~ Siapa Durang ~
By : Tescy Descy
Real Story
~ Part 2 ~
Jadi kan, tu malam dia, kami sudah aga jam barapa main wayang hantu-hantu, alahhh.. wayang hantu-hantu indon sama malayu saja bah. Sebelum mula wayang, kami dua ni kan pigi dulu masak awal-awal, siap masak kami pigi mandi. Ada dua kan tampat mandi, jadi kami tidak lah bah barabut mandi.
Siap kami mandi, kami pakai baju baru kami pigi makan. Capat-capat kami makan takut ketinggalan tu wayang saja bah. Siap kami makan, sudah kami cuci piring masing-masing, aunti sia pigi angkat tilam basar mau ampai di ruang tamu bikin baring-baring kunun.
Bulum lagi mula tu wayang, aunti sia ba-gayut lagi sama anak wagu dia di bilik, sia pula siap sedia sudah duduk dapan tb (tv) sambil main game. Mula saja tu wayang, sia tutup sudah game sia, sia duduk sudah bagus-bagus sambil paluk bantal.
“cilyn, mula sudah wayang.” (sia panggil aunti sia)
“okey.. okey.. jap.” (bilang aunti sia dari bilik)
“cilyn, macam wayang hantu-hantu thailand pula ni malam.”
“ya kah? Jap ah.”
Sia kasi biar saja aunti sia kasi habis cakap dia sama anak wagu dia. Sia pigi duduk di tilam sambil duduk ba-sandar di kaki sofa. Siap saja aunti sia ba-gayut sama anak wagu dia, aunti sia pigi ikut sia duduk di tilam. Masa ni waktu malam ahh, dalam jam 9 macam tu lah kalau sia tidak hilang ingatan.
Okey, siuk sudah kami dua ni tingu tu hantu-hantu, aunti sia sambil tingu tu tb (tv) kan sambil dia tutup saparu saja muka dia sama selimut. Masa kami tingu tb tu kan kami tutup lampu, kami tingu tb dalam galap-galap saja, kami tutup semua lampu, alahh.. surang trip-trip kunun kami tingu wayang dalam panggung bah kunun.
Tiba-tiba kan, channel yang kami tingu tu kan tetukar. Terus sia tingu aunti sia, aunti sia pun tingu sia. Kami cari-cari remot tb di tilam, sampai kami buang-buang lagi tu bantal mau cari remot saja, tapi kan, mimang tiada bah di tilam.
“aikkk.. mana remot tek?.” (aunti sia tanya sia)
“aikkk.. tiada pun tampat sia.” (sambil sia cari-cari tu remot)
“tekkk...!!!.”
Ta-kajut sia bah tiba-tiba aunti sia teriak sia. Sia tingu aunti sia, dia tingu arah sofa. Sia pun ikut lah tingu tu sofa. Terus teduduk saja sia kama. Kamu mau tau kanapa? Astagaaaa.. tu remot kan, ampai-ampai di tepi tu sofa bah, yang bahagian panghadang tu sofa bah.
Ampai-ampai bah di atas tu sofa, tidak kamu heran? Yang kami dua heran kan, tu channel pandai tetukar sendiri. Aunti sia tingu sia, sia senyum paksa saja sebab masi ta-kajut bah nampak tu remot. Aunti sia tulak-tulak sia suruh ambil tu remot.
“tek, ambil tu?.”
“kanapa tu remot ada sana tu?.” (sia tanya aunti sia)
“mana sia tau.” (bilang aunti sia)
“astagaaa.. jadi napa tu channel tu tetukar sendiri?.”
“ishhh.. kali tu channel sendiri kali tetukar.” (bilang aunti sia)
“ohhh.. ya kan.”
Sia buat tidak tau saja, sia anggap saja tu piring astro kana tiup angin sampai tiba-tiba tetukar channel lah kan. Jadi kan, kami sambung lagi tingu tu wayang hantu-hantu, aunti sia ni macam tidak sinang hati sudah mau tingu tb, tapi sia diam-diam saja sambil buat tidak tau. Ni kali tu remot sia simpan di lantai sebelah sia tidur.
Tidak lama kan, tetukar lagi tu channel, punya main laju kami dua tingu tu remot. Ba-karas bah kami dua tingu tu remot. Kitai butul, macam mana pula buli tetukar sendiri maka tiada pun kami tukar. Last-last kan, aunti sia bediri pigi pasang lampu sana master room sama di dapur baru aunti sia pigi duduk balik di tilam.
“ishhh.. sumarat (takut) sudah sia ohh.. tek.” (bilang aunti sia)
“jadi? Kau mau tingu lagi kah sampai habis?.”
“ishhh.. tidak lah. Bisuk-biusk lah kita tingu, ada ulangan juga tu kan.”
“bahhh.. sia tutup lah ni tb.”
“bah.”
Aunti sia pigi baring di tilam, sia pigi tutup tb dulu baru sia pigi baring. Kami diam-diam saja sambil tingu siling sambil tingu tu kipas siling pusing-pusing. Lama-lama kami tetidur juga sampai pagi bah. Bila kami sudah bangun baru kami becerita balik apa yang jadi sa-malam.
Skip k, limpas barapa hari dari malam yang tu channel tetukar sendiri, ni kali kan siang-siang ni kami tingu tb, lupa sudah apa wayang kami tingu tu tapi bukan hantu-hantu lah. Masa tu kan macam patang-patang dalam jam 1 atau 2 patang kali tu.
Masa ni kan kami tingu tb sambil becerita sambil juga katawa-katawa, kami tidak juga ta-lampau fokus mau tingu tu tb, kami dua be-gosip kunun bah tapi sambil juga tu mata pandai silik-silik (tingu-tingu) tu tb. Masa tu kami dua duduk-duduk di sofa, tu remot di sebelah aunti sia, sia duduk di sofa sambil macam baring-baring juga bah.
Sedang kami terbahak-bahak lagi katawa tu kan, tiba-tiba tu channel tb kana tukar. Terus sia pusing tingu aunti sia, aunti sia pun tingu sia. Sia tingu tu remot ampai-ampai di tepi tu sofa di balakang aunti sia duduk juga bah, aunti sia pusing tingu balakang dia, melumpat saja aunti sia pigi dakat sia.
“aduiiiii.. tek siapa lagi pigi tukar tu?.” (aunti sia tanya sia)
“mana sia tau. Di balakang kau saja pun tu remot.”
“sial lah. Siang-siang pun ada mau kacau kah ni?.” (bilang aunti sia)
“isshhh.. kali ada masalah kali tu tb tu.”
Saja sia mau kasi sinang-sinang hati aunti sia maka sia pun mau tanya juga dah siapa juga gatal tangan mau pigi kacau tu remot sedangkan dalam tu rumah kami dua urang saja kama. Aunti sia tukar lagi tu channel yang mula-mula kami tingu. Kami diam-diam saja sambil tingu tu remot, tidak sudah mau tetukar tu channel, kami sambung lagi becerita.
“tekkkkk...” (punya kuat aunti sia teriak. Kitai sikit sia tuli hahahaha)
“tidak buli jadi ni.” (sia bilang dalam hati)
“aduiii.. tek..”
Sia buli nampak muka aunti sia macam takut. Sia ambil tu remot kan, sia tukar lagi balik tu channel, lapas tu kan sia simpan tu remot sana atas sofa kici di dapan kami saja tu remot. Kami diam-diam saja tingu tu remot sambil tingu tb sambil juga kami diam-diam.
Tiba-tiba kan, buat kali ke-3 kana tukar lagi tu channel, apa lagi sia sama aunti sia ni, kami terus tutup tu tb bah. Dari pada kami kana sarangan darah tinggi bagus kami tutup tu tb, ba-tabiat butul bah tu tb, siapa tidak panas hati ada yang mau kasi main-main kami.
Okey skip lagi. Ni kali masuk sudah tahun 2014, dalam bulan 1, masa ni pun sia sama aunti sia masi lagi tanam kubis di rumah. Sia jarang sudah pigi mansau sana rumah kawan sia di block G, pasal ada sudah kawan sia punya kawan di rumah, ada adik ipar tu kawan sia ikut tinggal sana jadi sia malu lah bah ni mau pigi minta makan free sana tampat kawan sia biar pun balik-balik juga ni kawan sia call suruh pigi kawan tampat dia.
Masa ni sia tau sudah bff sia dari kici pun tinggal dalam tu perumahan juga, sa-balah block tampat sia tinggal saja. Lapas sia tau ni bff sia tinggal sana, apa lagi, malam-malam kami lepak sana taman permainan tampat sia nampak tu perempuan panjang rambut tu.
Hampir tiap hari lah bah kami ni buang tebiat duduk-duduk di taman malam-malam, kami lagi ni perempuan, barani butul dua-dua lepak sana. Masa ni aunti sia pun selalu sudah keluar malam ikut kawan dia pigi tingu main singa, masa tu mau tahun baru cina sudah bah, jadi kawan aunti sia ni pemain singa, malam-malam dia kana ambil, sia ni malas mau ikut jadi sia pigi lah bah lepak-lepak sama bff sia.
~ Bersambung ~
