مرحبا
اني اسمي نور من بغداد وحيده اهلي ادرس اول كليه قسم اداره وقتصاد حياتي هادئ من الكليه للبيت وبلعكس ماعندي مشاكل ماعندي ختلاط باحد غير بس صديقه وحده عندي وقت العطل نظل نتراسل على الفيس
... فد يوم من الايام اهلي راحوا البيت عمتي لان قريبين عليه اني مرحت وياهم لان جنت ظايجه ومعاجبني اطلع راسلت صديقتي اسمها ورده كلتلها ظايجه وملانه وماعندي شي اسوي لان الشخص من يكون وحده بلبيت ماعنده لا اخ ولا اخت وحيده ( ما عنده احد يتكافش وياه )يظوج
ظلينه نسولف اني وياها كالتلي ليش متخليني اظيفج على كروب شباب وبنات اشويه تتونسين وتغيرين جوو كلتلها تمام ظيفيني ظافتني اتونست وكلش تعلقت بلكروب نظل كلنه نسولف ونظحك لساعه ٣ الفجر فد يوم نمت العصر الساعه ٤ مكعدت لساعه ٩ ماعندي شي اسوي رحت تعشيت ويه امي وابويه طلعت ع اليوتيوب كيكه الشوكلاته اول مره اسويها وطلعت كلش طيبه طكيتلها صوره ودزيتها على كروب اكو شخص ظايفي جديد عل الكروب اسمه احمد كلي بلعافيه اني كلش احب الكيك جاوبته الله يعافيك يمعود شيرادلها ادخل للمطبخ وسويها واي شي تريده راسلني واني اساعدك
وهو عجبه الموظوع وحب يسويها مفاجاه الامه لان امه يكول تعبانه وعنده اخته مزوجه واخو اصغر من عنده
سوى الكيكه وظل يراسل واني اعلمه شراح يسوي وانطيته المقادير ودزيتلها الفيديو ويكول طيبه صارت
مرت الايام واحنى نتراسل عل اكروب دائمآ ونظحك ونسولف ويه الكل طلع هو نفس الكليه مالتي بس غير قسم صار يراسلني على الخاص وصارت بينه علاقه اعجاب بعدها صارت علاقه حب صرت احبه كلش وتعلقت بيه وهو يكول اني كلش حبيتج وتعلقت بيج وظلينه نحجي ونسولف التقينه مره وحده اذا يخابر مااشيله يظل قلقان عليه ومن اتصل بي الف سؤال يسأل ليش مجاوبتي وشبيج خاف مريظه
حبيت هتمامه كلش
صار يغار عليه حيل خلاني امسح الكروب الظافتني ورده بي ع الفيس وصرت ما عندي اي شي بس اخابره لو اراسله واحجي ويه ارتاح على سوالفه لظحك واهتمامه بيه امي اكثر من مره شافتني اظحك ويه نفسي تسألني شبيج اكوللها مابيه شي بس اكو برنامج شفته يظحك وظل بالي مره اكو شخص اتصل عليه بلغلط وبنفس الوقت هو اتصل طلع عنده مشغول تخبل ظل يومين ميحجي وياي ليش تليفونج مشغول كتله واحد اتصل بلغلط بعدها تصالحنه 😊راد مني باسورد الفيس مالتي اني من حبي بي وثقتي انطيتهيا ورجعنت علاقتنه تقوى وتطور خابرني كلي اني اريد اخطبج اني كلش فرحت اتفتنه يجون اهلى علينه يوم الجمعه
صار يوم الجمعه كعدت فرحانه
نزلت تريكت نظفت البيت امي ظلت صافنه عليه تسألني شنو سبب النشاط من الصبح واني اظحك خلصت شغل البيت رحت سبحت كعدت اسرح بشعري دك تليفوني يكولي مااكدر اجي لان امي تعبانه كتله على راحتك سديت التلفون كلش انقهرت بس بنفس الوقت عذرته امه اهم لان خطيه اكيد تعبانه
وصار يواعدني بعدها مرتين وميجي كل مره يطلع عذر واني اصدك اخر مره حددنه موعد كل عاده وفرحتي بعدها نفسها بس خايفه ميجي وكل عاده خابر بس هل مره عذره اخته تخربطت بلطريق اني بعد مااصدك بي صرت واحسه صار يبتعد عني واهتمامه قل مو مثل قبل صار اذا يريد يدك مره وحده بليوم واذا ادك عليه يطلع كله مشغول وميكلف نفسه ويدك عليه
اني ادمرت حياتي بعد ماعيشني احلى ايام احس نفسي جنت طايره وهسه مدمره بسببه اذا ادك عليه ميشيله واني سحبت نفسي من عنده امي ابويه لاحظوا تغير البيه حاولوا ويايه بس يريدون يعرفون شبيه اني اتحجج اكوللهم تعبانه من الدراسه اكلي ظعف كلش تجي ايام اصوم حتى محد يجبرني اكل تعبت نفسيتي حيل
اخر شي امي دخلت عليه للغرفه سألتني شبيج ظلت تظغط عليه اني كلش احب امي ومتعلقه بيها سولفتلها كل القصه تفهمت الموظوع بصعوبه بعد زعل ورزايل دام سبوعين صديقتها جانت يصيحولها شيخه وهي جوارينه كلتلي بدلي وامشي وياي لشيخه رحت وياها اخذتلي استخاره بلقران كالتلي حبيبتي هذا الشخص كاعد يلعب عليج اتركي
بعد مرجعت للبيت دخلت لغرفتي ظليت ابجي ليش هيج سوى اني شنو سويتله ظليت يومين بغرفتي بس بعد بجي ونوح قررت انسى وابدي حياه جديده بعد تعب واصرار والفظل الامي والصديقتي رجعت لحياتي ومو بس هيج حاولت اختلط بلمجتمع وتعرفت على صديقات جديده والحمدلله والشكر جنت ماادز صوري الاحد لان مثل متعرفون ماعندي غير بس صديقه وحده وهي دائمآ وياي فماادز صوري على الفيس اخاف من كلشي جنت غيرت الفيس مالتي وهذاك الفيس الاخذ حسابه مسحته بلعافيه عليه 👊
العبره من هاي القصه يابنات ياحبايبي فدوه لاتوثقون بسرعه باي احد
احنى المشكله كلوبنه طيبه وعبالنه كل الناس مثلنه طيبين
(اختاروا صح )
الله وحده بس يعرف بكسره الكلب شنو الم وجع اذا نور لكت شخص يساندها ويوكف وياها اكو بنات ماعدها احد لان احنى بمجتمعنه عيب وحده تحب
مع احترامي لشباب المحترمين اصحاب الكلمه لان الرجال ينعرف بكلمته مو يعلق البنيه بحبه وينهزم 😠
وهاي قصه وحده من متابعين قصتي زواج قاصر دخلتلي على الخاص حبت انو انشرها
ترى الله وحده يعرف شكد شتاقيتلكم
احبكم كوووومات 💓
