Pretending Mrs. Acosta (COMPLETE)

EPILOGUE

Amy's POV

            "'Ma, kailangan pa ba talaga natin na bumili ng mga bagong gamit para sa baby? Meron ka naman na nabili noon 'di ba?"

            Napapangiwi ako sa dami ng mga gamit na binili ng biyenan ko para sa ipinagbubuntis ko. Narito kami ngayon sa Rustan's sa Makati at bumibili ng mga baby essentials. Lampin at onesies lang talaga ang plano kong bilhin dahil next week ay naka-sched na akong magpa-induce.

            "Dapat bukod ang gamit ni baby Aria. Saka panlalaki ang mga gamit ni baby Hunter noon so hindi babagay sa mga gamit ng apo ko. Dapat espesyal. Blush pink and gold are nice combinations," sagot ng biyenan ko sa akin at tinawag pa niya ang isang attendant para kumuha ng gusto niyang crib.

            Tumingin ako kay Bullet at nagkibit-balikat lang siya habang patingin-tingin lang sa paligid. Wala naman siyang pakielam sa mga pinagbibibili ng nanay niya.

            "Hindi mo pipigilan ang nanay mo? Ang dami na nito. Hindi naman ito lahat magagamit ng bata. Marami pang gamit na nasa bahay," bulong ko sa kanya. Tumingin ako sa biyenan ko na nagtuturo sa attendant kung anong crib ang gusto niya. "Saka, hindi natin kailangang gumastos ng marami para dito. Ilang buwan lang 'yan magagamit ng baby. Ang dapat nating pag-ipunan ay 'yung para sa kasal natin."

            Natawa lang si Bullet. "Hindi mo mapipigil 'yan. She'll buy everything for her grandchild. Lalo na at babae 'yan," hinalikan pa ako sa ulo ng asawa ko. "And besides, hindi naman problema ang gastos sa kasal natin. We are already married in civil and the church wedding after you give birth. Ayaw mo kasi na lumakad sa church aisle na malaki ang tiyan mo."

            "Siyempre naman 'no. Minsan lang ako ikakasal sa simbahan so dapat maganda ako doon." Inirapan ko siya kunwari.

            "Gusto mo araw-araw kitang pakasalan sa simbahan? Kahit laylay na ang balat mo sa braso. Kahit marami ka ng wrinkles, papakasalan pa rin kita." Nagniningning ang mata ni Bullet habang nakatingin sa akin.

            Ramdam kong nag-init ang pisngi ko sa narinig kong sinabi niya. Sobra talaga magpakilig ang lalaking ito.

            Natawa ako at napailing sa hitsura ng biyenan ko ng makita ko. Talagang iniinspeksyon niyang mabuti ang crib na para sa apo niya.

            Marahan kong hinimas ang tiyan ko at bahagyang kumislot ang baby ko. Tingin ko natutuwa din siya sa nangyayari sa amin. Alam niya kung gaano ako kamahal ng tatay niya. Ramdam niya na hindi na siya mahintay makita ng lola niya.

            "Are you sure you want to name our daughter Aria?" Nakita kong dumampot ng isang damit na pambata si Bullet at tiningnan-tingnan iyon.

            Malakas na sumipa ang anak ko sa tiyan ko.

            "Gusto ko. Malaki ang utang na loob ko kay Aria. Kung hindi dahil sa kanya hindi ko kayo makikilala. I want to name our daughter Aria Elizabeth kung okay lang sa iyo."

            Inakbayan ako ni Bullet. "Kahit anong gusto mo okay lang as long as you're happy." Hinawakan ni Bullet ang tiyan ko at gumalaw ulit iyon. Parang nagulat pa si Bullet at nanlalaki ang matang tumingin sa akin. "Ang lakas sumipa."

            "Hindi ka pa ba nasanay? Gabi-gabi mo na nga lang binabantayan 'yan," natatawang sagot ko.

            Napahinto kami sa pag-uusap ng dumadating ang biyenan ko kasunod ang attendant ng department store.

            "Nabili ko na lahat. Playpen, crib, clothes up to first year. Pati ang mga décor sa room niya okay na rin. The stylist will go to the house today."