انت حلمي

حلقة 4

#انت_حلمي
للكاتب محمد مالك
حلقة(( 4 ))
قصة حقيقية
.
.
.
.
.
.
حلمي: الو
ياسمين: حلمي ؟؟
ويسام واقف جنب حلمي :: من يكلم فيك ؟؟

حلمي..تفركس : تمام معتصم شوية ونعاودلك
وسكر الخط
حلمي :هاده ولد عمي معتصم
ويسام: خيرك طيرته
حلمي: موضوعه موضوع توا نهدرز معاه بعدين

_____

فرح : هاااا شن قالك
ياسمين: قال معتصم توا نعاودلك مفهمتش
فرح: في حد في جنبه
ياسمين: ااه
فرح : خفيفة خليك رزينة وثقيلة وعندك شخصية مش طول اتصلتي
ياسمين: والله مش حتعرفي شعوري والله
فرح: يقول شورها ما صدقت توا خليك رزينة هوا يتصل
ياسمين :به خلاص معاش بنتصل بيه
فرح: تعالي خلينا سعاد بروحها البرا

طلعنا مشينا هدرزنا معاها وضحكنا
وكان يوم من اجمل ايام حياتي

خصوصا فرحتي بي حلمي كبيررة

بعد ساعتين

مقعمزة ع سرير ومعاي فرح

ياسمين: بنتصل راه
فرح: اصبرري خيرلك خليك رزينة يقول خاطب خفيفة
ياسمين: اااوووف

في الدار الثانية

ام ياسمين تقشر في فواكه

امهم : هااك يا ويسام تفاحه
ويسام..مد يده خداها : صحيتي
امهم: ايه جو عطو كلمه في ياسمين
ويسام..شرق  وقعد يكح

بوه تي خيرك ناض يخبط ع ظهره

ويسام: عطو كلمة في ياسمين لي من ؟
امهم : صاحبك حلمي
ويسام واضح تكنطا ومعجباش كيف صاحبي حسها بايخة القطة
امهم: خيره ميصلحش الولد ولا كيف
ويسام ناض من جنبهم وطلع الجنان ولع دخان وقعد برا

امهم: خيره هاده
بوهم: حسهه بايخة صاحبه يطلب اخته خليه توا يومين يفكر بينه وبين روحه يرتخا
امهم: ايه قتلهم الكلمة لي الرجالة ف الاخير نسال بوها قبل وعندي لازم تكمل قرايتها
بوهم: خلاص توكلي علي الله ناس كويسين

نفتح باب حوشهم خش ايوب خوهم لقي ويسام مقعمز في الجنان يدخن بروحه

ايوب: السلام عليكم
ويسام : وعليكم السلام
ايوب: خيره طايرتلك
ويسام: مافي شئ جوي ميصلحش بس
ايوب: خليك راقد في الحوش توا جوك يتعدل كم مرة قتلك تعال اخدم معاي شد معاي وبالنص بس انتا عاجبك البطانية والمخدة
ويسام: والله ما ناقص راه بالله ارحمني من المحضرات بتاعك

خش ايوب لقي امه وبوه يتكملو وياكلو في فواكه

ايوب: السلام عليكم

بوهم: وعليكم السلام خش تعال خود تفاح وموز
ايوب : شن الاخبار يا امي
امه: الحمد الله هاك شد
ايوب: ع شن تحكو
بوهم: ع العيلة الي طلبو اختك اليوم
ايوب: من هما ترا
بوهم: عيلة حلمي صاحب خوك
ايوب: ههههه هاده علاش طايرتله برا هوا
بوهم: ايه تعرفهم انتا
ايوب: لا لا ويسام يزبطهم توا ع حسب كلامه لو قال ميصلحش فوتوهم وكان قال كويس ع بركة الله
بوهم: ايوا هاده هوا اصلا