ماذنبي انا

19-20

#قصصي
#ماذنبي_انا
البارت 19

طلعت بوجهي للزيارة لزمت شباك الكاظم وابجي على نفسي ليش هيج تدمرت حياتي كنت متأمل بعد ماتولد اخذها اسفرها واحاول اقنعها تبقى وياي وحتى اطلع من بيت ابوي واروح اسكن ببغداد .بس ضاع كل شي

فاديه... اخر لقاء بيننا اذاني حيل حسيت بمشاعره صادقه بس ماكدر اتقبله انا اصلآ ماحبيته من دخل حياتي وانا اخسر واتأذى
مشت الايام بعد طلاقي وصحتي بدت تتحسن بقى تواصلنا بسرمد.وانطيت زينه رقم اختها سارة وبينهم اتصال
صرت بشهري السابع من الحمل وسرمد يوميه يتصل ويقنع ابوي ان نطلع من العراق لتركيا ونقدم لجوء ونستخدم محضر الشرطة اللي سجلنا بيوم هجمو اهل احمد ونستخدم تقرير الطبيب مالتي والشكوة اللي قدمناها وبعد الحاح واصر سرمد اني اطلع من العراق قبل لا اولد ويتمسك بالطفله .
بدينا باجراءات السفر خواتي المتزوجات كالو روحو وخلصو منهم مادام بينكم طفل ماراح يتركوكم وبلشنا نبيع اغراض البيت واشتغلنا بسريه تامه خاف يعرفون ويسببولنا مشكله
بقى موضوع بيع البيت .بابا عرضه بمكتب ووضح له الظروف الرجال اشتراه من عندنا لان كان سعر مناسب جدآ
طلعنا لبغداد بقينا يومين ودعنا اهلنا واخواتي
كنا مستقرين ببيت عمي ابو كرار
ثاني يوم العصر كنت بالمطبخ واجاني كرار
اكدر احجي وياج
تفضل
فاديه انت تدرين بي احبج من قبل لاتتزوجين واعرف ظروف زواجج وكبرتي بعيني من ضحيتي لاجل ابن اختج
انا بعدني احبج ورايدج ومنتظر منج بس كلمة
...كرار انت ابن عمي واي بنيه تتمناك بس انا خلصت حياتي ماريد لا اتزوج ولا ارتبط برجال وراح تصير عندي بنيه اريد اربيها
تركته وطلعت ..كلبي خلصان من القهر لا اريد زواج ولا شي
سافرنا لتركيا وسرمد مرتب امورنا لان اله معارف هناك شويه شويه بدت حياتنا تترتب وقدمنا ع اللجوء واللي عرفته ان السالفه تطول على مايقبلون الطلب
ماسكنا باسطنبول لان غاليه وبابا فتح له مشروع صغير تشارك هو ورجال تركي يعرفه سرمد وبدت امورنا الماديه تستقر
وصار يوم ولادتي والحمد لله ولدت بصورة طبيعيه من شفت بنتي بيد امي قلبي فرفح عليها حضنتها ودموعي تنزل اباع لامي واكول هاي بنتي الي ..ماما قطعة من قلبي بيدي هسه
شكد كنت ماريدها ومرات اكول المن حبلت اذا سبب الحمل راح ومات .بس من حضنتها تعلقت بروحي بابا اخذها كبر باذنها
...ماما راح اسميها فرح مويكولون لكل امرء من اسمه نصيب اريد يصير نصيبها الفرح والسعادة
ان شاء الله امي
طلعت للبيت وماما تعلمني عليها وتساعدني وشويه شويه صرت اعتمد على نفسي .حياتي كلها صارت لبنتي حاولت اقنع ابوي اشتغل لكن رفض وكال انا موجود وشتحتاجين تاخذي مني
نسيت احمد واللي سواه بي وكل شي نسيت تفكيري بس ببنتي
احمد....
بعد طلاق فاديه تعبت وكرهت نفسي دمرت اثنين بنات وهن بعز شبابهن ودمرت نفسي وياهن بقيت فترة طويله بكآبه وما اطلع من البيت وبس جكاير .صديقي مظفر حاول هواي يطلعني من اللي انا بي
بديت اطلع اكعد بالكوفي اللي بالمنطقه .
اللي صار اني تعرفت على شله اخلاقهم تعبانه بديت اطلع واسهر وياهم اغواني الشيطان وصرت ابرر لنفسي ان اللي اسوي هو حتى انسى
بيوم كنت طالع للشله اللي تعرفت عليهم واجة وياي صديقي مظفر كان يحجي عليه ومو عاجبه اختلاطي بيهم راح وياي وكانت كعدة ببيت واحد منهم سوالف وضحك ولعب وكان اكو شرب .مظفر شاف الوضعيه قلب وجهة وكل شويه كال هاي انت هاي تاليها كعداتك
ورى شويه جابو بنات وشغلو اغاني ومظفر تخبل وكام يجر بيه جر ويصيح عليه ولك نوب الحرام ولك نوب نكاسه هاي انت هيج تصير احمد اصحة على نفسك وين رايح ليا صخام ولك كعدات شرب ونسوان ساقطه ولك ماتخاف عذاب ربك  عندك عرض بلبيت ماتخاف عليه
سحب مني سويج السيارة دخلني للسيارة وصلني لبيتنا وراح
صعدت غرفتي ورة دقايق دكت الباب اختي سارة
شعندج
سارة..بقيت ابجي
شكو شصاير
انت شبيك احمد شجاك ياخذك الليل ويجيبك النهار ناسي عندك اهل وشغل من يوم طلكت مرتك وانت بغير عالم
عندك علم صار موعد ولادة بنتك وفات
تدري بنتك وين ؟ سألت عنها عرفت صارت اجت للدنيا
احمد.. كلام مظفر سطرني ومنا سارة حسيت اني كنت مغيب عن الدنيا
احمد.. طلعي خليني ارتاح
ارتاح   ارتاح كلش  بس لعلمك مرتك واهلها مو هنا باعو البيت ومدري وين راحو
شلووون
مثل ماسمعت
شمدريج
اليوم رحت لهم للبيت العصر وطلعو ناس غيرهم مشترين البيت اتصلت بفاديه مغلق راسلتها واتس اب ماكو
احمد ...كعدت بالكاع هاي وين راحت شلون هيج انا غبي ابتعدت عنها وما سألت
ثاني يوم من الصبح رحت لبيتهم الرجال اللي كاعد بي كال اشتريته من ٣ اشهر
سافرت لاهلها ببغداد ياهو اللي اروح له يكول مانعرف عنهم شي .تخبلت وين اروح سافرت وهي حامل بنتي ببطنها ياربي شلون شسوي ماظل واحد ما سألته حتى رحت للمدرسه وكالو مااخذت وثيقتها عشت ايام سودة كل اللي يعرفون سالفتي يلوموني يكولولي زين ومنها ضحت بنفسها وتزوجتك بعد ماماتت اختها وانت هيج تجازيها
بقيت ٣ اشهر ادور وماكو خبر عنها تخبلت ردت اموت
سارة..احمد خويه كافي راح تموت ربك مايرضى هيج تاذي نفسك
..وين راحت ماظل احد ماسألته عنها
احمد انا اكدر اعرف لك وين هي بس اخاف اكول لك
شلون تعرفين
اوعدني ماتطكني مثل ماطكيت فاديه
ولج احجي عطت بيها
انا انا ااا
احجي بسرعه
انا اعرف رقم زينه وهي اكيد تعرفهم
لزمتها من ايدها عصرتها حيل ..غطت وجهها بيدها الثانيه فدوة اروح لك لاتضرب
دفعتها ولي من وجهي
كعدت يم رجلي بس اسمعني .انا اعرفك تحبها وعندك بنيه منها عوف الدنيا عوف هاي العالم اهم شي بنتك خلي اجيب لك عنوانها وروح لها بلكي تقبل ترجع لك
امشي ولي
سارة..بقى احمد يومين تعبان ماكدرت اصبر اجيت له احمد خويه بداعه العزاز بس اسمع مني شوف الناس اللي يحب شيسوون علمود اللي يحبونها شفت اخوها شسوة مانكول هو صح بس شوف ماترك اللي يريدها
خزرتها وكلت كومي ولي لا اكسرج
نطيته ورقه خويه مرتك بتركيا واتصرف بعقل بلا عصبيه هذا عنوانها
احمد..فتحت الورقه وقريت العنوان بلهفه سألت سارة منين جبتي
سارة.. من زينه والله يخليك عوف كل شي كل شييي فكر بنفسك وبنتك وين حمودي المرتب الانيق شوف روحك اول تالي انت لحيتك مخربطة وشعرك هذا
انت ابو الاناقه والترتيب صاير كله لابس تراك ..كانت فاديه تكول يعجبني القميص على احمد اكثر من التيشرت خل تجي تشوفك
من كالت هيج سارة فز كلبي فاديه تنظر لي نظرة اعجاب معقوله تكون بيوم حست بشي تجاهي .ههه شنو الفايدة حتى لو حست انا بتصرفاتي خليتها تكرهني
قررت اترك كل شي وراي اروح لها .حضرت امور السفر ورحت لتركيا للعنوان