••حب بطعم الجنون••🖤مكتملة🖤

🍁 الجزء1 🍁

•••أحلام رغبات إنتقلت الى عالمها•••

في وسط البحر و بضبط في وقت الغروب واقف ولد شديد الوسامة بملامح حادة... عينيه كتشوف في نقطة واحدة.....داير القب على راسو لابس كلشي كحل ريحتو المجهدة كتزيدو لمعة و في نفس الوقت كايبان عليه الغرور و التكبر ... ولكن من الداخل ديالو عالم بيه غير الله حتى هو ماعرفش راسو اشنو كايسوا .. واقف كايشوف و كايتمعن في خلق الله و كيفكر كيفاش كيكون في الصباح عامر بالماء و الماج ديالو كتسمع من أبعد المسافات و كيفاش دابا خاوي و عامر غير بالصخر كيسول راسو و في نفس الوقت كيجاوب ... كيفاش يقدر يخبي هاد الكم الهائل من الصخر... زعما واش الانسان بحالو بحال البحر حتى هو مختلف كايبين حاجة و هو في الاصل حاجة اخرى كايبغي يبين راسو قوي وعايش الحياة و ما كيأتر فيه والو و هو في الاصل عامر من الداخل ببزاف ديال المشاكل و الهموم و الحزن و التعاسة و ماكيبغش يبين و لا كيعط مظهر ديال القوة و ديال الغرور و الكبر و هو في الاصل قلب بيض من ثلج وفواحد اللحظة هز راسو لسماء.
....... في نفس البلاصة و بضبط في الكبنوات لي كايطلو على البحر وافقة بنت بملامح بريئة لواحد الدرجة ماكتصورش كتأمل في جمالية الغروب لي كيشبه ليها بشعرها الفاتن الأحمر لي طايح على وجهها و حناكها الموردين لي زيدنها غير رقة و براءة ... حويجها الفضفاضين ...عينها العسلين لي كيعطيو هاد لوحة جمالية خاصة في نفس اللحظة لي هز فيها الولد عينيه لسماء هزات حتى هي عينيها شي حاجة غير مرئية خلاتهم ينسجمو و في ثانية او جزء من الثانية غادي يهزو بجوج يديهم و غادين يحلوها طاحو جوج قطرات ديال الماء لي غادي تجي في وسط اليدين ديالهم جمعو يديهم بجوج و حطوها على قلبهم و هاد شي كلو كايديروه و هما ماواعينش على راسهم و هنا غادي يشهد البحر و السماء و الصخر و الغيوم على بداية قصة حب لي غادي تكون غير في الخيال

* * *

يتردد••فتحتار

يقترب••فترتعد

يبتعد••فتشتاق

يعود••فتمتنع

يرتاب••فتصمت

يرحل••فيتألمان

* * *

##فيضطر الخيال لقلب موازين القصة التي لم تظهر ملامحها بعد##

^^^^الواقع^^^^

<عندما لا تجد نصفك الاخر إحذر أن تقبل بأي نصف لتملأ الفراغ >

....وقفات على هاد البوسط و تبلوكات الكلمات جبداتها خلاتها تعيش اللحظة و تسبح في خيالها .....تحلل و تستنتج ...تعارض و توافق... تحلم و تحقق .....توصف وتتمنى...تستغرب و تنسى.
سكرينات الكلمات و طفات هاتفها و حطات راسها على المخدة و مخها مهداش من تفكير ... احاسيس قتاحمو عالمها و خلاوها تحلم و تبني مدينة جديدة او احساس جديد حسات بالوحدة... بعدم الامان ... الخوف من المجهول ... إدمان شخص ما ... نقص الحنان ... محتاجة سند...يد العون.... رفيق درب ...صدر، جملة وحدة نتجو منها مشاعر كتيرة جملة وحدة خربقات كلشي ردات ليها أفكارها و مشاعرها متاهة ماتقدرش تفهمهم و ماتقدرش تستسلم و تستغنا عليهم جبدات مذكرتها و قلم خد سيطر و طبع اللاوعي ديالها
...تلقى نصفك التاني يعتبرك روحو و قلبو و أساسو، تكوني أنت هي السند و المكان لي كيلجأ ليه في وقت حزنو و يخوي داكشي لي عندو واخا تكون غير حاجة صغيرة..تدمنيه تعتبره الكل في الكل يكون بالنسبة ليك عشقك و أوكسيجينك ، تموتي في حوراتو، صوتو بالنسبة ليك لحن، ملامحو رسمة مرسومة بإتقان،عينيه بحر تغرق في موجاتو، ضحكتو كتخلي داك لقمر يكتمل ام غمزاتو كتحسسك بالسعادة، خيالو و أحلامو كايخليو الحب يعيش، شفايفو سكر، شعرو و لحيتو كايزيدوه رقة و جمالية خاصة ،عروق فن و جادبية ،و تفاحة ادم كتعطيه رجولة فوق من رجولتو ،طولتو و ريحتو شي حاجة سبيسيال، عضلاتو المفتولة و سموريتو كيخليوه يبان رجل شرقي بامتياز ،غيرتو كتطيحني فيه، حنانو اروع ما عندو، أخلاقو هي كلشي، شوفاتو خمر حلال، لمساتو و قبلاتو مانقدروش نوصفوها، حجبانو كيعطوه طابع ديال قوة....اما رموشو كيخليوك تسها فيه ، عشقو لطبيعة الخرساء نقلو ليا و خلاني نتحاور معها و نتعمق فيها ،حوارتو كتغطي على عيوبو، حياءو و في نفس الوقت جرئتو، عقلنيتو و ذكاءو و فطنتو، إحساسو لي مكمل كلشي ، مايمكنش يكون هو نصف ثاني بل هو نتي في جسم ذكر....