KENANG PENGERINDU TUA
TUSUN 8
Tumu pagi siti, Simai seduai iya Minggat udah nyenguk ke mua ba bilik tuai rumah. Tuai rumah enggau bini iya benung duduk ba dapur ngirup ai kopi pagi nya. Bala anak uchu agi betegaring magang ba bilik tengah, sigi alai endur tinduk. Rindu meda sida nyau bedigir tinduk ba dia. Laban bala anak enggau uchu tuai rumah sigi mayuh, penuh meh bilik tengah nya alai sida tinduk. Minggat enggau Simai belubah-lubah mansa sida ti benung tinduk, enggaika dani.
"Lalu wat, benung ngirup kopi kami duai ibuk nuan tu," pia ko tuai rumah. Minggat enggau Simai lalu duduk nunga tuai rumah ba dapur.
"Nama pejalai seduai tumu pagi tu deh? Bisi utai berat ti ka dipadah?" Ko tuai rumah ngepun ke randau.
"Nyadi baka tu aya, kami duai tu bisi utai ka padah. Meda wat tu bisi pulai nemuai ke menua kitu, iya lalu deka mai kitai serumah nyemin pendam menyadi kami duai, niang Jelawai ba tanah tembawai kami din," ko Simai.
"Pia. Enti bakanya runding seduai, lagi aku nesau kitai serumah sama bela betulung ngaga pengawa tu. Kemaya seduai ka mutar ke pengawa tu deh?" Ko tuai rumah. Ai kopi disepu iya sebedau ngirup belubah.
"Kenu ko jaku, enti utai nadai nanggul, pagila meh deka ngaduka pendam nya. Saritu kami duai ka ke pasar Betong kia, bebeli ke utai kena nyemin," ko Minggat.
"Au. Enti pia, putar ke dulu pengawa seduai ke bebeli ke barang nya saritu. Lagi aku nesau kitai serumah, ngambi ke sida enda mindah kebukai pagila. Ngam endar meh ngadu ke pengawa seduai nya pagila, laban lusa kitai deka ngadu pengawa kunsi ngelulun pulut ,bebunuh ke jelu ba pendaie din kena anak Dunggat melah pinang tulat," ko tuai rumah. Minggat enggau Simai lalu beguai ngirup ai kopi seduai iya laban ti ka bebeli ke barang kena nyemin pagila.
~~~~~~~
Rinya enggau Ilan meda apai enggau ibuk sida ka ke pasar, lalu beguai nepu diri dalam kerita. Enggai ke tinggal ke urang ko seduai iya. Ukai nya udah mandi seduai iya. Dani tadi, meda apai iya madah diri ka ke pasar, seduai lalu ensugau angkat. Mina sempat empungas mua aja. Ngeli enda meh diberus. Baju aja ditukar. Akai neh, udah ga mabuk kemari, enda ga mandi pagi tu. Sigi bau naga meh seduai iya datai ba pasar din. Cina luput meh nyium bau seduai iya.
Datai ba pasar, sida pan lalu duduk ba kedai mee ngisi gelung perut ti udah begendang ari tadi. Baka sarinya meh Rinya enggau Ilan, sigi nengali 3 mangkuk siku.
Pengudah tembu makai, sida pan neruska tuju pejalai sida begiga ke utai kena nyemin pagila. Bebeli ke sida lauk ke bai sida pagila.
"Rinya, peda nuan kedai nyin. DOREMON" ko Ilan. Rinya lalu narit Ilan mai iya tama kedai nya. Datai ba kedai nya, seduai iya lalu niki ke atas. Rinya lalu nilik gari ti dijual dia.
"Apu Ilan. Tau shopping ditu tua. Murah rega gari ditu. Lagi ngasuh daddy mayar," ko Rinya. Nyamai endar neh, apai ga beduit, apai meh asuh mayar. Ila seduai dah kerja nyepi asai ngiga duit.
Seduai iya lalu berengkah ngambi gari dia, bisi 5 bakul gari seduai. Nyangka nya tekenyit meda rega baju dia. Asai ka meli siti kedai ko seduai iya. Udah tembu milih gari, seduai lalu mukul telipun ngagai apai iya.
"Daddy, kami duai ba tingkat atas doremon tu. Udah tembu kami duai. Nganti nuan mayar ke kami duai aja," ko Rinya. Minggat lalu ngelawa Rinya enggau Ilan ba tingkat atas. Peda tak 5 bakul penuh gari seduai iya.
"Apuuuu, ka kena seduai nama gari ngemayuh nya?" Ko Minggat. Nyau melut mata iya meda. Ka enggai mayar, malu ga laban bakul udah diengkah ke Rinya ba kaunter endur bebayar.
"Baju ba KL din agi bedau abis dibai pulai ke Miri, nadai agi baju kami duai,"ko Rinya nyaut. Minggat ngilik ke pala aja. Sigi nemu anak iya udu bebelika baju. Udah tembu bebayar sida lalu mupuk ngagai tamu ka bebelika lauk.
Datai ba tamu, nya meh urang ti bepansa begelih enggau Rinya seduai Ilan nyau malik-malik. Nyangka nya ngesuh bau naga ari tubuh seduai. Ukai nya udah mandi deh. Mina ke enda teberunsai aja meh pendiau. Ukai seduai nemu malu deh. Hahahahawaii.. amat tusah iban ari menua ribai. Sigi enda sebaka.....
Mayuh meh bansa lauk ti dibeli sida. Rinya enggau Ilan baka ti gaga ke nama dinga panjung seduai, gaga meli tinduh 300 iku dibeli ba tamu dia. Nemu utai nya nyamai meh seduai iya. Asai ke bulih tekang emas meh seduai iya minching plastik tinduh nya. Bisi endar dikelauk ba pendam pagila ko seduai iya.
~~~~~~
Ading enggau Jiki ti tinduk ba ujung bilik tedani pengudah dipesi indai Jiki ngena ai chelap. Nyau sedanah seduai angkat.
"Mata ari nyau ba atas pala, seduai lalu enda angkat-angkat. Iya ga lalu melempai tinduk ba ujung bilik ditu. Baka ke nadai bilik seduai. Bisi agi arak ba diak, bisi 10 botol agi . Irup ulih seduai. Udahnya tinduk melangkan enggau jani ba dia," ko indai Jiki kutap-kutap. Sigi baka indai meh nya, enti meda anak bakanya.
Jiki enggau Ading semina senyum aja. Udah teleba ninga jaku siru ari indai iya. Seduai iya pan lalu angkat. Ading lalu pulai ke bilik iya empu. Pala agi berasai tengut-tengut. Baru ya meh iya ngirup ngemendar nya. Datai ba agu, Ading lalu birak, berasai pedis endar perut iya. Iya sigi enda tan ngelaban arak langkau, sigi ngujungka iya pedis perut. Pia ti birak, pia ga iya mutah. Nyau tunjik-tunjik kaki iya mutah. Akai dehhhhh, naka pemedis nya mutah kusung aja.' Jerak apai aku ngirup ngemendar nya,haiiiihhh' ko Ading.
Dinga ari sepiak, indai Jiki besai nyawa kutap-kutap nganu Jiki. Bisi endar utai kerja Jiki ba sepiak. Ading ngilik ke pala aja ninga nyawa indai Jiki. Baka sepika 16 ko Ading..hahahahaha.
"Nama pengawa nuan dalam nya Jiki ngelamanya. Sigi tinduk ba agu dia antu tu," ko panjung nyawa indai Jiki. Nyau ka sejam Jiki dalam nya lalu bedau pansut, aruh ya meh indai iya nyau besai letup. "Pajuh nyawa nuan bam ngepam arak setengah kibut," ko indai iya sambil mandam pintu bilik agu nya. Enda lama udahnya, tebuka pintu. Tejengul mua Jiki pansut sambil jari iya nejal lubang pending. Enda liat indai iya, lalu tempap indai iya burit Jiki. Nyau engkakai Jiki, ukai nama tudah nyau engkakai, bekau ke tumpu Rinya kemari agi bedau pedis.
"Mandi agi nuan, nyawa nyau bau nyawa baya. Bau tengung ngalah ke tengung keli. Lagi bai Ading begelumu enggau urang ba ruai tuai rumah din. Bisi baum tengahari tu lagi," ko indai Jiki. Jiki enda nyaut, lalu ngambi kain tula iya deka mandi.
~~~~~~
"Nyadi, utai ti ka dipadah aku baka ke tengahari tu, sida endun Simai sebilik deka mai kitai betulung nyemin pendam niang apai indai umang Mendu ba tanah tembawai sida di ulu din. Barang semua udah disediaka iya, sama bela betulung ngemai barang nya meh kitai pagila," ko tuai rumah ngepun ke jaku.
"Minta sida ke bujang laban sida kering sereta regas agi, ngesan semin enggau tail. Sida ke indu ngemai barang pemakai," ko Minggat ga bejaku. Sida ke bisi ba dia nagunka pala aja tanda mereti ke aum sarinya. Udahnya, sida bela mulaika diri ngagai bilik diri empu.
Rinya enggau Ilan laban ti enda nemu jenuh, udah lepu-lepu ba ai sungai sida dia. Tengahari raya seduai iya mandi. Datai ari pasar tadi,lalu nerjun kediri ba sungai.
Ading enggau Jiki meratika ulah diri menyadi nya ari jauh. "Lain ari urang ulah dua iku nya kih. Kumbai menua urang putih tu nyembui diri ba panas," ko Jiki.
"Kapa enda, uji nuan kin deh...padahka seduai iya bisi baya ba dia," ko Ading. Jai amat ga runding Ading neh. Sangka tak Jiki aja nemu runding jai neh.
Jiki laban tak sigi ka, lalu tabun-tabun iya ngelawa Rinya enggau Ilan ba sungai.
"Lapa seduai mandi ba sungai dia, bisi baya ba dia. Empa baya seduai lagi," ko Jiki ngaga mua takut. Ngica ke dua iku nya takut. Peda enda beapai, enda beindai seduai dua nya niki ke tebing lalu belanda pulai ke rumah. Jiki nyau ngaringka diri ba laman ketawa geli ati. Ading ba berinda baka nya meh, baka ke ditichik iya ketawa. Jai akal dua iku nya neh.
Kasih Rinya enggau Ilan neh wai, benung rindu melepu ba sungai nyadi dugong nyadi ikan duyung, ditipu Jiki ngenyadinya ga.
Kira ke naka tu dulu kitai ngenang cherita sida tu. Salam sayau nuju semua.
Betampung ba tusun 9
ARI AKU,
DARA PANGGAU BUNSU KENYALANG
