معشوقتي بصريه 💘🥰

Part1

معشوقتي بصريه
# هوه الي يحبك هم يجله النوم 🥰

# هم تغمض عيونه ينام متهني 😴

#الجوري🌹🌹

جنت ستوني جايه تعبانه من الكليه لان اني مرحله 3 كليه القانون. اليوم الحر مو طبيعي بالبصره استغفر الله عبالك باب من ابواب جهنم مفتوح على الارض يمكن لوتحط قوري جاي على الرصيف يخدر بسرعه. طبعا على عيني و حضي الحلو كلش عطلت السياره مال عمو (عباس) ابو الخط الي ويصلنه للكليه لان رجال جبير انصيحله عمو). فضطريت انزل و ادكها مشي للبيت من راس الشارع وصلت لبيتنه صرت تنور. المهم تلكتني الحنينه امي بكلاص مي اخته منه و بست ايده ربي لا يحرمني منها.
هسه اعرفكم عن نفسي 😍
اني منار عمري 21 سنه طبعا لاني سمره و لاني بيضه يعني خمريه طولي 160 و وزني 70 عيوني كبار بنيات حاجبي مسمور شعري لونه تمري لنص ضهري. عله فكره اني مو البطله الرئيسيه اني اخته وهسه اني كاعده انتضر ست الحسن تجي من المستشفه لان هيه طبيبه. بدلت ملابسي لبست تراك صيفي لون سمائي فاتح و ارنوب عله الصدر ابيض رفعت شعري ليفوك نزلت يم ماما فتحت الكدوره واشوف ذيج الشوفه 😍 دولمه وما ادراك ما الدولمه مصفطه مثل اصابيع العروس و الريحه تصطر اويلي عشقي ما اكللكم اجه يغمه عليه من الجوع بس اني متعوده ما انام ولا اكل ولا اسوي اذا مو اختي وياي.
اجتي اختي الغاليه تقريبا الساعه 4 العصر اني اجيت قبله بنص ساعه المهم طبت اختي سلمت و مبينه تعبانه و ميته من الحر 🥵
ساره : السلام عليكم
الام : هله حبيبتي
منار : وعليكم السلام
ساره وهيه تضحك على منار : ادري الي شوفج شيكول ما ماكله ابد لو اهلج ما ينطونج اكل
منار : شسوي عشق وغرام حب وهيام افقد عله الدولمه
ساره : ادري بيج ام بطن عندج كرشج اهم من الكل
منار وهيه تفتخر و ترفع ياخه التشيرت : شعبالج كرشي و من بعده الطوفان
ساره : ديلا راح ابدل واجي بسرعه صبي علما اجي
منار : لا ناكل بالكدر اطيب
ساره : مو كتلج ام بطن
مرحبه اني ساره عمري 24 سنه طب ( اختصاص جراحه عام) صار سنه من تخرجت تعينت بمستشفه ال&*$& الحمد الله حياتي عاديه صح الحزن هو البطل الرئيسي  بحياتي بس من اشوف مصايب الناس اكول الحمد الله مصيبتي اهون من غيري الحمد الله عله كل حال المهم اجيت تعبانه من الدوام و حااااااره نار 🥵 دخلت للبيت شميت ريحه الدولمه و الدبدوبه (منار) حاطه راسه بوسط الكدر. طبعا ماكلتلكم مواصفاتي  اني بيضه عيوني ملونه و كبار  ( تركوازي لا اخضر ولا ازرك) طولي 165 وزني 65 شعري لونه زيتوني واصل للكتف اني اشبه امي طالعه عليه.
دخلت لغرفتي ويه فتحه الباب انفتحت كل دفاتر الذكريات  اووفف ارجع و اكول الحمد لله.
اخذت ملابس و دخلت للحمام و اخذت شاور لبست تراك صيفي وردي فاح شوي عريض بالصدر دبدوب ابيض لبست الشبشب و انزلت لكيت ام بطن تنافخ صايره حمره الغضب و الجوع كلتله
ساره : اي ليش تنتضريمي جان اكلتي من اجيتي تعرفيني اني اتأخر بالدوام
منار بغضب : وتدرين بيه ما اكدر بلاج حته المي ما اشربه شون اكل بلاج ما اشتهي الاكل و ما تنفتح شهيتي
ساره : ادري اني اختج لو شيشه دوه مشهي للاكل
منار بخفه دم : لا خبوب مقوي حديد 😛
ساره : داكلي و سكتي
منار : حاضر سيدي
ساره وهيه تاكل : اي شونه الدوام اليوم
منار و الاكل بحلكها : امم زين لا بأس
تغذن البنات و غسلن المواعين و عزلن البيت و المطبخ تعزيله خفيفه لان الشباب اخوانهم اذا اجوي تكوم القيامه بالبيت بنخبص البيت منهم و من ازعابيلهم و ساره مدمنه تنضيف المهم نضفن البيت و رتبنه و صعدن كل وحده لغرفته.
طبعا عائله ابو غزوان متكونه من
الاب احمد : عمره 59 سنه مدرس متقاعد لان مريض و ما يتحمل  كلش يتعب بالتدريس
الام ايمان : عمره 45 سنه مدرسه
غزوان : عمره 30 سنه مهندس معماري وره ما اتخرج فتح مكتب رسم خرائط و ديكور للبنايات و البيوت
علي : اخر العنكود 17 سنه طالب خامس عدادي متفوق بريد يصير طبيب عسكري مثل ابن عمه فراس
و الباقين راح نطرقلهم بعدين بس ننطي عنهم فكره.

ابو سجاد محمد عم ساره الجبير عنده 5ولد و بنيه

ابو فراس مرتضى الوسطاني عنده 3 ولد و 2 بنات

ابو باقر جعفر عمهم الزغير ازغر من ابو ساره عنده ولد و بنيه

عمتهم ام مصطفى ساجده الكل يحبه لانه حنينه عده 4 ولد و 3 بنات

ناهده ازغر العمات عده بس نور عايشه بعيد عنهم شويه....

*********************
اتمنه عجبكم البارت اتمنه ما تنسوني بالتشجيع  لان
هاي اول روايه الي
لاتنسونه بالتسويط انتضرونه بالبارت الجاي

# الجوري 🌹🌹🌹🌹🌹