#ابتزاز
بقلم زهور جمال الدين🌷
🌺الحلقه السادسه🌺
"حقيقية ممزوجه بالخيال "
_
خش حمزة لقى هند راقدة وعيونها مغمصه ..
قعمز عالكرسى اللى جنب سريرها .. قرب منها ..
-مسك يدها / هند ... هند ...
حط يده على خدها / هند فيقى منغير دلع عاد ... هنودة
انفتح الباب منغير مايحس بيه حمزة .. ممرضه تبى تخش تغيرلها الغطاء .. قعدت واقفه .. معجبه بي حنان حمزة على هند ..تحسابه راجلها
-قرب حمزة يد هند وباسها/ انسجمت معاك هلبا .. ردى بالك تمشى وتخلينى ..
صكرت الممرضه الباب وطلعت .. ومشت تجرى للممرضات
-الممرضه/ حيه كان تشوفو راجلها كيف يحاول انه يفيقها .. وكيف ماسك يدها ويبوس فيها .... ياحليلى عالرومنسيه
-ممرضه ثانيه/ زعما قاله الدكتور
-الممرضه/ والله مندرى عليه
وحمزة قاعد لداخل مايبيش يطلع ويخليها .. ماسك يدها ويحرك فيها بالك تحس وتصحى ..
-حمزة / هند .. هيا طيحة بسيطه معقولة انتى رقيقه لهدرجة ماتحملتيهاش ...
باس يدها وحطها جنبها / الباين عليا حبيتك يابنت ..شعور غريب فى داخلى .. كان نلقى نحطك توة فى جيبي ونطلع ..
حط يده على خدها / ندسك مايشوفك حد غيرى ..
سكت شوى / هند نوضى خلاص عاد
فتحت الممرضه الباب مرة ثانيه / خوى لو سمحت شوى.. بنغير الفرش ....
حمزة ماسك يد هند وماتلفتش للخلف/ حاضر تو نطلع ..
وقف وتلفت بيطلع ...
-الممرضه/ حضرتك زوجها
-حمزة / لا انا خطيبها
-الممرضه / اهاا😍... ربي يجمعكم عالخير يااارب
-حمزة / بس ممكن نطلب منك طلب
-الممرضه/ تفضل
-حمزة / نبيكم ماتقولوش لى اى حد انى جيت هنايا فالليل ..
لو سمعو بيا خوتها جيت هنايا فالليل حيديرولها مشكلة
-الممرضه / مش قلت انك خاطبها
-حمزة / خوتها صعبين .. مايمشيش معاهم كلمه خطيبها
-الممرضه / اهاا
-حمزة / انتى شن اسمك
-الممرضه/ اسمى سميرة
-حمزة / عاشت الاسامى ياسميرة .. تعشيتو انتى البنات
-الممرضه سميرة / تعشينا من ماكلة المرضى 😏
-حمزة / تو نبعت واحد من الممرضين توة يجيبلكم عشى .. فى كافتيريا تحت
-سميرة 😍/ فى كافتيريا تقعد فاتحة للساعه واحد والنص فالليل
-حط حمزة يده فى جيبه وطلع فلوس/ باهى شن رايك تنزلى انتى تجيبيه العشى
-سميره تحشمت / لااا نهارى والله ماصارت
-حمزة / ياودى هيا هيا .. بدل مانبعت ممرض انزلى انتى
-خدت سميرة الفلوس/ باهى غير نغيرلها الفرش وننزل
-حمزة / تصبحى على خير
-سميرة / قتلك اوخى
-تلفتلها حمزة / نعم
-سميرة / الدكتور اللى شاف الحالة قاعد مناوبة الليله .. كانك تبى تمشيله تسأل على خطيبتك برة
-حمزة/ هوا وين
-سميرة / فى الغرفه عاليمين اللى فى نهاية الممر
___________________________________________
_
فى حوش فاطمه
فاطمه وبناتها لما سمعو بي هند لحقو للمستشفى من حوش صالحة .. لكن لما روحو من المستشفى مشو طول لى حوش امهم ...
