#ابتزاز
بقلم زهور جمال الدين 🌷
🌺الحلقه التاسعه🌺
"حقيقيه ممزوجه بالخيال"
_
فى حوش فاطمه ...
البنات كلهم قاعدات بايتات عند امهم ببناويتهم ... حتى صالحة بيتوها معاهم هيا وبنتها شهد ..
البنات جنب امهم .. وبناتهم حتى هما مقعمزات معاهم قبل مايركبو لى دار هند
-فاطمه / ياااربي استر بنيتى ..واحفظهالى وطولى فى عمرها .. نجيها وعليها على من يعاديها ياااارب
-نادية/ يااام الناس تقول اللهم استودعتك ابنتى وبيتها ومالها وحالها وزوجها بعينك اللى لا تنام يااارب العالمين
-فاطمه / منعرفش نقول زى اللى قلتيه .. المهم انقول يااربي ودعتك بنتى
-نادية / مش هكى يااام
-مفيدة / ياودى ليش تكثري على امك .. ربي يعرف يسمع منها دعائها بي ثقافتها ..لانه هوا عالم اللى فى قلبها .. وبعدين ربي يعرف ميمونه ... وميمونه تعرف ربي ..
ضحكت مفيدة / تعرفيها القصه ولا يا ناديه
-نادية / طبعا نعرفها زمان كان يحكيلنا فيها بوى الله يرحمه..
-مودة / احكيهالنا يا ماما بالله عليك مانعرفوهاش
-مفيدة / هيا بمعنى قولى لى ربي اللى فى خاطرك ونيتك وهوا تويفهمها منك ويستجيبلك
-انتصار / شوقتونا يا عمتى .. بالله احكوهالنا
للبنات كلهم مع بعضهم / احكوهالنا بالله عليكم
-ابتسمت ناديه/هدا ياستى زمان كان فى مجموعه من الدعاة الصالحين ....ماشيين فى سفينه فى البحر ...شافو جزيرة من بعيد مشولها يجرو بيش يستريحو فيها.. لقو مراءة وحدة بس عايشة فى الجزيرة بروحها .. اسمها ميمونه
-سلمى / باهى وبعدين شوقتونا
-ناديه / لما خشو للجزيرة جتهم ميمونه وسلمت عليهم .. بدو يهدرزو عليها ويفهمو فيها ان فى حاجه جت للدنيا اسمها الدين الاسلامى.. وان الرسول هو سيدنا محمد عليه الصلاة والسلام .. وان الله امرنا بالصلاة ..
-مودة / باهى وبعدين
-نادية / قالتلهم انا من زمان انصلى وديما نقول هالدنيا هادى كلها لابدة من رب كريم هوا اللى خلقها .. فقالولها الصالحين كيف تصلى وشن تقولى .. قالتلهم فالصبح ووالليل يقيم يديا للسما ونقول / ميمونه تعرف ربي وربي يعرف ميمونه ..
قالولها لاااا مش هكى الصلاه .. لازم من الوضوء والركوع والسجود ... وقفو علموها كيفيه الصلاة .. وصلت طول اليوم الخمس فروض
-شهد / باهى وبعدين يا خالتى
-نادية / ياسيدى صلت وراهم اليوم اكله وثانى يوم ناضو من الفجر خدو سفينتهم وودعوها وخشو للبحر ...
هيا مقعمز تشبح فيهم راحلين وبدت اتراجع فى الصلاة فى دماغها لقت روحها نستها ... طلعت تجرى واتأشرلهم بيدها يا جماعه الخير نسيت كيف تكون الصلاة ... هما مايسمعوش فيها ايأشرولها بمعنى شنو ... طلعت تجرى رجليها تمشى عالبحر تبى تلحقهم ... هما تفاجئو بالمنضر اللى قدامهم انها ميمونه تمشى عالميه منغير ماتحس بنفسها .. وعرفو انها من الصالحين مع انها مع صلتش لى ربي ولا ركعه فى عمرها ولا خاشه للدين الاسلامى ...
قالولها / بالله عليك بري .. لله فى خلقه شؤون ..ميمونه تعرف ربي وربى يعرف ميمونه
-مفيدة / ومن هنايا جى المثل للى مش زابط كيف يقول الدعاء عالمزبوط يقولو خليه ربي فاهمه
-مودة / قصه تهبلللل
وقفت انتصار / هيا نوضو يا بنات منخش دار هند ومنرقد
-البنات كلهم وقفو / هى
شهد وقفت معاهم .. ومشت لى امها تغطة فيها .. لان صالحة رقدت لا خاطرها فى هدرزة ولا سهر
-نادية / بري مع البنات شهودة تو نغطيها انا صالحة
-شهد / باهى يا خالتى
