~ Siapa Durang ~
By : Tescy Descy
Real Story
Ni cerita ni sia sendiri yang alami kio, barapa tahun yang lalu lagi ni. Masa tu tahun 2013, macam bulan 10 ni kejadian kalau tidak silap ni ingatan mau ingat lah hehehe.. dalam ni cerita ada beberapa kisa dan kejadian yang jadi sama sia dalam tahun 2013, dan 1 kisa terjadi pada tahun 2014.
Ada juga 1 kisa cerita yang bukan sia alami tapi sia kana cerita sama urang yang perna kana kacau sana rumah dia sendiri juga. Ni cerita ni jadi di kawasan yang sama juga cuma tampat yang berbeza, maksudnya dalam perumahan yang sama juga.
Memandangkan ni cerita ada panjang-panjang juga sikit, jadi sia tepaksa kasi part-part lah. Jangan riasu, tidak juga panjang ni part dia. Apa-apa pun thanks sebab setia follow cerita-cerita dari sia biar pun tidak best macam cerita penulis-penulis yang pakar dan pandai mangarang.
~ Part 1 ~
Okey, masa tu sia tinggal sana rumah pangkat aunti sia a.k.a geng kodou (karas) sia. Dulu sebelum sia tau bff sia dari kici ni tinggal sebelah block tampat sia sama pangkat aunti sia ni tinggal, sia ada 1 lagi kawan baik tampat sia selalu pigi melepak kalau busan-busan.
Tampat kami tinggal ni perumahan flat, block-block setiap flat ikut huruf, dari A-V saja kali tu. Jadi kan, sia ni stay di block M, tampat sia selalu lepak-lepak kalau busan dulu sana block G, macam jauh saja kalau di tingu kan, sebenarnya tidak pun jauh, barapa selang saja block mau limpas bah.
Okey cerita dia macam ni, cerita pertama lah kan. Kalau dari block M mau pigi block G ni kan mau limpas taman permainan yang ada dakat-dakat sana saja. Ni taman permainan ni ada di tanga-tanga tu laluan tampat sia mau limpas pigi block G, kira di dapan block G juga bah ni taman permainan ni.
1 malam ni kan, sia busan bah di rumah, tapi sia jarang jalan kalau siang, sia selalu jalan waktu patang atau malam pasal kawan sia di block G ni patang-patang baru ada di rumah. Kawan perempuan juga bah ni, dia tinggal sama tunang dia bah ni tapi ni kawan sia ni masa ni dia 1 urang saja di rumah, tunang dia karaja di laut, tu rumah tu, rumah kakak tunang kawan sia tapi durang bagi sama tunang kawan sia ni, kira jadi hak milik kawan sia sama tunang dia lah tu rumah.
Ni kawan sia suka bah suruh-suruh sia datang rumah dia pasal dia pun tiada kawan, dia busan 1 urang di rumah. Asal sia pigi rumah ni kawan sia kan mimang sia kanyang saja, suka masak-masak bah ni kawan sia ni, jadi sia kana panggil pigi makan saja mana tidak kanyang saja. Sia pulang rumah sana block M mau tanga malam sudah, perna juga mau subuh jam 3 sia pulang rumah gara-gara siuk tingu movei kuria.
1 malam ni, sia pigi lah bah tampat kawan sia ni, awal lagi sia jalan masa tu, masi siang-siang lagi bah, ngam-ngam masa tu kawan sia off day, dia tidak pigi kerja tapi dia ada urusan lah mau pigi urus masa yang pagi-pagi, jam 3 patang lagi dia sudah call suruh pigi rumah dia.
Sia sampai rumah ni kawan sia, tu kawan sia ada bili pizza sama kfc, kami makan sambil tingu dvd, ada kawan sia bili dvd baru, dvd hantu-hantu lagi tu. Movei hantu-hantu urang putih sama jipun, lupa sudah sia apa tajuk dia lah. Kalau tidak silap sia, ada dalam 5 dvd kawan sia bili.
Kami tidak sadar kami buli kasi habis tingu semua tu dvd kama, sampai dunia di luar pun kami tidak parasaan galap sudah. Habis dulu semua tu movei baru kami parasaan galap pula tu rumah, 1 biji lampu pun kami tiada pasang, sekali sia tingu jam, amaaa.. jam 3 subuh sudah kamaa..
“astagaa.. babe, galap sudah dunia.” (sia cakap sama kawan sia. Kawan sia tingu dalam tu rumah punya galap)
“aikkk.. gilaaa.. punya main galap ni.” (ta-kajut bah kawan sia)
“babe, sia balik dulu lah.”
“isshhh.. jangan lah. Kau tidur saja cni bah.”
“ishhh.. sia mau balik juga ni.”
