عجاف القلوب

بارت 13

مساء الگاردينـيا احبتـي ❤️
البارت ( 13 )
#عجـاف_القلـوب ..
#بقلمي_شمـس_السعدي  ..

هنـاك اشخاص تفتخر بوجودوهم في حياتك .. وهناك من تخجل ان تعترف انك عرفتهم يوماْ ...

دخلنا الديوانية...
على طريق النجف ..
واشوف بالعشر سيارات منتظراتنا ..
واولهم سيارة الشيخ !!
استغربت وحجيت وي يوسف ..
هاي مو سيارة الشيخ ؟؟
يوسف .. اي والله هي .. مو بعيدة على جدي مستعد ياخذ موكب علمود يرفع راسك گبال عمامك ..
امير .. اني راسي مرفوع بي وحدة .. يكفي هو بنفسة جاي متصدر السيارات ..

وصلت يم سيارته ..
فتح الباب ونزل ..
اتقربت وبست راسة ..
الشيخ .. البقية بحياتك وليدي
امير .. وحياتك الباقية بوية شجابك ؟ ..
الشيخ .. مصابك مصابنا وليدي شلون مااجي ..
راح الامي واخذ من خاطرها بالسيارة هو وخوالي ..
وگـال ..
- يله اصعدوا خلي نلحگ ع الجنازة ..
ركبت سيارتي وحركنا ..
صدگ ساعتها حسيت راسي مرفوع واني اشوف نظرات ابوي وعمامي وتساؤلاتهم وهم يردون يعرفون منو ذولة ؟؟ ..

سيارتي تمشي ورى سيارة الشيخ ..
لحد ماوصلنا النجف ..
نزلنا هناك ..
اجو عمام ابوي وكبار عشيرته ..
عرفوا الشيخ سلمو عليه وتشكروه الجيته وياهم ..
دخلوا بيبتي للمغيسل وامي راحت وياهم ..
واني واگف يم الشيخ ويوسف وعلي يمنا ..
اتقرب ابوي وقاسم ..
- السلام عليكم ..
الشيخ .. وعليكم السلام ..
قاسم .. انت الشيخ مجبل موووو ؟
سامع بيك بس ماشايفك !!
حاكم .. منين تعرف ولدي وشعندك وياهم ..
الشيخ .. منوووو ولدك ؟
اذا تقصد على امير لو علي لو البقية فذولة ولدي وتربوا عندي بعد مااعرف اذا قصدك على غيرهم ..

تعصب ابوي ..
حاكم .. يعني طول هاي الفترة انت ماخذهم وضامهم علينا .. وهاي عيبه بحق شيخ عشيرة ومعروف اذا سمعت العشاير ماترضاه ..

الشيخ .. شوف يبوي الوكت مو وكت حجي .. عندكم عزا والميت اله حرمة .. بس ردي على حجيك ..
اني الشيخ مجبل وماارد واحد دخيل عندي .. لجن الي يجيني مهزوم من اهله وناسه الطردوه وحاربوه ويردون يغصبوه على شي مايريده مااطرده احميه واخليه تحت جناحي واذا انت محافظ عليهم وماطاردهم من بيتها الاخذته منها ماجانت عرفتني ولااجتني بيوم ..

تعصب ابوي اكثر من برود الشيخ ورده ..
حاكم .. انتتتتت… سحبة قاسم وگاله مو وكت هالحجي خلي تخلص الفاتحة ونتفاهم ..

امير .. بوية العن الشيطان وامشي ياحق تحجي بي ومنو ولدك الاخذوهم منك .. اذا تريد الصدگ اني ابوي وشيخي هو هالزلمة الواگف گبالك ..
رباني وعلمني وكبرني وسوة الماسويتة انت بصغرنا ..
الشيخ .. امير يبعد ابوي مو وكت هالحجي ..
الناس تعاين علينا والجنازة راح تطلع مو حلوة الناس تسمع حجينا ..
امير .. صار بوية ..

تخبلوا من سمعوا گلت للشيخ بوية ..
قاسم اخذ ابوي ومشوا ..

مرزا .. بوية لاتسكتلهم فوگ شينهم گوة عينهم ..
التفت علينا اني وعلي وگال ..
اعذروني خالي بس مااتحملت ..
امير .. لا خالي حقك .. فوگ هاي السنين كلها الماسألوا علينا ولاعرفوا طريقنا رغم هم السبب بطلعتنا ..
جايين يحاسبون هسـا ..