نبعه

تاسع

قصة
#نبعه
ج 9

من دخلت سناء و كالت عندي بشاره تفاجأت
لأن قبل شويه جنت جوه مسمعت شي كلتلها شكو ؟
كالت
- موهسه خابرو بيت أم صالح يردون يجون خطابه
انى انعكد لساني..وبعدين كلتلها
- شنو خطابه عليمن؟
- يعني عليمن؟ غير عليج
هاي شنو تحجي؟ لا لا اكيد بكيفها تحجي لو تتشاقه
باو عت عليها عيوني دمعت ما أعرف أحس كلبي انعصر
شنو خطوبه؟... و حارث
هي انتبهت اني ضجت كالت
- ها نبعه اشوفج اسكتي؟ شنو شبيج؟
ظليت ساكته هسه شكوللها اني وين وذو له وين ؟
كلتلها
-فهميني سناء شنو الموضوع؟
كالت
-أم صالح خا برت على خالتي وكالتلها اريد أجي يمج ...ومن سألتها خالتي خير خو ماكو شي؟ كالتلها نريد نبعه ال صالح
وخالتي كالت النا عمي واخوانج مبينبن راضين عالموضوع و ثامر مدح بي هوايه يكول خوش وليد.
اني رأساً كمت ابجي كلتلها
-اني ماريد اتزوج هسه بعدني صغيره
كالت
- صار عمرج 16 سنه شنو صغيره؟ كلنا تزوجنا بكدج
كلتلها
- آني ماريد أتزوج شنو غصب؟.
كالت
- وشنو عذر ج؟ ما عندج عذر
كلتلها
-ماريد وخلص
وظليت ابجي ..وهي ظلت تحجي ويايه وتقنعني ..
كلتلها
-مااقبل ...ومحد يغصبني واكول لابويه اذا جبروني
هي كلتلي ..
- اني عليه كتلج ...وانت واهلج تنجازين
عافتني وراحت واني كلبي صار نار ... تمنيت الموت ذيج الساعه ...عرفت مادام اهلي واخوتي راضين ومثل ماكالت سناء ماعندج عذر ..يعني لازم يغصبوني ولازم اقبل
بس مو بكيفهم ..اني احب حارث ولو تطلع عيونهم مااقبل بغيره ..بس شلون وهسه حارث زعلان وميحاجيني
ظليت ابجي الى ان ورمن عيوني ..
بقيت كاعده بغرفتي ..ومنزلت
المغرب صاحو عليه انزل ...
نزلت وجنت ضايجه ..دخلت للمطبخ
ديشتغلون بالعشا ..رأسا سعاد تلكتني
- هلا بالعروس
وتضحك ..اني رأسا عصبت كلتلها
- اني مو عروس ومااتزوج وكمت ابجي
خالتي كاعده من شافتني ابجي كالت
- شنو مااتزوج ..تردين تظلين بلا زواج ؟
- اي ابقى بلا زواج ..اني بعدني صغيره
- شنو صغيره البكدج خلفن
- كلتلكم مااتزوج واني راح اكول لابويه مااقبل ..
كمت ابجي واصيح وعفت المطبخ ورجعت الغرفتي
وظليت ابجي
ساعه وصعدت سعاد جايبتلي اكل لان متعشيت وياهم
باستني من راسي وكالتلي
- شبيج نبعه ليش ضايجه ؟
-لاتجبروني عالزواج ..كوليلهم مااقبل
- نبعه ..انت تعرفين تقاليدنا البنيه بس تكبر تتزوج ..واذا مارضت يجبروها...وانت من تسوين هيج راح تتفسر غير تفسير ..كل البنات يفرحن من ينخطبن ليش انت ماتقبلين ..وصالح خوش شاب اخلاق وشكل وعائله طيبه وامورهم زينه ..شتردين بعد
- ماريد اتزوج لا صالح ولاغيره
- يله عيني ..هسه اكلي ..وفكري ..ومنا الباجر يصير خير
عافتني وراحت ..
اني عرفت هاي الشغله راح تصير ... الظاهر متفقين بيناتهم ودينتظرون اكول اي وحتى لو ماكلت ..ماراح اكدر اوكف كدامهم ...همه يقررون واني بس اقبل
شفت نفسي مثل اللي ديغرك وميعرف شيسوي
اني احب حارث ومابدله بالعالم
شنو صالح ..هم اطلع من بيتنه وادخل بنفس الحياة
اريد اخذ واحد احبه واعيش بالمدينه واحقق احلامي واعيش مثل البشر ...لو نظل احنا بهذا الضيم عايشين
حسيت نفسي اختنكت وشفت ماكو كدامي بس اراسل حارث يشوفلي حل
دزيت رساله ...والثانيه .،والثالثه ..وهو يشوفهن وميجاوب
توسلت بي ...كتله" واكعه بمشكله واريد تساعدني"
شويه ورد عليه " ولو اني زعلان منج ..بس من كلتي مشكله كلبي منطاني "
من رد عليه ردت روحي الي ...
" ليش هيج حارث ماتسال عني ..هو هذا الحب "
" مو انت هم سويتيها فد مره ازمه كتلج اريد اشوفج مترضين "
" الحكلي حارث ..جايين خطابه عليه واهلي راضين "
" اها ...الموضوع بي خطوبه ..واذا اهلج راضين ؟ انت رفضي "
" عبالك احنا بالمدينه والبنت بكيفها ؟!! احنا بالضيم حارث "
" يعني يجبروج  "
" اي لان ماعندي عذر "
" اذا هيج ..صدك مشكله ...واني نبعه ..،شلون اعيش بدونج ..اموت اذا تتزوجين "
" اسم الله عليك .. اموت الف مره ولاانت يصير بيك شي "
" سمعي نبعه ..لازم يصير حل وبسرعه "
" اي فدوه اروحلك ...لازم حل اني مااكدر اعيش بلياك "
" منا الباجر افكرلج بحل ..انت حبيبتي ومتصيرين الغيري "
اني طرت من الفرح ..وبجيت بجيت ...
"حبيبي حارث اعرف تحبني ومتقصر ...اكيد تجي تخطبني وتسويلي حل .. اعرف متعوفني"
" الله كريم حبيبتي ماقصر وياج بس انتظري الباجر بالليل ..واذا اهلج سالوج كوليلهم افكر ..لاتكولين اي ولا لا "
" هاهيه ...مثل مكتلي اسوي .."
خليت راسي عالمخده حسيت كلبي ارتاح ...
تمنيت الدقايق والساعات والايام تمشي بسرعه
ويتحقق حلمي واصير الحارث..
ثاني يوم كعدت الصبح ..بس ماحجيت ويه احد ..
وهمه هم شافوني ضايجه محد حاجاني
حطينه الريوك ..
صاح عليه ابويه ..تعاي بويه تريكي
اني هم كعدت ... مدنكه وماحجيت وياهم
قريب مانكمل ريوك سالني ابويه
- شبيج بويه ...شكلج ضايجه
- ماكو شي بويه
خالتي من يمهه كالت
- ماراضيه على صالح وتكول مااتزوج
جاوب ابويه
- صالح خوش شاب ... ليش ماراضيه ؟
اني رجع كلبي انقبض ... بس كلت اسوي مثل ماكلي حارث
جاوبته
- خلوني افكر بويه ...وبعدين ارجعلكم خبر
- خوش بويه..بس لاتتاخرين .،الناس تريد تجي
- صار بويه
عفت الاكل وكمت وتحضرت حتى نطلع
بس اني مامرتاحه وكل اللي ديصير غصبا عني
من وصلنا بيت ابو حارث ...تمنيت اشوفه ..بس ماكو
وصلنا للسوك ...وبظينه بالشغل
للظهر كملنا ...
خالتي كالت اروح اشتري رصيد للتليفون
بقيت كاعده ..جنت تعبانه وضايجه كلش
رأسا سمعت صوت حارث
فرحت ..وظل كلبي يدك ..
من شفته صار كبالي شفت الجنه
كلي
- شلونج نبعه ...بالي يمج ..الليل كله منمت افكر شنسوي
- واني هم حارث ...معتمده على الله وعليك
- نبعه ...اليوم بالليل ..راح اكولج شنسوي ..بس لتزم تسمعين كلامي
- اسمع كلامك ..وشتريد اسوي بس ماتزوج صالح وافاركك
- عفيه عليج ...اعرف انت تسمعين الحجايه..بالليل اتصل واتفق وياج
- ماشي حارث ...انتظر
هو عافني وراح قبل متجي خالتي ..واني بين خايفه وحايره وفرحانه .... همي بس اخلص من هاي المشكله وماعوف حارث
رجعنه للبيت ...كملت شغلي ...بيومها محد حاجاني بالموضوع ...
انتظرت الليل ... والحل اللي كلي عليه حارث
ساعه 11 ونص راسلني ...كلي راح اتصل بيج ..اسمعي مني واحجي ع كيفج..كتله صار
واتصل ....سلم عليه واني اجاوب بسكوت
كلي
- شوفي يابنت الناس ..اني وياج شغلتنه معقده ...سمعي مني ولاتقاطعيني
اني بصراحه اكو عقبتين عندي
اول شي اخواني الاكبر مني ممتزوجين واهلي مايرضون اتزوج قبلهم
والاهم من هذا ..اهلي يريدوني اتزوج بنت خالي ...وهذا شرطهم .. وميقبلون اخذ من الريف
بس اني احبج نبعه ... ومعليه بيهم ..اني اريد اتزوجج على سنة الله ورسوله ..تقبلين ؟
اني مااعرف شصار بيه ... مقهوره وفرحانه وخايفه
جاوبته
- اي طبعا اقبل ..بس شلون واحنا هيج وضعنه
- الحل عندي نبعه ... اذا قبلتي حتى نتفق
- شنو الحل ؟ اني قابله باي حل مايبعدني عنك
- خلص ...اتفقنا
- والحل هو .......

وانتظروني بالجزء العاشر واحداث مشوقه اكثر
سوو متابعه لحسابي حتى من انشر يجيكم اشعار

#شيرين_الصفار