#حكايتي
#الجزء_الثاني
بعد العصر دق باب الحوش طلعت مريم تبي تفتح 🚶♀️
من،، من،، من،، وتسمع صوت أنا أيمن جاركم، طبعا أيمن كان يبي الأخت مريم 💜لكن عوج منها رفضاته😔 لأنه كيف خوها 🙂🖖ومتربيين مع بعضهم، فجاءه بعد سمعت صوته ابتسمت وقلبها قعد يدق🤤، فتحت الباب وعيونها مليانه فرحه ولقت أيمن جايب سطل حلويات 🙆♀️دزتهن أمه لي أم مريم، شكراته وقعد يسأل علي أخبارهم وأحوالهم وهي قعدت تسأل فيه💁، وقالتله سلم ع عمتي حواء وع بنات وصكرت🚶♀️لكن من بختها المنحوس، مهاب كان خاش لرأس الشارع وشاف أيمن كان مصبي عند باب حوشهم وعدا لحوشه🚨درس مهاب بسرعه ونزل ع أيمن وخبط ع كتفه معش نلقاك عند حوشنا يابرو 😕استغرب أيمن لأنه عادي ديما يجيهم وحواشينهم واحد 💔وقاله تم ومادور شيء كنت جايب سطل حلويات دزتهن أمي لكم 🙄ومهاب يعطيه نظره من الجنب ويخش ويسيبه، وهو جاي يبي ينتهز الفرصه انه اخته بروحها في الحوش عشان يستفرد بيها 😣ولقى حجته وخش يدور عليها وهو الشر يطلع من عيونه ويلقاها في مطبخ ويمسكها من شعرها ويقعد يضرب فيها 💔هذا ليش اطلقتي عشان ادريلنا قرون اخر عمرنا ويكسر فيها وسحبها لعند الصاله وين ماشهد اتفرج ويقوللها بنتك شن طولها ودايره موعد واقسم بالله من يوم وغادي نلقاك عند باب الحوش نقص كرعيك ويخبطها ف الساس ، ويرقى لشقته عشان يجيب دبش لست الحسن الي متربعه ف حوش هلها،
أيمن ماعجبش موقف مهاب وخاف ع مريم وبعد ماطلع مهاب دز أمه عشان تطمن عليها،،
دقت عمتي حواء محد رد ولا حد فتح وقعدت ادق ادق ادق محد رد استغربت وروحت لحوشهم وأيمن واقف عند باب حوشهم وقالتله يااوليدي شفت بروحك يدي طاحت وانا انخبط محد فتح،، خاف أيمن وقال في حاجه صارتلها هذا ليش مافتحتش،، وقال لي أمه تتصل بي أم مريم واتصلت حواء وردت عليها أم مريم وقعدن يهدرزن وصار اطري وعيت فلان وعيت علتان وبعدها قالتلها حواء انا قبل اشوي دقيت عليكم محد فتح قاللتها صاح نحن كلنا عند نسبات مهاب والله جد علينا اوليد ووووووو وقعدت تحكي وبعد نص ساعه من الهداريز صكرت حواء وقالت لولدها الحوش مافيه حد كلهم عند نسبات ولدهم قاللها توا فتحتلي مريم وبعدها جاء مهاب ومتعصب
_وباهي يااوليدي باك خذاها معاه
=بس مهاب طلع بروحه يمي، انا خايف يقعد دارلها شيء؟
_هذا خوها شن يبي يديرلها وعليش يبي يديرلها 🤔في حاجه صارت وماتبيش تحكيلي؟؟؟
=لا يمي بس لو شفتي عيونه وكيف كان يحكي معاي وبعد طلع خبط الباب بقووه!!
_ماهناك الا كل خير تو انت شن عندك مادير
=بنكسد برا، ليش عندك طلعه ولا حاجه؟؟
_لاء، غير ديربالك من المشاكل وخليك في روحك
=ان شاءالله يمي هي انا طالع.
وقعد أيمن مقعمز برا يرجى في جيرانهم يروحو بلكي مريم طلعت مع مهاب وهو ماشافهش ويبي يعرف بعد يروحو هلها كان في حاجه تو اتصير عندهم هرجه،
بعد المغرب روحو خوت مريم وصبياهم وأعيالهم ومعاهم أمهم،، وتأكد وقتها ان مريم صح جوا،، وقعد يرجى شن حيصير وخايف ويدعي تكون بخير بعد ربع ساعه طلع حمد يجري وولع سيارته وخش اخرى أيمن خاف وقعد يبحت وطلعت مريم مع أمها وخوها وركبوا للسياره وطلعوا،، أيمن قعد يخبط في رأسه ويبي يعرف كنها وشن فيها وخش لأمه يجررررري
=يمي يمي يمي
_خير اللهم اجعله خير كنك يااوليدي
=توا مريم طلعت هيا وهلها وعدو
_باهي وشن فيها يايام
=يمي طلعت متكيه ع خوها ومش قادره تسند روحها 😭
_توا بعد يروحو نمشيلهم ونفهم منهم
=خلاص انا بنطلع برا بعد يروحو تو نديرلك رنه
_لاء وحياه امك مانسمعها بكل انا ف مكان وتلفون في مكان خشي علي سلم اوليدي
=باهي يمي تم
وقعد أيمن يرجى فيهم يروحو
وبعد ساعه روح حمد مع أمه بس 👀انصدم أيمن وقعد يبحت بلكي تو تنزل مريم وقعد يرجى محد نزل غيرهم وخشو لحوشهم،،
خش بسرعه لأمه يمي وتي روحك راهم روحو بسرعه عدي شوفيلي الموضوع،، حواء لبست وعدت لجيرانهم،،
دق دق دق دق،،،، يفتح حمد
_اوووو عمتي حواء، شخبارك وكيف حالك؟
=والله كويسه شخبارك أنت ومراتك ان شاءالله طيبين
_لاء الحمدالله ف خير ونعمه
=مبروووك ماجد عليكم وان شاءالله لعقبالك
_الله يبارك فيك ياعمتي ان شاءالله ان شاءالله،،تفضلي،،تفضلي
=أمك وين ياحموده
_جوا ياحويوه خشي خشي مانكش برانيه 😂👏
=السلام عليكم ياهل الحوش 🚶♀️
وخشت حواء وساهرت مع ام مريم ومقدرت تاخذ منها زبده إلا ان مريم صارلها هبوط وشالوها للمستشفى
روحت حواء وكان أيمن يرجى فيها ويحرق وجاته أمه وحكتله وقالتله البنت عندها هبوط بس
أيمن ماصدقش وقعد باله مشغوله وعقله يدوي،
اتصل حمد بي مهاب وقعد يهزب فيه كيف يدير في أخته هك ويخليها طايحها ف نص الحوش ويطلع ويسيبها وصار نقاش طويل بيناتهم ومهاب يسب ويلعن وعرف ان مريم رقدوها ف مستشفى،،،صكر مهاب وعدا ولع سيارته ومشى للمستشفى 😳🔥
#الكاتبه_masho
