السجينة

الجزء الثاني عشر

#السجينة💔💔💔
الجزء الثالث عشر......
هذا البارت راح يكون تسريع للاحداث وبيان انتقال
حياة حور من انسانة مستضعفة مسلوبة الارادة
عديمة الشخصية الى حور القوية صاحبة الارادة والشابة التي قادت حياتها نحو النور لتحقيق
ذاتها وتوثيق اسمها في الحياة............
تابعوووووووووووووووووووا،،
حور:صارت الليل وحسام ماكو كلت اكيد
راح يم جماعته يشرب لملمت البيت وقفلت
البوب هو عنده مفتاح نسخة ثانية،،طبيت
بفراشي وظليت اتفرج تلفزيون لحد مغفيت،،،،،
كعدت ع صلاة الفجر حسام بعده مجاي،،
استغفرالله ربي العظيم واتوب اليك
يعني الانسان شنو شعوره وهو يفعل المنكر
وية احب وقت لله سبحانه الله يهديك يا
حسام وتلحك ع نفسك،،رحت غسلت وتوضيت
وتوجهت للقبلة صليت وقريت قرآن،،،
توني طفيت الاضوية وطبيت بفراشي دك
تليفوني شفته حسام،،،،
الوووووو،،حسام وينك???
اختي صاحب هذا التليفون مسوي حادث
وهو حاليا بمستشفى......
حور:اتخبلت،،شنوووو زين هو شلونه،،،
والله يا اختي ما ادري طببوه للعمليات واني
شفته من سوه الحادث وصلناه اني وكم
شاب خير للمستشفى واخذت تليفونه وكلت ابلغكم،،،
حور:اشكرك خوية رحم الله والديك،،وسديته
ظليت حايرة هسة شلون اوصل لامه اي احد
النوب فجرية شيطلعني وحتى لو ردت
اروحله ما اندل،،ظليت استغفر واندعيله
ظليت ابجي شلون ياربي هسة،،رجعت دكيت ع تليفون
حسام رجع جاوبني نفس الصوت،،
الووووو،،
حور:خوية بلا زحمة عليك فدوة دك ع اي اسم
مخزون بتليفونه وخل يبلغ اهله اني زوجته
لكن بغير محافظة الله يخليك،،،
صار خوية تدللين وتوكلي ع الله ان شاءالله
بخير وهسة راح اشوف احد واردلج
خبر،،،،،
حور:تسلم،،سده وظليت انتظر،،،ورة ربع
ساعة رجع خابرني،،،،
احم،،خوية خابرت ع واحد خازنه بأسم عمي
سعد وبلغته يوصل خبر لاهله وكال
ان شاءالله مسافة الطريق،،،
حور:تسلم خوية تعبتك الله يحفظك ويحميك
ان شاءالله،،،،وسديته شبه ارتاحيت
ع الاقل مو وحده اكيد ابوية وامه هسة يروحون
للمستشفى،،،،
ظليت كاعدة ما اخذت عيني نوم جفلت ع
صوت التليفون شفته رقم حسام،،،
الوووووو،
تغريد:سامحيني فدوة هاي حوبتج ضيعت
ولدي ماعندي احد بعد فدوة حاللي ووهبي
حالته خطرة فدوة اروحلج ،،،،
حور:ظليت صافنة ودموعي تنزل صح جنت
دوم اتحسب ع الظلمني بس من صار هذا
الوقف تندمت ظليت بداخلي استغفر
ربي سامحني ابد مجنت اتمنى اشوفهم هيج
امه تتوسل بيه وحسام بين الحياة والموت
وتغريد الي جانت تكول نعالي اعلى من
مستواج هسة تتوسل هيج اووووووف
استغفرالله،،،
تغريد:الوووو حور وياية،،،
حور:بتعب وياج خالة وياج،،،يلة مع السلامة
سديته وظليت كاعدة وع كعدتي غفيت
ع القنفة وكعدت ع صوت التليفون باوعت
ساعة10الصبح،،الووووووو،،
تغريد:تشهك بالبجي،،،حور،،،
حور:لزمني كلبي ع صوتهة و وضعهة كلت
مات،،،،
تغريد:حور،،حسام كصوا رجليه ثنينهن وهسة
نايم بس رادج تجين للمستشفى،،،
حور:بس خالة ،،،،
تغريد:ادري لاتخافين ابوج وكامت تشهك
مكال شي بس تعاي فدوة حالته خطرة
بلكت اذا شافج يتحسن وضعه،،،،
حور:يس اني ما اندل،،،
تغريد:هسة ابوج راح يدزلج السايق ابو علي
تذكريه،،،
حور:اي اذكره ماشي هسة اتحضر واجي،،،
بدلت لبست صايتي والحجاب وكعدت
انتظر ابو علي،،رجال جبير يطلع بكصت
ابوية عنده تكسي كلما جانت تغريد اوبتهة
يريدون يطلعون هو ياخذهم وجان ياخذني
خط بالمدرسة،،،،،اجة طلعتله سلمت علية
وتوجهنة للمستشفى وصلت للردهة
الي هو بيهة ابوية شافني ظل صافن
بوجهي معرفت افسر نظرته نزل راسه
وفات من يمي وطلع تغريد حالهة يبجي
اول مشافتني ركضت علية حضنتني وتبحي،،،
تغريد:فدوة سامحي وسامحيني فدوة
جهالي ضاعوا من ايدي بلكن حسام يلحك
يعيش،،،،
حور:ظليت مستغربة من حجيهة،،ليش
رقية شبيهة????
تغريد:رقية اووووووف يارقية،،،باوعت طلع
الدكتور من غرفة حسام ركضت عليه
بشر دكتور فدوة،،،،
الدكتور:والله يا اختي اصبري وادعيله هو
هسة بس بحاجة دعائج،،حالته معدت الخطر
بس طلب يشوفج،،،وحاولي لاتعبيه بالحجي
تغريد:ان شاءالله،،انداريت ع حور،،هسة اجيج
طبيت للغرفة حولته للخاص حتى يعتنون بيه
واله غرفة خاصة بيه،،،من طبيت رفع
راسه،،،صاح حور،،،هاي اني يمة
شلونك هسة،،،
حسام:بصوت تعبان وين حور يمة???
تغريد:ارتاح يمة حور موجودة هسة اجتي،،،
حسام:صيحيهة اريد احجي وياها،،،،
حور:طلعت تغريد كالن يريدج،،سميت بأسم
الله وطبيت تفاجأت بشكله،راسه كله ملفوف
وايده هم ملفوفه ونص وجهة متشكك
وعبالك محروك،ظليت واكفة بمكاني،،،
حسام:تعالي كعدي لاتخافين،،،
حور:تقربت والدموع بعيني،،مخايفة،،بس
حسام:بس شنووو،،هاج شوفي ربج اخذ
حكج وزايد،،،،
حور:نزلت دموعي،،استغفرالله،،اني مااتشمت
ابشر،ولا اكول حوبتي،،،
حسام:كمت ابجي لا كوليهة،لان صدك هاي
حوبتج،،،حوبتج متعدتني لا اني ولامي ولارقية
حور:ان شاءالله مابيك شي ازمة وتعدي
حسام:ضحكت والدموع تنزل شتعدي
هاج شوفي رجلية انكصت وصرت مقعد
وتك ايد انشلت،،،
حور:واذا مو نهاية العالم مدام كلبك ينبض
وبيك حياة قوي نفسك واستغفر مدام رب
العالمين ناطيك مجال وفرصة،،،
حسام:حور سامحيني ع كل الي سويته
ما ادري لبش سويت كل هذا حتى من عقدت
عليج جنت احاول اكفر ولو جزء من ذنبي
مردتج تنقتلين وانتي بريئة،،،،
حور:مسامحتك حسام وربك ان شاءالله
يسامحك،،،
حسام:تدرين رقية الي باكت امي وعمي
سعد????
حور:بصدمة،،شنوووووو واني عبالي
كذب هاي مجرد حجاية ذبيتوهة علية،،،
حسام:اني هم مثلج عبالي تكملة اللعبة
بس طلع صدك فلوس ابوج وذهب امي
وطلعت اختي الي باكته،،،،
حور:وشلون عرفت????
حسام:حجيت لحور كلشي بالتفصيل،،،
شفتي مو كتلج رب العالمين اخذ حقج منه،،،
حور:بداخلي ونعم بالله،،تذكرت شكد جنت
استنجد بيهم بالبيت من جانوا يأذوني ويحركون
ابوية علية لحد يوم الحادث وجانت تجي
ابالي بس جملة وحدة،،ان الدنيا ادور
ورب العالمين ميترك حق مظلوم واني
انظلمت هواية ع ايدهم بس مجنت متوقعة
هيج سبحانك يا الهي سامحني ان ظنيت
بيوم ان حقي مأكول وانك ناسي عبدتك،،،
رجعت باوعت لحسام كتله،،،
حسام ناوي تكتم سرك للابد???
حسام:بجيت لا مستحيل،،ابوج عرف كلشي
عرف ان انتي مظلومة وانج انظف واطهر
انسانة ع وجه الارض،،،
حور:من كلي هيج حسام صدك فرحت ونزلت
دموعي فرح واخيرا رب العالمين نضفج
يا حور وهسة ابوية عرف اني مظلومة
من هذا شافني قبل شوية نزل راسه ومشى
عفت حسام وطلعت،،تلكتني تغريد
تغريد:هاااا شلونه،،،
حور:ما ادري،،،رجعت كعدت تبجي وادك
ع رجلهة،،،
حور:خالة رقية وين???
تغريد:استغربت من سؤالي،،ونصت راسهة
ابوج دزهة لعمامهة،،ومناك عمامهة يشوفون
الولد وبعدين ما ادري شراح يصير،،،،
حور:ظليت بالمستشفى صار الليل جنة كاعدين
بالممر ع الكراسي اني وتغريد وابوية
بس ابد محجة شي وياية جان كاعد بعيد
عنه،،اجة الدكتور يجيك وضعه ورة شوية
طلع وهم نفس حجيه تن وضعه كلش تعبان
الي عرفته سبب الحادث ان ضغطه صاعد
كلش وضاربته جلطة وفاقد السيطرة ع
السيارة ومكلوبة بيه رجله جانت كلش متأذية
الكشن الامامي مطبوك طبك ع رجله وصار
عنده نزف متوقف الا يبترون رجليه،،
ايده اليسرى انضرب العصب ومات وانشلت
ماعدا الرضوض والجروح بسبب الجام مال
السيارة وحاليا عنده خثرة بالدماغ اثر
الجلطة ومديكدرون يسون شي بسبب وضعه
الصحي،،كلش انقهرت وحزت بكلبي
مردت اشوفهم بهيج حالة،،،،
فزيت ع صوت الممرضة،،الحك دكتور
المريض صتر عنده نزيف داخلي،،،
حور:انصدمت مستحيل يموت دخيلك ربي
شلون وهو كضاها شرب وتارك الصلاة
ومخال شي موزين يعتب عليه،،،امه
انهارت و وكعت ظلت تملخ بروحه ادري
بيهة تحبهم كلش اكثر من نفسهة،،،،مرت
دقائق كأنهة ساعات طلع الدكتور يفرك
بوجهة ركضنة علية،،،مردد غير عبارة وحدة
البقاء لله،،
هنا الكل دخل بصدمة بلحظة راح هسة
جان يحجي وياية تغريد صارت مثل المخبلة
صدى صراخهة ملى الردهة والعالم كلهة
تباوع عليهة الي يبجي والي يكول
حرامات بعده بعز شبابه،،والي يكول الله
يتقبله برحمته،،،واني واكفة وصافنة
وتغريد تضرب بالكاع،،،
تغريد:يمممممممة وليدي وين رحت وعفتني
بعدني ماشبعت منك يمة عكبك منو راح
يشيل تابوتي ويهل تراب عليه،،،
منو يوكف ع كبري يمممممممة،،،ولك يمة
ريتني اني نمت هالنومة يا بعد امك واهلهة
ليش ربي حرمتني منه،،فدواتك ربي مو
هيج اووووووف بيدي ضيعتكم بيدي
حور:بجيت ع حالهة وكمت تلطم وتضرب بأيدهة
رحت يمهة كومتهة لحيلهة،،طلعوا ع السدية
ومغطين وجهة،،موقف رهيب تقشعر
اله الابدان ودعته بداخلي وسامحته،،،،
روح يا حسام يا ابن تغريد حللتك و وهبتك
مسامح وان شاءالله الرحمن الرحيم يخفف
عنك،،،بس تغريد نامت علية ورفعت راسه
بحضنهة وكشفت الغطة عنه وظلت تبوس
بيه وتلعب بشعره وتسرح شعره بأيده
مثل الطفل،،كمت ابجي لبجيهة وبالكوة
جريتهة منه،،،،
سعد:اخذيهة ابو علي بالباب روحوا للبيت
تغريد:وين اروح وابني شلون،،،
سعد:روحي تغريد عمامه بالطريق هسة
نكمل الاجراءات ونجيب للبيت،،،،
حور:رجعنة للبيت وتغريد ابد مسكتت صارت
مثل المخبلة تحجي وية نفسهة وتضحك
وكامت تسولفلي ع حسام من جان صغير
ورة ساعة اندكت الباب طلعت للطرمة
فتحتهة رقية و وياها نسوان،ومرة جبيرة
بالعمر،،،سلموا وطببتهم جوة وعرفتهم عن نفسي
الي عرفته منهم عماته ونسوان عمه وبيبيته
ورقية ساكتة بس دموع،،،،اول مشافتهة
تغريد تخبلت رادت تكتلهة لزمتهة وظليت
اهدي بيهة،،،،
المرة الجبيرة:اوووووف منج يا تغريد لج
شفني شسويتي بجهالج واحد لفته الكبور
وهالفاجرة شدعي عليج لج حرمتيني منهم
وخليتي كلبي يتلوع ع شوفتهم جنت
اتوسل بيج اكلج اشم بيهم ريحة الغالي
وانتي ابد قسيتي وقسيتيهم علينة شفتي
هسة شلون الضنى غالي اليوم يلة
سمحتي اشوفهم بعد ما ضاع الاول والتالي
لج الله ينتقم منج يا تغريد عساج بنار
اكبر واكبر بعد،،،
وراها هم طبت وجبة مال نسوان عرفت
هذني خواتهة وامهة لان كابلنهة ويبجن
وصارت هوسة عماته وبيبيته يذبن حجي
وخالاته وبيبته مسكتن اني عفتهم ورحت للمطبخ
شفت رقية تتلفت مثل الحرامية وتنزل من
الدرج وشايلة جنطة،،عزة بعينهة ولا
عبالك اخوهة توة ميت،،،،
صارت بوجهي،،انتي هم الج عين بعد
كل الي سويتي وهم رجعتي تبوكين
لا وفوكاها اخوج توة متوفي لج انتي شنوووو
من ملة،،،،
رقية:انتي مالج دخل اني واكعة بمشكلة
اذا ما اخلص نفسي يذبحوني،،،
حور:عفتهة ومشيت مالي دخل بيهة وهي
طلعت من البيت،،ورة ساعات جابوا الجنازة
للبيت وتغريد ملخت روحهة وخطية
عماته وبيبيته هم وتخربطت وراها راحوا
للدفن،،،صبح ثاني يوم كعدت احضر
ريوك لكيت عمامه يم ابوية بالهول ديتناقشون
وابوية صاير عصبي جتي تغريد للمطبخ
كايدتهة اختهة،،،كعدتهة وهي ع بجية وحدة
سمعتهة تحجي برقية،،،،
ولج تغريد بتج لازمهة ابن عمهة مهزومة
وية واحد،،،،
تغريد:بكل برود طبهة طوب لوما بلوتهة
جان هسة وليدي بطوله الحلو كبال عيني
حور:من يمي خفت هاي شراح يكون مصيرهة
ومبين عمامهة ملتزمين وكلش صارمين
ومبين كلش محافظين من لبس بناتهم ونسوانهم،،،،
مرت الايام واني ظليت ابيت ابوية لزمت عدة
ابد ما اطلع علاقتي بأبوية مثل قبل
منتحاجى ولا يطلب شي مني اكعد الصبح
انظف البيت احضر الغدة نتغدى اني وتغريد
وراها اطب لغرفتي نفسهة القديمة ومن
يرجع من شغله احضرله الاكل ع الميز
وهو يكعد بدون ميحجي شي،،،اني حزت
بنفسي بعده ع موقفه حتى بعد ماعرف
ان اني مظلومة،،،،مرت 5اشهر ع وفاة
حسام وماكو شي جديد الى ان بيوم وصلنة
خبر وفاة رقية،،بعد ما انهزمت بيوم وفاة
حسام ابن عمهة لازمهة و رجعهة وياه
ورة ايام عاقد عليهة ومزوجهة و3مرات
حاولت تنهزم ويرجعهة الى ان بيوم هم
سوت هوسة وجانت تهددهم احرك روحي
وشايلة الجولة ودايرة نفط ع روحهة
وصارت قريب التنور و وجت بيهة النار
ظلت اسبوع تعالج بالمستشفى ورادت
نشوف تغريد بس تغريد مقابلة تروح،،،
وتغريد جانت كلش باردة ولاعبالك بتهة
بس كالت هاي هي من ايديهة وعافتنة وكامت
واني قررت احجي وية ابوية ع السنة الجاية
اكمل دراستي لوما الظروف جان اني هسة
داخلة الجامعة،،يلة الحمدلله ع حال،،،
ابوية رجع يحجي وياية تحسن من الاول
بس ابد مفتح وياية اي موضوع قديم
وهو بلغني ان ارجع اكمل دراستي وصارت
معاملته حلوة وياية حتى مو مثل قبل
ميصير الحادث وبدة يهتم بيه وينطيني
مصرف وخلالي مدرسين للسادس يعني
تغير180درجة،،اما تغريد فاصلة عن العالم
كلما تشوفني تبجي وتكلي سامحي
ويومهة كله تكضي بغرفة حسام،،ابوية
ابد محجة وية تغريد ومرة من المرات اجة
عليهة وبلغهة ان هو راح يطلكهة ويدزهة
لاهلهة وبالفعل ثاني يوم اجتي اختهة
وامهة اخذوهة ورة اسبوع ابوية كلي
طلكت تغريد اني محجيت شي ولا ادخلت
بعد مرور شهرين من طلاكه من تغريد
جنة طالعين للسوك اشتري ملابس لادوام
مباقي شي للمدارس وتبدي شفت ست هناء
وظلينة متحاضنين ونبجي وابوية واكف ع
صفحة هي ظلت عينهة تتنقل بيني وبين ابوية
وبنظراتهة الف سؤال عاد اني استأذنت
من ابوية ان تزورني ست هناء و وافق
شفت ابوية ظل صافن عليهة ومرفع نضره
منهة،،،اني ضحكت بداخلي كلت هسة
كم يوم ويكلي اريد ازوج،،،،ومرت ايام
وصارت ست هناء تزورني بالبيت وتعجبت
من الي صار وكالت قصتج مال فلم هندي
وهاي ايامي مرت عادية لاجديد حصرت نفسي
بالدراسة ومشغلت نفسي بشي ثاني،،،،
والنفس كالزهر أن شح ماؤها ....
في البرية انبتت شوكا...
وفي الماء العذب ...
ترقد الزنابق بلا اشواك ...
يتببببببببببببببببببببببببببع،،،،،،،،