يااوريد الروح فيك ابتليت .'!

الباره الثاني عشر

تاني يوم في الاسكندرية

اسكندرية وجمالها وبحرها وشقوتها وكمان بنات اسكندرية اللي مفيش احلي منهم ولا في خفة دمهم. في بيت عائلة ميسورة الحال بتفتح بنوته جميلة بملامح شقية عنيها خضرا وشعرها بني وبيضاء ملامحها تجنن . ودي( هنا فوزي الحضري)

هنا: تفتح شباك أوضتها اللي بتطل علي احلي بحر في الدنيا بحر اسكندرية. وهوا البحر الجميل يحرك شعرها بحرية وهي مبتسمة ليوم جديد رغم انها عارفة ان الابتسامة دي مش هدوم كتير. وفعلا جه صوت هي بتكره اكتر من اي حاجة في حياتها وهو صوت ( ماجدة مرات بباها المفترية اللي مزهقاها في عيشيتها)

ماجدة: هنا. انتي يا هانم هتفضلي واقفة في الشباك كتير . ولا ايه

هنا:بيتجز علي سنانها. يا فتاح يا عليم علي الصبح. نعم يا طنت عايزة ايه

ماجدة: تاني طنت. ما قولنا قولي ماجدة احسن. وهو انا بيني وبينك كام سنة. هما تقريبا يعني ...

هنا: ايوة هما تقريبا يجي 20. 30 سنة كدة

ماجدة: كتك قطع لسانك. ليه شايفاني. من ايام الملك.

هنا:بتبرطم. لا من ايام ما بنوا الهرم

ماجدة: بتبرطمي تقولي ايه

هنا:بإبتسامة صفراء. ابدا ما بقلش. ممكن بقي توقفي الحوار بتاع كل يوم ده علشان انا عندي شغل. وعايزة الحقه

ماجدة: روحي يا ختي لما نشوف اخرت شغلك ده ايه. ده ابوكي بيديكي مصروف اكتر من مرتبك

هنا: ماهو انا مش بشتغل علشان الفلوس وبس انا بشتغل علشان احقق ذاتي.

ماجدة:ذاتك؟ ودي تطلع ايه بقي ان شاء الله.

هنا: خبطت راسها بإيديها. يارب اروح فين بس. بصي يا ست ماجدة الذات دي حاجة كدة زي اممم اه زي الطحال والفشة تعرفيهم

ماجدة: طبعا دول ابوكي بيموت فيهم. بس هو انتي بتشتغلي في شركة ولا في مسمط

هنا: عادي متدوقيش اهو كله شغل. اسيبك انا بقي واروح البس. علشان هتنفخ لو روحت متأخرة.

وراحت هنا لبست وجهزت وهي نازلة لقت صوت تاني وقفها وده تاني اكتر صوت بتكره وهو ميتخيرش عن الصوت الاول في الغلاسة والتناحة علي راي هنا. وده توتي قصدي تامر ابن ماجدة مرات ابو هنا.

تامر: هنون صباح الخير

هنا: يارب انا عندي مرارة واحدة مفيش غيرها. لو اتفقعت هعيش من غير مرارة

تامر: قرب منها. ايه يا هنون بنده عليكي مش بتردي ليه

هنا: اصلي وقعت علي ودني وانا صغيرة.

تامر: هنون انتي مش ملاحظة انك بتعامليني وحش

هنا: يا راجل هو انت لسة واخد بالك. تصدق ده تقريبا اسكندرية كلها عرفت.