Ang Papag Ara pa, Siya Wala na

Nagabukay sadto ang lawod tungod Kay Habagat.  Nagpungko ako sa gamay nga papag sa idalum sang Talisay kag didto nagbantay sang pumpboat nga  mapadulong sa banwa. Bal-an ko man  nga wala biyahe ang mga de pasahero Kay may Gale warning apang kung kaisa sa indi mapaktan may naga lakat nga mga pribado nga mga salakyan.  Madugay na ang akon pungko sa gamay nga papag sang may nag-ingod sa akon luyo. "Wala gd salakyan no,  paano kita sini makatabok sa banwa man?", ang pamangkot sang estranghero samtang ang iya mga panulok adto sa nagaputi nga mga balud nga daw naga palumbaanay sa paghalok sa maputi nga guya sang baybayun. Nagbalikid ako kun sin-o iya nga kaistorya apang wala na didto sang iban nga tawo kag ako gd lang. 

"ha? .... Aw huo wala gd salakyan. " ang malip-ot ko nga sabat tungod indi ko man siya kilala.  Nagpadayon ako hampang Mobile Legend sa akon Oppo 7 nga android Phone.  Halos tunga na sa oras ang akon bantay pero wala gd may naghimus nga pumpboat pabanwa.  Wala ako sa gihapon nagpauli sa balay tungod manami ang signal sa may gamay nga papag kag naga enjoy ako piti-piti sang cellphone.  " Inyo na da ang balay nga Pink no? " Nakibot ako sang may nagtingog sa akon kilid. "...ay i**t! "Nabuy-an ko ang cellphone sa tuman kakibot kag naghugaplak ini sa duta.  Nagkadlaw ang estranghero tungod sa tinaga nga naggwa sa akon baba.  "Huo amon ina dira,  ngaa man? " ang sabat ko sa iya pamangkot samtang ginapulot ang butang nga nahulog sa duta.  "Hinablos gali ako ni Tiyay Maria nga inyo kasilingan."

"ay ina? " sa akon pinsar. " ah,  ikaw gali ang taganayon nga  hambal sang iya bana nga hinablos ya nga nag -abot sang nagligad lang ?" ang pormal ko nga sabat.

"Total wala man salakyan ma ML na lang kita diri ah. " ang pabati-bati sang estranghero nga kun sa bagay kagaina pa niya nahibaluan nga naga hampang ako tungod nga naka-full volume ang sound sang akon gadget.  "Ano ang imo nga I. D, e add ta ikaw total manugtapos naman ina ang hampang.  Upod ta ah. " ang iya nga pagpanghagad.

Pareho ang amon level gani naghampang kami Rank.  Daw sa madugay na kami nga kilalahay kun mag -istorya sa hampang.  Pero ang matuod indi pa namon kilala ang isa kag isa. 

"Sus,  abi ko gani nakatabok ikaw. Naghambal man ako sa kay tatay mo nga ato na ikaw sang gin pamangkot ya sa akon kun nakalakat ka gid man. " Daw liwat nga mahugaplak ang Cellphone ko sa balas sa kakibot Kay nanay, apang nauyatan ko ini sang maayo tungod nga focus gid ako sa amon hampang.  Sirum na gd man matuod,  apang wala ko matalupangdan ang paglakat sang oras.  Sin-o man abi ang indi maganahan Kay talunsay nga kadalag-an ang akon naagum kaupod ang estranghero kag ang hero niya nga si Gord. 

"He he he.... mapuli na ako nay ah, tapos naman ini ang amon hampang. " ang sabat ko Kay nanay nga naga ngisi.

VICTORY!  Kag natapos gd man amon ulihi nga hampang nga wala gd sang perdi bisan nga kaisa.  Gin uribay ko liwat ang akon napsack kag naglisensya sa estranghero nga mapauli na sa balay.  Nagtango man lang siya. 

Mga lima na ka dupa ang akon agwat sang nagbalikid ako kag nakita ko siya nga naga duko sa gihapon sa iya cellphone. Isahanon na lang  siya didto sa gamay nga papag kag pat-od ko nga naghampang siya liwat.

Apisar sang malain nga tyempo,  masanag sa sidlangan ang bituon sang kabugwason gikan sa bintana sang akon  hulot-tulugan. Wala man sang bulan apang may kinaiya ini nga kasanag sarang nga manutaran sang bisan sin-o nga magtanggla sa kahawaan. Nabugtaw ako sa suringaw sang mga de pasahero nga pumpboat.  Nag-ayo-ayo na gd man siguro ang panahon.  Gin hurikap ko ang akon cellphone sa uluhan nga bahin sang katre kag gin lantaw ang oras.  Alas tres singko ang takna. Amat -amat nga gin hakwat ko ang akon lawas palayo sa banig. Gin paibabaw ang planka sang control sang solar kag gilayon nabuhi ang kasanag.  Bisan nga matugnaw gin pilit ko gd maligo agud nga mailis nlang ako uniform pag-abot sa banwa.