#تشوه_خلقي
للكاتبة ام مصطفى
البارت الخامس عشر
ملاك
بيوم الخطبة
امي اخذتني تحفني ع اساس
حتى ام الصالون تعجبت شلون ازوجت
وشتحفين بيها
بوكتها امي التفتت
وهي تغم نفسها دكول امداني هاي تزوج واني ضاله
حفتلي حواجبي ومكيجتني طوخ كلش
بلكت يروح الحمار شويه
صرت قرقوز عبالك
استغفر الله يربي
هسه ليش من دون البنات اني هيج شكلي
وفوكاها صاربي بيه هيج من وره ياسر
جنت ابد مفرحانه وحزينه
جنت اكول لروحي
مو هذا ياسر الجنت احلم ازوجه
هاي اتزوجته ضوكي ملاك ضوكي
رجعنا للبيت
لحد الان محد جاي غير عمي ذاك اليوم
وبعد لا خبر والااجوو
حتى امي تحجي اذا مراضين شكوو ذبو احجاية
وراحوو
ابوي دخل كال بعد ساعة يجون
اي زين وعوجت حلكها امي كدامه
كلها جنج مقابله فوكاها
لج احمدي الله واشكريه الف مره
راح ياخذ بنتج
يله حضرن شرابت والكيك الجبتهن
جان ابوي كلش فرحان
خوالي جانوا موجودين
وبيبي هم
جنت قلقه ومرتبكه ومبين علي الحزن والخوف
كل شويه امي دكلي ليش مفرحانه
شبيج متغيره
اكولها مابيه شي
ساعة ودخلوا
مرت عمي مجايه بس نور وخالاته
وعمي وولد عمي
طبن
امي سلمت وسئلت ع وداد
جان دكول مريضه والله ومكدرت تجي امي تتعذر منج
امي شصار بيها اشوف وجها يطي الوان
نور وكفت يمي
بدال متسلم كالت عابت لهالخلقة شطالعة جنج مهرج ويع الله يساعد ياسر
اووف لو عدج ذرة كرامة كولي مااريده
بس انت مصدكتي
نزلت دمعتي يربي ساعدني شورطت روحي
شسويت بحالي
كعدن عبالك فاتحه
ابوي صاح ع العقد
راح يطب الملة يعقد الكم
اي بابا
كومتني نيران كومي
نيران تخزر بنور لان سمعت كم كلمة
كالت شتكولج
يمعوده شتكول عوفيها
اخخخ يالقهر هاي نويره تجاوز وترفع خشمها علينا
امشي امشي
لبست عبايه وطبيت
دخل ياسر عبالك جايبه للاعدام
السيد يسئله وهو ساكت كوه حجه
خلصنا وطلع كبل بوجهه للاستقبال
واني رجعت لا هلهلن ولا شي عبالك جنازه
مرت خالي تالي هلهلت
شنو شجاجن خايبات خطيه العرسان دهلهلن
جان دكول نور اعذرينه منعرف
امي ماتت قهر
طلعوا بسرعه
وامي بسطت بالكاع وتلطم
مااريد افسخ الخطبه
شنو مجبورين ذول خطبه لو فاتحه هاي
بنتي عندي ولا هالمنيه
ابوي عاط بيها اني العب
يوميه تنخطب وحده وافسخها
ولج انت ماتحمدين الله وتشكريه
انت وحده متعافيه
الصوج بيه دللتج زايد انت وبناتج
اسكتي لو ترحين وي اهلج
عاط بامي وضل يغلط وامي تحجي
راد يضربها
حيدر اخوي لزمه بابه ع كيفك
بيبي خطيه اجت تتخربط
ومرت خالي شصار بيها كامت ترجف
اخر شي كلها ضله مااضلج بالبيت
اروح يم ناديه هواي احسلي
انت وحده متتعاشرين
وبناتي مالج دخل بيهن
وانت ملاك جهزي نفسج شوكت تخلص امتحانات تزوجين
