رسالة قصيرة

جم_سالفة_عن_الصلاة

#يقول استاذي

1.  (قانون ثابت) : شكد ما تتأخر صلاتك تتأخر توفيقاتك (رزق صحة ذرية وجاهة حسنات مغفرة ... )  والعكس صحيح .
2. (عيب يصيحلي) : تعامل مع الاذان كأنما الله يصيحلك ( فلان تعااااااااااااال نلتقي !) ولذلك صلي وين ما ياذن بالطريق بالعمالة بالسوك بالجامعة بالوظيفة ... وتعامل على انك في لقاء رسمي مع الله وعيب ما تلتقي بيه !
3. ( فكر بيه ! ) من تروح للصلاة لا تفكر بغيره .. بالغده بالعشه برسالة الماسنجر بالطلعة وبالبيع والشراء وبشي مضيعه وبكل شي .. تخيل انت ملتقي بيه وهو يدري بيك شارد الذهن بس لقلقلة لسان ... كلش واكفة !!
4. (استثناء التطور ) : كلشي بحياتنه يتطور ... الملابس الساعة الموبايل السيارة ووو بس الصلاة ما نضيفلها لا تعقيب جديد ولا حضور قلب ولا توجه ولا تباكي ولا بكاء ولاتسبيح ولا انس بالله ولا لذة بالمناجاة بالعكس يجوز تمر ايام نخليها اخر اهتماماتنا ويجوز بعض الناس يكطعها جم يوم لان مزاجه ما مستقر اما صلاة الصبح فهي المظلومة دائما بحيث ان بعضنا يبقى عالنت او يشاهد افلام لما قبل الصلاة بساعة وينام !!!!
5. (موعد لقاء) : من واحد عنده لقاء وي واحد/ة شكد يرتب روحه ؟!! ملابس وعطر واكسسوارات ووو ... تلكاه يروح قبل الموعد ويحضرله جم سالفه ... بس وي الله !! بعضنا يروح مهتلف ويثاوب ويصفن وملابس مدري شلونها ويريدها بس تخلص (والله زحمة من الله) !!