#حكايتي
#الجزء_الأول
بطله القصه شهد
شهد باتها متزوج ثلاث صبايا، وكانت أمها الثانيه، عندها خمسه خوت شباب من باتها [محمد _أحمد _عادل _مجدي _اكرم ] ، وهي البنت الوحيده عند باتها وأمها،،، ماعلينا،،،
أم شهد بعد اكتشفت إن راجلها تزوج عليها طلبت الطلاق بسبب المشاكل الي زادت ومعش قدرت تستحمل اربباها الي هم خوت شهد من الوليه الأولى والي كانت متوفيه قبل زواجها بسنتين ورجعت عاشت عند هلها هيا وشهد وكان والدها متوفي ***جد شهد***وخوتها ساكنين ف نفس حوش العيله ف الدور التاني وكان عندها تلات خوت[سند * مهاب *حمد ] وطبعا متزوجين كلهم وبدت معناتها الحقيقيه بعد طلاقها،، انتهى موضوع الطلاق بعد جري وتعب ع المحاكم وطلعت روحها في سبه تاخذ بنتها عشان تعيش معها وقدام عيونها،،
شهد كان عمرها عشر سنين لما اطلقت أمها،، وكان عمر مريم أم شهد 39سنه يعني شابه وعليها العين ومريم خريجه حاسوب ولما تخرجت ازوجت طول بدون ماتشتغل،،
ردت مريم لحياتها الطبيعيه مع هلها وصبايا خوتها وكانت زوجه خوها مهاب الكبير حامل وفي شهرها وماتقرب حاجه وكانت السلفه الكبيره ومتحكمه في راجلها ونازله ع حماتها مريم المسكينه، ومريم كانت بروحها مع أمها وهيا الي قعدت تخدم في الحوش الأرضي من بعد ردتها للحوش وصبايا خوتها معش ينزلن إلا في العشيه أو ينزلن ومايديرن شيء وكانت زوجه مهاب تنزل في عيالها عشان مريم تهتم بيهم بحكم انها عمتهم ومن واجبها تساعدهم وتمشط ودوش وتقري وتفهم وتوكل وقعدت مريم البيبي ستر لصبايا خوتها،، وتمن كلهن ينزلن في عيالهن من الصبح بدري ومايتحركوش نهائي إلا عقاب الليل وهنا يقعدن متريحات ف شققهن والي تبي ترقد ترقد والي عندها مشوار تطلع، وزاد الموضوع عن حده ومعش تحشمن ع اوجوهن و مريم تعبت منهن ومن عياط العيال وهرجتهم وقالت خلاص بنهزبهن وانا مليت ومعش نقدر ولازم انفهمهم ودارت عصريه وكلمتهن ينزلن يهدرزن وفعلا نزلن وقعدن يهدرزن وحكتلهن مريم بكل هدوء انها تعبت من سريب العيال وان العيال بعد يتلاقو مايديروش خير ويقعدو يتعاركو وقالتلهن ان العيال معش ينزلوا إلا في العشيه،، وبعدها ركبت كل وحده لشقتها وركبن معاهن اعيالهن،، هنا عاد بدا دور فاطمه زوجة مهاب وقعدت ترجى في راجلها ودرست ع اعيالها وفهمتهم لما يجي باتهم شن يديرو ولما جاء مهاب خشت فاطمه لدارها وتمت تبكي ومشت البنت لباتها وقالتله اعميمه مريم عيطت ع ماما وضربتنا وقالتلن معش تنزلو أنتم ونحن يابابا مادرنا شيء نلعبو 🙄🙄خش مهاب ع فاطمه ولقاها منهاره تبكي 😭سألها كنك شن فييي؟؟؟
قتله مريم هزبتني قدام سلفاتي ورعشتني وعيطت ع العيال وقلتلهم معش تنزلو وحرام مافتحت فمي ولا وجعتها وهيا نازله فيا هزايب المفروض تحترمني وبعدين هذا حوش جدهم الي تحساب فيهم ع نزلتهم 😕وسبع البرمبه نزل ع أخته طوووول ومريم بعد شافت خوها صبت بتسلم عليه وبدون أي نقاش يضربها كف 😳مريم انصدمت ومعش عرفت ماترد وقاللها مره اخرى يعلي حسك ف الحوش هذا نعرف كيف نربيك وركب لمراته 💁
مريم مافهمتش خوها ليش دار هك وجمطتها وسكتت وفوضت أمرها لله،،، وبعد أسبوع في يوم الجمعه ناض الحوش كلهه عالفجر من هرجه مهاب وفاطمه وطلعتهم للمستشفى وكلهم قعدو يرجو في مكالمه من مهاب وبعد تلات ساعات اتصل مهاب بي أمه عشان يقوللها ان جاه اوليد والحوش قعد زغاريت وهرجه والي يعيط يبي فطور والي نازل دوبه واعي والي ماشي يجيب الخبزه والحوش كلهم فرحانين يرجو ف المولود يخش عليهم،،، جهزت مريم دار المقعد وفرشت سرير ورتباته وحطت جنبه سرير بيبي عشان لما اتجي فاطمه تلقاه واتي،، وصلو هل فاطمه وضيفتهم مريم واستقبلتهم أحسن استقبال وتمت اتجهز ف الغدا للضيوف وخشت اتبخر ف الحوش وحطت فسوخ وخلت البخار في دار المقعد تخش بنت مهاب تلعب جنب جدتها أم أمها واطيح البخار ع فرشه واتنوض اخت فاطمه تلم الفحم بسرعه وتمشي تكلم مريم عشان تمسحه،، مريم انقهرت وهزبت بنت خوها وقالتلها نلقاك ف دار المقعد نقص كرعيك زعلو هل فاطمه وروحوا قبل مااتجي بنتهم واتصلوا بيها وحكولها كل شيء وان وجعتهم الهزيبه في بنت بنتهم وقالولها ادير اللمه عندهم، وهيا طالعه مع راجلها قالتله حطني عند هلي استغرب مهاب قاللها عليش؟؟
قالتله اختك هزبت أمي وضربت بنتي عشان خشت لدار المقعد وهلي روحو زعلانين ومش حيجو وانا نبي ندير اللمه عندهم،، سكت مهاب وحط مراته عند هلها وروح لحوش هله وخش عليهم وهو مليان ع اخته،،
مريم،،،، مريم،،،،، مريم،،،، جت مريم نعم شن في ان شاءالله خير رد عليها مهاب من يوم روحتي وماشفنا خير وماطلقك راجلك إلا انك وجه شر ونكد انتي شنو ماتحشميش ع وجك مش خايفه من حد مش دايره حساب لحد واقسم بالله ننهي مواضيعي ونفضالك ويا أنا يا أنتي ف الحوش هذا وخذا أعياله وطلع لحوش هل مراته ومريم خشت لدارها تبكي وجعتها تهزيبه خوها لها قدام صبايا خوتها وانها مدارت شيء وكانت فرحانه ترجي فيهم امتى يجو،،اتصل مهاب بخوته يلحقوه عند هل مراته لأنه يبي يدير عزومته غادي،،
وكلهم مشو لي العزومه إلا مريم وبنتها،،، وبعد العصر باب الحوش دق طلعت مريم تفتح،،،،،،،،،
يتبع 😌👏💃💃💃💃
#الكاتبه_masho💜
