حكاية النجوم

حكايــــــة النجـــــــــــــــوم

اندك الباب حيل فزيت برعب ، فتحت الضوة ، دحكت ع الساعة ب 11 بليل ، خفت كلبي كام يدك سريع من الخوف ، اتجهت للباب ع كيف ، دحكت من العين الساحرة ، جان شخص غريب شعرو مهوس وعكش لحيتو هوسه عينو اشبه بشخص نعسان ، والشي الي خلاني اكتم حتى انفاسي بطل البيرا الي بيدو وهو يشرب ويحجي :"افتحي الباب بت الذين خليني...." فتحت عيني على وسعهن وصدمني بكلماتو الرديئة كأنه يحجي ويه وحدة رخيصة ، دموعي جمدت ، عيني ما ترمش ، كام يدك برجلة :"وج سااارة خليني ........." وجان اسمع صوت واحد :"منو رايد ابو الشباب..."
اندار عليه وكله :"ليش انته منو .."
"اني صاحب هذا الدار .."
"شنو صاحب هذا الدار ، هذا بيت سارة لو اني غلطان .."
"غلطان حبيبي ، ومرة ثانية لا تعيدها .." كالها ودفعو بعيد عن الباب ، وهذاك رجعلو يطوطح "وانته شوووو تدفع .."
"ادفع ..؟! كول زين ما كتلتك جاي سكران وكلك ريحة عرك ودك الباب بليل على مرتي وبغيابي .."
وتقرب يعتذر منو ، كشت نفسو "دروح ولا تعيدها ولا تعتذر .." راح بدون كلام ، تقرب من الباب وركز نظراتو على العين الساحرة ، تنهد ودنك ، ورجع رفع راسه "روحي نامي مرتاحه محد يكدر يوصلج .."
صدمني ودهشني ، راح وخلاني بحيرة ، منو هذا وليش هيج يسوي وشنو يكول مرته ...! رجعت للهول سديت الضوه ، وفتحت البردة ، دحكت جان يحجي ويه واحد ، وهذاك بس يهز راسو ، وصعد لسيارة وراح ويبقى الثاني عينو ع بيتي ، سديت البردة معقولة هذا ديراقبني لو شنووو ...!؟
تمددت بخوف ، مرت ساعة ، رجعت فتحت البردة وطلعت بس عيني ، بعده ع كعدتو ، ويشرب جكاير ، منو هذول ، خلوني بحالة خوف ورعب ، حاولت انام مكدرت ، بقيت سهرانه ، وكل ساعه ارجع ادحك على نفس كعدتو ، هذا ما نعسان ما يمل ، طلع الصبح وكمت بدلت وطلعت ، ماكو اختفى ، اعرفوا موجود من سمع صوت الباب اختفى ، مشيت بالشوارع ، وفجاة انداريت لكيتو يمشي وراي ومركز عينو عليه من خليت عيني بعينو اندار وكمل طريقو كانو ما يعرفني ، مشيت واني الخوف كاتلني ، اريد اعرف منو هذول وشيريدون مني ليش يراقبوني .
وصلت للمعمل ، وكف بعيد ، انطيتو خزره هو انصدم ، ودخلت لداخل المعمل ، شغلي مهمل كد التفكير ، خلصتو شلون ما جان ، وطلعت على نفس وكفتو ، ورجعت وهم لحكني ، دخلت للبيت وركضت للهول فتحت البردة هلمرة جان واكف بعيد ما مبين يراقب بيتي يمكن حتى ما يجيب الشبة لنفسو .
دخلت سويت اكل ما اشتهي بس جبرت نفسي ، وافكر شلون راح اعيش ، الي لفت نظري بهذهِ المنطقة العجيبة انو محد دك بابي وكلي منو انتي وليش وحدج عايشه يمكن هذا اكثر شي خلاني مرتاحه ، بس الي عكر حياتي هذول الي يراقبوني ، و .... نزلت دمعتي واني اتلمس بطني .
فركت وجهي واني اذكر وحدة وياي بالمعمل تسولف على بنيه تطرح بطريقة مو قانونية حتى بيتها اندليتو هذا الي سمعتو ، بس ما ينطيني كلبي شلون انزلو شلون .
اتجهت للفراش ما نايمه وتعبانه واحس لعب نفسي ، جبرت نفسي على النوم لليل يله كعدت ، وافكر شلون اوصل الها وكلما اتخيل انو راح اطرحو تجيني نغزة مثل السجين بكلبي ، ذكرت الولد ، طلعت فتحت البردة نفس كعدتو ، تنهدت وعفتو ، صعدت للسطح اريد اشتم هوى ، ردت ادحك من الستارة على الشارع ويا ريتني ما دحكت ، الشارع ضيق والبيوت الي مقابيلي قريبه هواية عليه ، اجت عيني على نافذة البيت الي مقابيل بيتي جانت البردة شوية مفتوحة ، صدمني المنظر بنيه وياها اثنين ولد ، من خوفي ورهبتي كعدت وخفيت نفسي على الستارة كأني اني الي داسوي كل هاي الشياء ، كمت ابجي ما اعرف شصار بيه ، بس ابجي بدون صوت خاف يسموعني من كل عقلي ، لحد ما سمعت صوت مهامس ، الصوت جاي من جواريني الي بصف بيتي ، تقربت جانت الستارة عاليه بس بيها زرف ، دحكت تلث ولد واحد يكله "هذا ابو سمير مدمن يمعود نكدر نعلي السعر.."
ورد الثاني "منو هذا ابو سمير .."
وفهمو "شبيك هذا جارنه الثالث بيته قريب من بيت ابو قاسم .."
"ابو قاسم الي دائماً يجيب بنات ليل بيته..."
"عفيه ..."
"شو ما ادري ..."
"يمعود ابو سمير صار مدمن وهسه ما عنده احد يجيبله غيرنه واحنه نستغل الفرصة .."
"ونعلي السعر .."
"لضعفه .."
"مخبل مو خاف يطير من عدنه هذا خوش صيده .."
"لا اصير غبي مو كتلك هذا ما عنده غيرنه ..."
نزلت ركضت لجوه غطيت نفسي من الخوف والرعب ، بقيت ارجف ، شنو هاي المنطقة اني وين .....؟! وين وين يا ربي .
ثاني يوم من خوفي اتجهت للمرة ، وكفت باب ببتها وابجي ردت ادك الباب اجاني صوتو "اكو شخص يريد يحجي وياج ..."
عقدت حاجبي "انته منووووو وشتردون مني لاحكيني وتراقبوني ما عدكم اهل ما عدكم خواااات حرام عليكم ..."
"رجاء ردي ..."
اخذت الموبايل واني خازرتو ، واجاني وصوتو "الج ربع سااااعة ترجعين للبيت مثل الورد وتعوفين هذا المكان .."
"انته منووووو ...!؟"
"نجوووم اسمعي الكلمة وداكلج ارجعي للبيت .."
صدمني يعرف اسمي "ما ارجع اله تكول منو ، بعدين انته تعرف اني وين وليش جايه هناااا ...؟!"
"اعرف اعرف جايه تنزلين الولد الي بطنج ، ورجعي واني اجي بس يخلص دوامي اجي افهمج منو اني ، ارجعي ولا تتهورين ولا تنزلي .."
"وليش حتى اصدك بكلامك وانته منو وتعرف حياتي شنو وشنو الي عشته حتى هيج تحجييي وتتحلل وتامر بكيفك .."
"اني ضابط واذا دخلين لهذاك البيت راح ترحين بيها خاصة طريقة غير قانونية ، ف شتكولين ترجعين لو اشوف شغلي ، والي كبالج ملازم اول يعني انتي هسه متحاوطة من كل مكاااان .."
بلعت ريكي بخوف "شتريد مني .."
جر حسرة وكال "كل خير .."

#منار_محمد_العجيل