شرف الأخلاق

الجزء 18

 
شرف لاقاهو واحد من ناس الحلة وسلم عليهو .. قال ليهو الظاهر انت غريب في البلد ..
شرف قال ليهو نعم .. بسأل من بيت حسون ..
قال ليهو الشارع المقاطع قدامك ده ..اخدو على يدك الشمال ..واحسب شارعين ..
الشارع التالت ..ادخل يمينك اول بيت فاتح جنوب ..
شرف قال ليهو جزاك الله خير .. ومشى على حسب الوصف .. ودق الباب فتحت ليهو الباب بت في عمر عشرة سنة .
قال ليها ده بيت ناس حسون .. قالت ليهو ايوة ده بيتنا انت منو؟
قال ليها انا ضيف..
قالت ليهو طيب ابوي مافي ..
قال ليها مشى وين؟؟ قالت ليهو ماعارفة .. اسأل ليك امي ..؟؟
انت صاحب ابوي ؟ قال ليها ايوة صاحبو ..
قالت ليهو طيب خش ..قال ليها لالا ما بخش ..بنتظره بره اسألي امك ..دخلت البت تسأل امها ..بعد شوية جاء ولد في عمر 16 سنة شكله من ذوي الحاجات الخاصه ..
يعني (تقريبا متخلف عقليا ) وسايق امراة في الخمسين من يدها ..وشكلها كفيفة ..
وقالت ليهو اتفضل ادخل على البيت .. ابو الاولاد بجي بعد شوية ..
قال ليها معليش انا بنتظره ..
الولد قال ليهو ..ادخل من الكلاب .. كلب كرار بعضيك ..
امه قالت ليهو اسكت ياولد ..
قال ليها لكن الكلب بعضيهو ..
المهم شرف مع اصرار المراة دخل ..
في عنقريب في ضل الغرفة القدامية .. المراة قالت ليهو اتفضل اقعد ..
ودخلت لجوة ..
بعد شوية جات البنية الصغيرة شايلة ليهو كباية عصير كركدي ..
وقالت ليهو اشرب الكركدي ..
قال انت اسمك منو؟؟ قالت ليهو انا اسمي عشوش ..
قال ليها العصير العملو منو؟ قالت ليهو عملتو انا..
قال ليها وامك؟ قالت ليهو امي مابتشوف ..
بس بتوصف لي ..تقول لي شيلي الكركدي من العلبة ..وبليهو في الكورة وصفيهو بالمصفى .. وغسلي الكباية .. وكبيهو فيها وطعميهو ..بي تلاتة ملعقات حقات سكر ..وسوطيهو ..
وبعمل الحاجات كلهن كدي ده .. ولمن يكون ابوي في ..بعمل حاجات براهو ..
قال ليها تاني ماعندك اخوان .. قالت ليهو لالا .. هسي ماعندي ..كان عندي اخت كبيرة ..وقرصها الدابي وماتت ..
وابوي كل يوم بالليل بيبكي عليها ..
بس انا بقيت كبيرة وبعمل الحاجات ..
انت جاي من وين؟
قال ليها انا جاي ضهبان ..وتايه ودخلت بيتكم بالغلط ...ما بعرف زول هنا ..
وشرب كباية العصير واداها ليها .. والبنية دخلت ..
شرف سرح مسافة .. قال في نفسه .. ياشرف .. ياود القبايل .. هسع تمشي تنكت مشكلة ليها عشرين سنة .. وتحرم الناس ديل من العايل الوحيد .. المراة كفيفة البصر .. والولد .. مسكين .. وعشوش زي الزهرة الصغيرة .. تخليهم ضايعين .. لا عائل ولامسؤول .. الراجل ربنا عاقبو عقاب عسير ياشرف ..وحياتو العايشها دلالة على
كدا .. انت عايش واخوانك في امان الله .. خلى الامور على الله ياشرف .. ..يلا اتخارج ياشرف .. وكانك ماعارف حاجة ..
وطوالي طلع .. في خشم الباب وهو مارق لاقاهو حسون ..
وسلم عليهو حق الله بق الله ..
ودخلو راجع .. قال ليهو والله انا زول ضيف .. واولادك ماقصرو اكرموني ..
وعشوش عملت لي الكركدي .. واخدت قعدتي وماشي ..
قال ليهو علي الطلاق مابتمشي ..
ادخل يازول ادخل ..
المهم الراجل اصرر . وشرف دخل عشان يشوف الراجل ده ..
حسون قال ليهو انت من وين؟ وجيت الحلة دي لمنو؟ .. قال ليهو انا سمعت بيك وجيت اتعرف عليك تشوف لي شغل ..
حسون قال ليهو يازول انت بتقطع وبتبلع في ريقك مالك؟ قول لي الحقيقة ..علي الطلاق انت بتكضب علي ..
شرف قال ليهو ياحسون انت مستعد تعرف الحقيقة .. قال ليهو قول علي الطلاق انا جبل ..
قال ليهو انا شرف ود يوسف دخيل الله ... الزول الكتلتو قبل سنوات ..
وانت ناسي انك يتمت اولادو ..وشلت حقوقو ..وخليتنا نحن عايشين عيشة اخير منها الموت ..
انا جيت مخصوص عشان اجرجرك للقانون .. واشيل منك حق اخواني ..
واقدمك للعدالة .. وعندي شهود .. واول الشهود المستعدين يشهدو ضدك اختك وزوجها ..
لكن لامن جيت وشفت اسرتك .. قلبي ماطاوعني احرمهم من مصدر رزقهم .. واسلمهم للضياع .. واخليهم بدون مسؤل .. في زمن لايرحم الضعيف والمسكين ..
وخليتك لي الله ..ربنا براهو قادر ينتقم حق ابوي واولادو ..
وبعاهدك لا اخواني لا أهلي مافي زول يعرف حاجة ..
بس حسون دنقر في الواطة وقعد يبكي وينخج ..
وقال ليهو والله والله ياولدي ..انا ابوك ماقصدت اقتلو .. والله ماعارفو عندو ازمة ..
والله لمن ابوك مات انا ندمت ندامة لايعلم بها الا الله .. ومن اليوم داك حياتي انقلبت فوق تحت ..
نحن كنا تلاتة فعلا شلنا القروش حقت ابوك ..واتقسمناها ..
وانا اشتريت مزرعة ..والجماعة ديك الاتنين ماتو ..واحد حادث والتاني فشل كلوي وفرقهم من بعض تلااتة شهور ..
وانا عشت حياتي كلها خايف ومرعوب ..
وحصلت علي مصاب وكوارث وبقيت حاسي بالموت حولي ..وولدي ضربو سحائي .. وبعت المزررعة عالجتو بي ملايين ..ونص القروش انقرضت في العلاج .. والولد مازال عيان ..
وقت قنعت منو .. وبقيت شغال في المزرعة بالايجار ..عشان مافي زول يحس اني بعت واطاتي .. بعد فترة زوجتي وقع فوقها مرق ( عود كبير يستخدم في السقف البلدي ) والمرق عمليها نزيف في العيون وتهتك في الشبكيه ..
وعالجتها بكل ماعندي ..في ظرف سنتين كل القروش انتهت .. وانا بديت اتدين ..
بعد شوية بتي الكبيرة .. عمرها 14 سنة كانت بتلقط في الحطب ضربها ثعبان .. جابوها لي في البيت ميتة ..
وده كلو بي سبب القروش الحرام الاخدناها من ابوك ..
عشان كدا والله ..مادام انت جيت ..ووصلت لغاية هنا ماتمشي ..انا لا املك غير البيت ده ..وباكر في السوق بعرض بيتي ده للبيع .. وبرحل من الحلة دي .... بمشي بسكن مع الوالدة هي ساكنة .. في حلة تانية ..
دي الحاجة الوحيدة الممكن تخفف علي الندامة .. والعذاب الانا عايش فيهو ..
شرف قال ليهو اسمع ياحاج .. انا بالنيابة عن ابوي وعن اسرتي .. عفيت عنك ..
واتنازلت من حقي .. وبوعدك اخد ليك العفو من امي واخواني ..
اها ودعتك الله و ..ربنا يعينك وكل شي بيد الله ..
ياعم حسون .. ربنا بغفر الذنوب ..نحن كمان مع شنو ؟..
وطلع طوالي ومشى على الظلط ..
وركب رجع الحلة الفيها اختو .. ونزل مشى البيت .. ولقي عم أدم منزعج جدا .. لانو ماعرفو مشى وين ..كان الواطة بالليل ..
وناداهو بعيد وكلمو ..وقال ليهو انا مشيت لحسون ..في البيت ..
وحاصل عليهو كدا كدا .. انت ليه ماكلمتني ..؟
قال ليهو الحاصل عليهو شنو ؟؟
قال ليهو الزول قرش ماعندو .. واولادو حاصل عليهم كدا كدا ..
قال ليهو والله انا الحاصل في بيتو مابهمني .. لكن المزرعة الاشتراها بقروش ابوك ..
قال ليهو قال باعها زمااااااااااااااااااان ..
وشغال فيها بالايجار ..
وشرف حكى لي عم ادم اسرار هو زاتو ماعارفها ..لانو مقاطعو سنين
قال ليهو اها شفت الانتقام الرباني .. ياشرف ..
المهم ......
شرف قال لعم ادم انا بطلب منك تكتم السر ..ومافي اي زول يعرف حاجة عن المشكلة دي .. وطلبي التاني يا عم ادم . عايز اتعرف على اختي واخليها تعرف اخوانها ..
قاليهو خلاص بكرة الصباح .. يوم التعارف .. وبعدين نشوف الفي الكتاب ..
اها هنا شرف قال ليهو انا تلفوني ده قاطع كهربا .. ليهو اربعة يوم وماعندي خبر من ناس البيت داير لي شاحن .. طوالي دخل عم ادم رسل نعمة تكوسلو شاحن ..
جابت ليهو الشاحن من صاحبتها وماعارفة شرف جا .. وماعارفة الشاحن لمنو ..
.. و ركب التلفون في الكهربا .. وفتحو .. ولقى اربعة رسايل من ياسين اخوهو ..
فعلا غريبة اربعة ..رسايل من ياسين .. ياسين بزهج من الكتابة ..لانو يدو تقيلة ..الا تكون في حاجة ضرورية ..تخليهو يرسل 4 رسايل ..
وبدا يفتح في الرسايل ..

يتبع....