لو بدله عرس لو جفن هيج عشقنه

28

ضربني كل قوته وهز الكعاع أحس بيه ضليت ضافنه نحنه عليه لزمني من جتوفي وهزني كل قوته وكال

-لا عبالج اليوم ضربتج لأن بيوم جنت احبج وهسه من شفتج غرت عليج لا أبد ولا عبالج أريد اضمج من عيون البشر بس إليه لا لأن حور الي عشكته مو انتي وحده ثانيه لأن ذيج بت عمي الي سمت باسمي وإني 24 سنه وماشايفه ذيج جانت مثل لؤلؤة ثمينة وسط محارة وابن أبوه الي شافه مو هاي الكدامي الي مطلعة رجليه ولابستلي خلخال بوسط هل جماهير هاي كله
ضربتج البوم حتى تحسين على روحج وتذكرين منو حور
انتي مره كلتيلي اني حلم الكل وكته كلت بداخلي أي انتي حلم الكل مو لأن انتي جميله لا الف وحده بجمالج وحتى أكثر بعد بس حلم الكل انتي بشي ثاني مو جمالج من تلكينه ذكربني عووود

كلتله هذا الكلام الي اني قاصده واعرف تأثيره على وحده مثل حور لأن الي وصلته حور اني سببه ولازم اصحيه شمجان صاير بينه حور شي خاص جان وما زال وراح يبقه حور شي مختلف ولازم ضل هيج سواء جنه سوى أو لا ضل جوهره وملازم تكون متناول الجميع رغم هيه لحد الآن ما جاوزت أي حد بعدهه حور الصعبه بس أحس بيه شي متغير ولازم يرجع نفسه

عافني وراح بدوامه أفكاري عفت كلشي ورحت لغرفتي بدون محد يحس دخلت اني وملابسي جوه المي بس أريد النار الي بداخلي تطفي بس شي طفيه مستحيل كل الي كاله أسد صحيح اني متغيرة بس هو السبب الي غيرني هو أريده يحس بالندم على الشي الخسره بس جنت آخسر روحي بهل معركه صح اني جنت انيقه من يوم يومي حلوه وكشاخه بس بعمري ماكشخت لأحد ولا لبست حتى الفت انتباه أحد كل عمري اني ملكة روحي اني الدكتوره حور مو اني الي أركض ورهه هذا وذاك
بعمري مانزلت لمطبخ بهيج مناسبه قويه رغم أني طالبه جامعيه وشايفه أشكال ألوان ومختلطه بشر كومة بس اني شي مختلف جنت موهيج طلعت من الحمام وإني لافه المنشقة عليه صفنت على روحي بالمرايه هواية وكلت انتي حور وبس والي بكلبج صح مستحيل تنسينه بس ادفنيه وامشي ليكدام باوعت للساعة بعد ساعه وتطلع الزفة اني بعمري مارحت لزفه أحد ولا هتميت لهل أمور

مشطت شعري ولبست ثوب عدل طويل وضيك بلا اردان اسود وفوكه بشت اسود وحوافه ذهبي خليت مكياج اعتيادي ورسمت عيوني بطريقه جميله لبست حزام ذهب ولفيت شالي خليجي بس ماطلعت شعري مثل الخليجيات ونزلت كعدت بصف بيبيتي من شافتني خلت أيده عله اديه بست أيده كالت

-ولج والله يمه أخاف عليج من عيون العالم
-ههههه ادري شصرت بجمال الشيخة نوريه
-اووووو بحور بعمرج من جنت صارت عليه حروب جدج كال اذا نوريه صير لغيري اسويه دمايه
-هههههه صدك والله
-أي شلون لعد جدج جان مثل فهد اخوج دمه فاير ولو عشك محد يعرف بيه ومن خطبني ابن عمي يله دريت بيه بس شني اجانه هاد بسلاحه
-صدك والله هاي هيج جدي
-قليل هذا شحجي شكول
-ههههه يجي يوم ونكعد وسولفيلي على قصه عشككم

جنة اني وبيبتي كاعدين ونزل فيصل شوفته عيشه ضلن عماتي يهلهن ويصفكنك طلعو للزفه بس اني رجعت حور القديمه وشغلت اروح الزفة عفته

للمغرب اجتي الزفة محد طب بس فيصل وعسل خطية مكيف بقه شويه وطلعوه صبو العشة وراها تعشت العالم وكالو صعدو العروس صعدت عسل لغرفتهم ههههه هيه خطية مخرسه وذني يخوفن بيه عاد حجيته وكتله فيصل يعشقج لتهتمين لكل هل كلام وره شويه سمعنه هوسه وهلاهل عرفنه زفوه طلعت من غرفته وضليت بالصاله اني وشهد نسولف لحد مصعد سلمنه عليه وبوسته ودخل لغرفته عاد وره ما خلصت ااهوسه نزلت جوه اشوف شكو ماكو بعدين قررت اليوم انام يم بيبي صار هواي منايمه بحضنه

بعد الغده ماشفت حور ضليت هواي أتردد للمطبخ اعرف بيه عنوديه احتمال تسوي كل شي بس حتى تغثني بس أبد ماشفته وحتى بالزفه ماكو ههههه رجعت حور القديمة بس عيوني شافته يعني بعد مو شي هين ماشوفه معقوله راح ترجع تختفي من حياتي مثل قبل لا مستحيل اسمح بهل شي رحنه للزفه وفريناه هواية بعد شيخ فيصل هذا ومن رجعنه هم سويناله هوسات ودبكنه وراها تعشت العالم والغربة راحت وضلو بس الكرايب ما شاء الله كومة
وراها زفينه فيصل ومحمد ماقبل أحد يدخل جوه بحكم اكو نسوان دخل عمي طة وابوي وعمي كاضم وعلي وفهد وسجاد وإني بس يعني بس ولد العم زفيناه هو صعد فوك واحنه بقينه جوه ضلت عيوني دور عليه بس هم ماشفته ورها طلعنه وره فتره كالو الشيخة نوريه تريدك رحت اشوفه وكعدت احجي وياها ودخلت حور

بوية شهل جمال والله هاي البنيه الله مدري وين خالقه عيوني شكلت عود هذا أنه الي نيتي مانفه اله شوف شصار بحالي بس قبل مترفع نضرة رجعت احجي ويه جديتي هيه كالت

-السلام عليكم
-وعليكم السلام هله بحور
-هله بيج حبوبه
-اليوم هنانه
-عادي حبوبه اذا عدكم شي خاص اطلع
-لا يمه شعدنه بس أسد تعبان وجنت اسولف وياه
-خير شيخ بيك شي
-لا بنه عمي سلامتج بس شويه إرهاق هسه اروح انام وارتاح
-يعني شغلتك مو مال طبيب
-لا تسلمين ماتقصرين
-بكيفك
-يله حبوبه اني رايح هم امي اليوم أشو من الصبح تعبانه هم أخذه هيه وسارة خطية من البارحة تركض ويانه
-الله وياك يمه وانتي حور يمه هم روحي نامي تأخر الوقت
-حبوبه اليوم أريد انام يمج
-يمه هله بريحه المسك حضني كله الج
-هههه أي والله حبوبه حيل محتاجه حضنج الدافي
-هله بيج يمه شكم ضي كمر عدنه أشو كمر واحد

حور جانت تحجي هيه وجديتي وإني صافن اوووف ياريت بحضني تنامين مو حضن جديتي
سلمت وطلعت أخذت أمي وسارة وسلمت عل كل ورحنه للبيت

من دخلت شفته يم بيبي بس ماعبرني عرفت اني ماعدت اهمه اصلا وخاصه ساره رجعت لا ومو وحده اكو من يدعمه عرفت اني وياه خلص انتيهينه وخلصت قصتنه بس سكتت هو سلم وطلع أني رحت بدلت هدومي ولبست شي مريح وخفيف ودخلت بحضن جدييتي الي بي راحته الكون كله وسلمت روحي للنوم بلكت يجي صبح مابيه كل هذا الألم والوجع

ياريت صباح مابيه لا أسد ولا همه ولا حبه الي عذبني وحرك داخلي من جنت طفله لليوم

حطيت راسي عب مخده وصورته مترضه تروح من راسي محتاج حضنه حيل مشتاااق لعطره موت ولكم مز سهل تبتعد عن روحك كل هاي الفترة ومن شوفه تتصرف عادي مو سهل لا موووت

كل ماشوفه يكتليي الشوك بكل لحضة اكول خلص أخذه واشرد بيه

بس العقل والمنطق يرجعني واسكت أصبر روحي واكول متريدك أسد هنت عليه وطلكت منك عافتك باول موقف صح موسهل بس بكل سهولة باعتك