قصة
#نبعه
ج 4
كعدت من الفجر عالعجين والخبز ودااتحضر حتى اروح ويه خالتي للسوك
لكيتها كالبه وجها عليه ..
اسلم عليها متجاوبني ....
جيت عليها بستها من راسها ...هي رأسا دفعتني وصاحت بيه
- ولج طالعه عينج انت
كلتلها - ليش خاله والله يعجبني البس واشتري مثل البنات يعني حرام عليه ؟
هي خزرتني وكالت
- خلي يدللوج زين وهسه يندمون بعدين ...
كلتلها - خاله ميخالف اروح اليوم اشتري ملابس ؟
كالتلي - واني ؟! منو يوكف ويايه
كمت بستها من راسها مره لخ كلتلها بس اليوم والله
باوعتلي بطارف عين وسكتت
كلتلها - ها خاله وافقتي مو ؟
كالت - بس اليوم ...
كلتلها هسه من يوصلج اخويه يوصنا النا اني وسناء يذبنا يم سوك الملابس ومن نكمل نرجعلج وبعدين نرجع سوه
هي سكتت وبعدين كالت- زين كملو وتعالو عليه
بس جان ناقصني جنحان واطير
خبزت وسويت الريوك ...دخلت سبحت..وبدلت ملابسي ..وطلعنا
ابويه قبل مااطلع صاح عليه ونطاني فلوس بعد
كلهه السناء شنو يعجبها خلي تشتري
ونطاهه الها فلوس كلها تشتريله تراجي ذهب
فرحت اكثر وبست ايد ابويه ودعيتله يخلي الي
خالتي تباوع وماعجبهه كلشي
المهم ..طلعنا وذبنا اخويه يم سوك الملابس اني وسناء مرة اخويه...وهي جابت ابنها صغير ويانه
دخلنا للسوك ...ورجعت اتفرج على الملابس والاشياء البيه..بس هالمره اكثر فرحانه ومرتاحه
سناء بنت عمي وتحبني جانت ...وهم دائما أدردم وتحجي على مرة ابويه
كالتلي
- ولج نبعه شتريدين اشتري بعنادهه .. بعدج صغيره وحلوه ليش هيج ساكمتج
- والله سناوي كلشي يعجبني البس واصير مثل البنات اللي بعمري ...قابل اني وحد لو مو ادميه
- اي حبيبه تعالي شوفي اليعجبج والفلوس هوايه وتكفي
وبديت اشتري...
اخذت تنوره وقميص ودشداشه وهم شي الفستان الاحمر اللي عجبني البارحه.. وحذاء
جان عاجبني بنطرون بس اخاف احجي
اشتريت شالات ...وسناء كالتلي
- اشتريلج جبه للسوك وياهه شال بلونها شنو لابسه العبايه جنج عجوز
عجبتني الفكره ..واشتريت جبه لونها زيتوني اخضر وشال يرهم وياهه...
وبعدين اشتريت محبس ذهب مثل ماراد ابويه
واشتريت سوارات وكلاده وقراصات الشعري كذابيه طبعا
بحياتي مافرحت مثل فرحتي بهذا اليوم
وامشي وادعي الابويه
طول طريق الرجعه واني احلم بالملابس
اهم شي الفستان الاحمر العجبني اشتريته
الضحكه مافاركتني
رجعنا ع خالتي للسوك ...واكف وياهه ولد صغير يساعدهه
كعدنه يمها شويه الى ان اجا اخويه
هي ماسالتني ششتريتي
بس الطريق كله تحجي شلون تعبت هذا اليوم وحدهه
اني مره اسمعها ومره انطيهه اذن طرشه لان حسيت بيهه تسمعني وتلومني لان بقت وحدهه
وصلنه للبيت ... جانت سعاد مكمله الغده والبقيه راجعين
تلكاني ابويه ...
- ها بويه ششتريتي ..وجهج يضحك اليوم !!
اني ركضت عليه ذبيت العلاليك بالكاع وبست راسه ..
كتله
- اي بويه اشتريت كل العجبني ودعيتلك بويه والله
كلي - بالعافيه بويه وشتحتاجين ماقصر وياج
كتله -تشوفهن بويه ؟
- لا مو هسه من تكدريهن راويهن الي
اخذت العلاليك وفتت الغرفتي فرحانه وطايره
طلعت منهن الغراض وحده وحده وظليت اتفرج عليهن
والضحكه مافاركت وجهي ..ردت اكدرهن
بعدين كلت لا ...اسبح اول
سبحت ..وكعدنه نتغده واني فرحانه واحجيلهم عالسوك
والغراض البيه ...وكأنه جنت بالجنه
كملت غده عالسريع ..
ودخلت الغرفه وبديت اكدر بالملابس
اول شي لبست الفستان الاحمر وبي ورده بيضه ..واخذت وياه حذاء ابيض ...شعري جان بعده مبلل فتحته ومشطته
حسيت نفسي صرت اميره ...فرحانه وطايره
طلعت من غرفتي صارت سعاد بوجهي
رأسا شهكت من شافتني كالت
- معرفتج ...يمممه طالعه جنج كمر ...شهالجمال ..تعالي تعالي خلي يشوفج اخوج ودخلتني الغرفتها ..
من شافني اخويه ضحك ... كال
- شطالعه اليوم كمر نبعه
واني افرح اكثر واطير
نزلت ع ابويه ... وبس شافني هم فرح وضحك كال
- والله بويه انت احلى البنات بس غير احنا متعبينج ..بالعافيه بويه
وسناء هم فرحت بس مرة ابويه مافتحت حلكها ولا شوفتني العافيه ..بس ميهمني ..المهم اشتريت اللي بنفسي وعاجبني
سناء صاحت عليه ...كالت روحي غرفتج راح اجيبلج شي واجي
صعدت الغرفتي ... وطلعت المرايه من الجرار ...
لبست الطوك بشعري ..دخلت سناء ..كالتلي
- ولج تعالي اخليلج حمره
اني صحت بيها وخفت
- يمممه حمرتيش غير يذبحوني
- ولج خليها ومسحيها اريد اشوفج شلون تطلعين
- ولج خاف متروح بعد وانفضح
- لاتروح ..يله تعالي اخليلج
تقربت عليه وبدت تحطلي الحمره ومن كملت باوعت عليه وصاحت
- الله ...ولج شنو هالجمال ...كمر والله
باوعت بالمرايه حتى معرفت نفسي
معقوله هاي اني .... لعد ليش هيج جنت وماحاسه ع روحي
بس راسا مسحت الحمر خفت منهم
كتلها السناء ..
- يله روحي خلي اكدر بقية الملابس
طلعت واني ظليت البس وانزع واراويهم
وكلهم فرحانين ع فرحتي
واني الدنيا مالامتني
والبس القراصات وكل شويه اسوي شعري شكل
واباوع بالمرايه ...
بس بالحمره طلعت اخبل ....
هذا اليوم جان احلى يوم بحياتي
هوايه حلمت البس مثل الممثلات وبنات المدينه
بس ليش هنه هيج يبرجن او وجهن حلو وصافي ؟!
خلص هذا اليوم وكلبي فرحان
والمحبس الذهب لبسته بيدي ...ودعيت لابويه
وان شاء الله مانزعه من ايدي بعد
وانتظروني بالجزء الخامس
سوو متابعه لحسابي حتى يجيكم اشعار من انشر
#شيرين_الصفار
أنت تقرأ
نبعه
Romanceنبعه شابه من الريف جميله وطيبه يتيمه الام تعمل ببيع الخضار مه زوجه ابيها حارث من المدينه والي طلب منهه تبادله الحب والغرام تابعوني القصة فيها عبره لبناتنه
