Sarung aki na ambisyoso an ipinangaki sa kinaban, paborito niyang gibuhun an maglalakaw-lakaw sa natad tanganing mahiling an sirang kan aldaw na nagpapaogma sa saiya.
Sarung magayon na aldaw an nagsabat saiya sa saiyang pagbungkaras. Naging maogma an aldaw niya kan nagaadang-adang na aldaw, dae niya maipaliwanag an kusog na naiitao kaini sa saiyang hawak. Gabos na kaogmahan ay napara kan biglang naglaog sa eksena an mga ulap. Nasuya an lalake asin nagpalukso-lukso sa sobrang pagkaangot, ini saiyang paagi tanganing ipaaram sa ulap an raot na naitatao kaini sa dating maogmang lalaki. Biglang nagpanting an talinga kan ulap kan madangog niya an maraot na taramun kan lalaki laban saiya, naghali siya tanganing ipaaram an maraot na pangyayari sa saying mga pag-iriba.
Nasuya an gabos na joven ulap sa saindang naaraman, nagharale ini sa lugar kan historyahan asin nagsumbong sa saindang mga magurang. An duros an naghatod kan balita kay Asido kan maraot na pangyayari, nagpakawala ini kan saiyang kidlat asin hiling niya sa harayo niyang kinamumugtakan an pagkasulo kan kahoy na mangga na tanum kan lalaki.
Dinuman ni Asido an lalaki tanganing labanan. Daeng balak na magpadaog an lalaki asin nagkuha nin sundang. An sundang na saiyang dara iyo an pinakahalabang sundang sa saindang lugar. Tinusok kan lalaki an ulap sa sobra kaining kaangutan. Nakitik an ulap sa pagtusok kan lalaki, naghangos ini asin ipinatama sa lalaki an bagsik kan saiyang kikilat, natunaw an bakal kan sundang, asin nagkalayo an kahoy na kapot niya. Napanganga an lalaki, asin nabigla kan namatean niya an asidong uran na nagtama sa buhok niyang bagong bulog. Naparakurahaw an lalaki sa sobrang sanit, asin napahibi kan an saiyang payo napanit. Grabe an panghinayang kan lalaki lalong gayo na kinagaan niya an orgulyo niyang buhok kan espesyal na pamapatagas na hale sa pulot kan may ulod okra na iniregalo kan kataid niyang anggot saiya.
Sobrang pagka-anggot an namatean kan lalaki, sinulo kaini an kabulbuldan ta habu ni Asido na maparong an asu, na nagpapaluya sa saiya. Asin nanggana an lalaki; nagkatarakot an gabos na ulap sa asu na galing sa kasulo. Nagruluwasan an allergy kan mga ulap, nagkaigwang pulang butog-butog an saindang mga hawak asin nagtikwasan an mga ini ta dae nakaya an sobrang sanit na naitao kan asu. Nadaog kan lalaki si Asido. Grabe an kaogmahan kan lalake ta nadaog niya an kagggibo kan dakula niyang panit sa gitna kan saiyang payo.
Naaraman kan gabos na ulap an pagkadaog nin pinakamakusog na ulap, asin mayo ng maski saru na nag-agi na ulap kun sain naka-istar an maisog asin panit na lalaki.
Naogma an lalaki ta mayo ng hulang sa saiyang kaogmahan, asin hiling na niyang marhay an saldang na panu nin kagayunan.
Nagsawa an lalaki sa saiyang nahihiling sa aru-aldaw. Mayo na talagang ulap an namasyar sa padaba niyang lugar. Nagpatuloy an siring kaining pangyayari sa halawig na pnahon. Naging disyerto asin nagadan na mayong tubig sa lawas an mahambug na lalaki. Nagadan ini siring kan sarong sugok na may baak sa payo huli sa panit na regalo ni Asido.
