مزاجيات

مزاجي حضيضان

#حضيضان

يكولون اكو قرية او مملكة عايشين اهلها ع صيد وجان اكو واحد بالقرية مشهور بحظه النحس اسمه حضيضان لان كل الناس اتصيد افخر واثقل انواع السمك وهو المكرود يصيد بس الزوري الصغير وفد يوم الملك بالمجلس كال ياجماعة ماكوو سالفة نتونس عليها ملينه من قضايا الحكم والشعر فالوزير كاله مولاي هم سامع بحضيضان بالمملكه مالتنه الملك اتشوق كالة لا شنو سالفته كاله مولاي هذا افكر شخص بالمملكه كل الناس اتصيد بني وشبوط وهو يصيد الشلج والزوري

الملك اتشوق اكثر كال باجر دزولنه عليه اريد اشوف الحظ هم صدك اله دور بحيانتا المهم اجو الحراس لبيت حضيضان دكو الباب طلعت مرته الهم كالولها احضيضان موجود كالتلهم اي كالولها باجر الملك رايده بالمجلس رجعت المرة وسئلها كاللها منو بالباب كالتله هذوله حراس الملك يكولون الملك رايدك باجر وجان ينخطف لون حضيضان وصار قوز قزح المرة كالتله اشبيك خايف يمكن خير كاللها منين الخير يجي وانتي تعرفيني حظي المهم حضيضان مانام ذيج الليله كتله التفكير وصار الصبح راح وظل ينتظر الى ان دخلوو الحراس ع السلطان وجان المجلس بي كل اعيان المملكه وسئله الملك عن سؤ حظه بالصيد كاله مولاي كلمن وقسمته كال الملك اسمع هالمرة اريد انطيك حظك من هل الدنيا وباجر الصيد بس الك وراح امنع باجر اهل المملكة من الصيد بامري وللمغرب شصيد تاخذ وزنه ذهب

المهم رجع حضيضان لمرته وحجالها الي صار فرحت المرة وكالتله ليش ضايج حتى لو اصيد كيلو زوري هم تاخذ كيلو ذهب ونصير زناكين كالها منين مو تعرفين حظي كالتله الله كريم المهم اجى باجر ونزل حضيضان للبحر والناس كلها ع الجرف اتشوف شراح يصيد والحراس كلها واكفه تراقب وتمنع اي واحد عدا حضيضان من الصيد وظل حضيضان يشمر الشبجه ويسحبها وترجع فارغه والناس والحراس تظحك ع حظه النحس الا ان صار الغروب كالوله الحراس هذا اخر جنص الك لان غربت الشمس وشمر الشبجه وطلع بيها نص عضمة وبيها ثقب من النص والعظمة خفيفه مابيها غرام وراد يشمرها واتوسل بالحراس حتى يذب الشبجه مرة اخيره بس ماقبلووو وكالو هذا حظك وظلت الناس تضحك واخذووو بزفة للقصر حتى يشوفون شراح ايصير المهم دخل وحطو العظمة الصغيره بالميزان وكال الملك جيبو الذهب وحطو وشوفو شكد توزن والناس والوزير يضحكون اج الوزير وحط حبات من الذهب ع الميزان ويضحك والميزان مادك وكام يزيد اشوي شوي والميزان مادك حط كيلو مادك صار كيلوين مادك وثلاثه واربعه الى ان فرغ الخزنه من الذهب ومادك هنا الملك والناس صوفرت وجوههم وحضيضان كام يضحك والتفت الملك ع الوزير كاله انت الورطتني اذا ماتحلها اعدمك واجى الوزير يتوسل بحضيضان حتى يقبل بالذهب ويحل الملك من وعده وحضيضان رفض كال الاوزنها ذهب الوزير ظل ياخذ القصر ويجيبه ودز ع المنادي كاله تروح اتنادي بالممالك الي يمنه وتسولف القصة والي يحلها اله هديه جبيرة وراح المنادي ينادي وسمع بالقصة رجل كبير بلسن واجى للقصر وكال اني احلها فدخل وشاف الملك والناس ضايجه وحضيضان يضحك كال الرجل الكبير بالسن فك الملك من وعده واخذ هذا الذهب وروح وحضيضان يضحك ويكول الا وزنها ذهب كال خوش مادام اصريت اني راح احل السالفة اجه للميزان وشال العظمة والتفت للناس والملك وكال ياجماعة الخير هاي العظمه نص جمجمة انسان وهذا الثقب بالنص مكان العين وعين البشر مايترسها بس التراب وجان ينزل الذهب كله وخلة حبات اصغيرة حيل وذب اشوي اتراب وجان ادك العظمة ورجع الملك والوزير يضحكون وحضيضان كام يبجي كاله الشايب اجاك الحظ وانت طمعت
وهذا جزاء الطمع اخذ تراباتك وروح.