده ظلت تنزف ومااخذوهه للمستشفى الى ان ماتت ..وابنها بقى عند بيبيته تربي
واخويه رضا وعلي..
وثامر اصغر واحد عمره18 سنه واني هسه عمري 15 سنه
اخواني طه ورضا متزوجين وكاعدين ويانه واثنينهن بنات عمي وعدهم كل واحد  3 اطفال
واثنين بعد مامتزوجين
مرة ابويه طلعت عاكر وماخلفت لابويه
قست علينا هوايه ... بس من كمنا نكبر اخواني وكفوهه عند حدهه ...
بس اني كدرت عليه لان ماجاوب
ومن اني صغيره تاخذني للسوك وتعلمت عالشغل
اني سمره وناعمه ..ومن بديت اكبر كمت احس صارت عيون عليه بالسوك .. وقسم منهم عيونهم مالحه
وجنت استغرب اخوتي ليش يرضون اطلع للسوك واني كبرت ..ميخافون عليه ؟
كم مره ثامر اخويه كال ماريد نبعه تروح للسوك ويه خالتي الزلم ميخافون الله
بس خالتي واحنه نصيحلهه يمه ..تعاركت ويا وكالتله
- لعد انت تعال اوكف ويايه اني وحدي مااكدر ..وهي شكو عليهه ناعمه واللي يشوفها عبالهم طفله ممبينه جبيره
وجان يسكت

من كملت الخبز ... تريكنه .. وثامر محضر البيكب ويه الزرع البي ... وطلعنا للسوك بالمدينه
اني البس عبايه اسلاميه سوده وشال
وخالتي تلبس عبايه وبالسوك هم تبقى بالعبايه الاسلاميه
وصلنه للسوك ...
ونزلنه الزرع وخلينا بالسلال
طماطه وخيار وبيتنجان ..وبصل و....
ابويه وخواني كاعهم جبيره ويزرعون بيها
قسم احنا ناخذه
وقسم يجون مشتريه ياخذو للعلوه
ويه الزرع عدنه كم راس غنم ودجاج
الحمد لله خير من الله
بس حياتنه مثل ماهي ... كلها تعب بتعب
من نزلنا الغراض وقسمناهن بالسلال
جان السوك بعده مو هوايه ناس بي
شويه واجو الناس وبدو يشترون ... واني ويه خالتي نعبي بالعلاليك ونوزن ...ونحسب الفلوس ومن تصير دنيا الضحى ينترس السوك ناس
هوايه جانو يجون علينا معاميل لان زرعنا تازه
ومرات يوصونه نطلعلهم على صفحه
مااعرف بيومها اني حسيت مثل التعبانه
جسمي يوجعني ودايخه ...وتكاويت ويه نفسي حتى اكمل اليوم
من صارت قبل اذان الظهر ..صار ازدحام علينه وانخبصنا ..
حسيت ويه الهوسه اكو واحد واكف يتفرج علينه من بعيد او وكفته مو مريحه
انتبهت عليه ..بعدين ويه الهوسه نسيته
خف الازدحام وكعدت بالكاع تعبت وراسي يوجعني
خالتي كالت ديري بالج عالدخل راح اروح يم ام عباس اخذ من خاطرهه واجي ...ابوهه توفى
كتلهه زين يمه روحي اني كاعده
شفت نفسي دايخه خليت ايدي على راسي وغمضت عيني
راسا حسيت ب جيس الدخل انجر من حضني
فتحت عيني شفت ولد يركض
صرخت بعلو صوتي
ياناس هذا حرامي وباكني
واركض وراه
وقسم من الشباب هم ركضو وراه
اني من ركضت ومن الهبطه دخت او وكعت بنص السوك
حسيت الناس ملتمه عليه وخالتي ادك وتلطم عبالهه متت
ويطشون على وجهي مي
ومن كعدت عرفت انه الشباب لازمي وكاتلي وماخذين الفلوس منه
خابرت امي ع ثامر يجي علينه
كلهه السياره عاطله ..اجرو سياره وتعالو
اني جنت دايخه وتعبانه ..وامي ظلت تسال ع سياره
واحد من البكالين كلهه حجيه اني اوصلكم
رجال عمره فوك ال30 بس جان مرتب وشكله حلو
صعد الباقي من الزرع بالسياره وجان قليل الباقي
وصعدنه وياه ..
ظل يسولف ويه امي احنا كاعدات ليوره
بس انتبهتله كل شويه يباوع عليه بالمرايه
واني ادير وجهي عنه ..الى ان وصلنه البيت
اني دخلت للحمام سبحت بس جنت احس نفسي مصخنه
كوه اكلت لكمه
وره ماكملنه اكل...
رضا ظل يحجي على امي يكولهه ليش عفتو الهذا الحرامي
وامي تكوله هو انكتل واني كتلهم عوفو كافي بعد
وظلو يتناكرون بيناتهم وابويه هم صار ضدها
اني دخت ودخلت للغرفه انام ..جانت غرفتي اصغر غرفه بالبيت ...فراش بالكاع ..وكنتور صغير اخلي ملابسي ...وكتبي مال الابتدائيه ضامتهن بديلاب صغير
تمنيت اكمل دراستي
بس حدي للخامس وبطلوني
جنت من اضوج افتح الكتب واتفرج بيهن
ماعندي غير تسليه..لان اكثر شي بالشغل لو نتفرج تلفزيون من نكعد بالليل
واني انام من وقت لان تعبانه وحتى اكعد من الصبح

نمت شويه بس كعدت كلش مصخنه .. وتعبانه
كمت كوه من الفراش ورحت على ابويه كاعد بالديوانيه
شافني مريضه ومصخنه ..صاح على سعاد مرة اخويه جابتلي حبايه بلعتها وتمددت عالفراش
ابويه جان حنين علينه كلش .. بس مااعرف وين جان يودي فلوسه
ينطي الاخواني كل اسبوع فلوسهم
والباقي يضمهن ..
لايفكر يجيب اثاث جديده ..لو طباخ جديد
كلهن قديمه ...وامي مثله يضمون بالفلوس
اني هم مجانو ينطوني ... بس من احتاج شي يكول الامي اشتريلهه ... وهي تشتريلي حتى بدون متاخذ رايي
من كمت اكبر ..واتفرج عالتلفزيون ..واشوف البنات الصغار يجن مرات ويه اهلهن شلون مدللات وحلوات
كمت اقارن واحس نفسي اني غير شكل
بكلشي اختلف ..
اباوع ع نفسي بالمرايه ... شكلي حلو ..بس الشمس والتنور حارك وجهي ... والتعب مبين عليه من اني صغيره
وكل يوم يمر .. افكر بنفسي وبحياتي اكثر ليش اني من دون البنات هيج ؟

وانتظروني بالجزء الثاني بالليل ان شاءالله انزله

الكاتبه
#شيرين_الصفار