راقصة سرقت قلبي

حلقة 1

حلقة 1
وقفت بسيف تلملم في روحها ... شعرها مكركب و عينها زرقة و منفوخة ... تكات بيدها على الحيط و مشات راحت للبيت تانية ... جبدت جبة من لخزانة حطتها فوق السرير و راحت للدوش .. نحات قشها رماتووو في لرض و حلت لمرش و دخلت تحتو ... لماا سخون نازل على كتافها ... يحرق في بدنهاا .. وهي مش حاسة .... وجيعتها من داخل اكبر من اي وجيعة تحس بيها في بدنها .. كانت تحس في قلبها راح يتفلق .. مخنوقة ،، تاعبة ،، مهدودة ،، كارهة .. حياتها رجعت ضلمة من نهار لي عرست فيه ب عمار و هي تعاني جامي لا شافت معاه نهار مليح .... ديما في لمشاكل .... لا يخدم كي رجال لا يصرف عليها .. و فوق شي هذا يضربها صباح و عشية معيشها معيشة كلاب .... عكس واش كانت تحلم بيه ... وقت جا خطبها من عند بوها فرحت بزاف .. لانو اخيرا الدنيا ضحكت في وجها .. كان في بالها راح تتهنى من لفقر و لمزيرية لي عايشة فيهم كانت تتخيل انو عمار فارس احلامها و معاه راح تتبدل حياتها .... عمار لي كل بنات لحومة حاسدينها عليه .. زين و مال و زيد عايش في لخارج ... ما عندو ما خصو و كل شي متوفرلو هذا شي لي يعرفوه عليه ناس حومتو ... ميس كانت متصورة حياة غير لحياة لي عايشتها معاه ليوم .. حلت عينيها و عدات يدها على شعرها .... كل يوم تزيد تضعف تخمم تنتحر وتخلص روحها من لجحيم لي عايشة فيه مي ما تقدرش لانو لموت بيد ربي و هو وقت لي يحب راح يهز امانتو ما عندهاش لحق باش تنهي حياتها ... لفت منشفة عليها و خرجت من دوش .. راحت وقفت بحذا لمرايا خزرت مع وجها مليح و هزت مرهم للجروح دهنت عينها و رجعتو لبلاصتو .. من بعد لبست حوايجها و راحت للكوزينة تحضر لعشا .... لوقت هذاك عمار بدا يفيق من الحالة لي راهو فيها ..مسح خشمو و وقف شاف مع لبيت .... كانت مكركبة وكل الاثاث لي فيها مكسر و مطايش في لرض .... خرج للكولوار و يعيط على طول صوتو ...
- ميس ميـــس
حطت واش في يدها و راحت تجري ليه .... كان يتمايل يمين و شمال ... ريحة شراب لي طالعة منو تخنق ... قربت شوي لعندو و حطت يدها على خشمهاا ....
- انعم
حكمها من يدهاا و كبس عليهاا بكل قوتووو لين حست ب عضامها راح يتسكرو
- وجدي روحك باش نروحو
- بصح راهو ليل
هز يدو عطاها كف لفلها بيه وجهاا و سكتهااا
- كلمة لا ما نحبش نسمعها
- اكي
دزها بعيد عليه و راح للبيت و هي بقات واقفة في بلاصتها حاطة يدها على خدها و تبكي .... واش بيدها تعمل غير لبكا .... مجبورة تتحمل لمعيشة معاه .... و تتحمل الضرب و الذل لي انو ما عندها وين تروح .... بلاد اجنبية و ما تعرف حتى واحد فيها .... محتمة عليها لحياة هذه و محتم عليه عمار .. مسحت دموعها بكف يدها و وقفت راحت للبيت .... شافت معاه ... واقف يبدل في حوايجوو و يغني .... زاهيتلووو علخر ... خزرها بطرف عينو و تكلم يامر فيها
- اتحركي بدلي لخماج لي راكي لابستو و خلينا نروحو
حركت راسها بإيه و راحت جيهة سرير هزت في يدهاا صاشي لي جابهالها و دخلت ... غير فتحتها عينيها تحلووو من صدمة حست دم جمد في عروقها مش مصدقة لوقاحة لي وصل ليهااا ... حطت يدها على جبهتها و عضت على شفتها بغزول ... مش قادرة تتصور روحها خارجة ب لبسة كيما هكا .... و مش فاهمة اصلا واش قاعد يخطط ... عضت على صباع يديها و نحات لجبة .... لبست القطعة لفوقانية و كملت تانية من فوق قلبها تعمل هكا و لا نقول من لخوف قاعدة تساير فيه ... حطت مكياج خفيف و غطات ضربة لي في عينها بشعرها و خرجت لعندو ... غير شافها زفر و قرب حكمها من يدها .... دورها في بلاصتها و جبدها ليه ...
- جيتي تقتلي
- مغسي
هز لفاست تاعها لاحها على كتافها و خرجها معاه ... غير طلعت عينيها لمحت طموبيل كبيرة كحلة .. مڨارية قدام دارهم ... شافت معاه و هزت حاجبها
- تاع من هذه
- مش شغلك اطلعي
دزها طلعها في طموبيل و طلع قعد بحذاها .... دورت ليه
- عمار فهمني واش قاعد يصراا معاك
- ااووففففف بلعي فمك علياا
نزلت عينيها و قعدت تلعب بصباع يديها .... باين ناوي على شر مدام مش حب يخبرها وين مديها ... تعررفو مليح و تعرف وقت يكون يخطط لي شي حاجة يولي يتهرب من الاجابة بالصياح و العياط .... حطت راسها على لكارو و غمضت عينيها ... بعد نص ساعة تقريبا حبست طموبيل ... ميس كانت راقدة حتى حست بيد عمار كي تحطت على فخدها لمعري و كبست عليه ... حلت عينيها شافت معاه
- شوفي معايا مليح و افهمي واش راح نحكي معاك و ديري واش نقلك عليه و الا صدقيني راح نقتلك و نتهني من همك
حركت راسها بإيه و هو كمل يحكي
- لبار هذا تاع صاحبي و هو يحوس على وحدة تشطح شرقي و نتي بسلامتك ت#### تقلبيهم تقول جنية على هذه شي خبرتو عليك و حب يشوفك اذا عجبتيه راح يخدمك نتيا
بحلقت فيه مليح و بلعت ريقها
- ما تقوليش جايبني هنااا باش نشطح
- واش كنت نحكي !!! نرمالمو تكوني فهمتي !!
بعدتلووو يدو من فوق رجلها و فتحت لباب تاع طموبيل و نزلت تجري هاربة و مش عارفة منين جاتها لقوة باش تهرب منوو ... مي قبل ما تلحق تبعد لحقها و حكمها من يدها ... كان وجهووو احمر دم و عينيه خارجين من لغش
- وين رايحة
- سيبنييي نتااا مهبوول و محال نزيد معاك دقيقة وحدة
حكمها من يدها و حصرها لعندو .. حطلها سلاح في جنبها و يحكي
- ما تخلينش نقتل ر#### هنا تعرفيني كي نتعصب ندير اي حاجة اتحركي
كركرها من يدووو و راح ناحية لبار ... وقف قدام لباب رجع سلاح لبلاصتو و قرب لوذنها
- من الاحسن ليك تريحي عاقلة هكا
سحبها معاه للداخل ... وين كان جو تاني غير لجو لي متعودة عليه بقات تش.وف في كل جيهة ..دخان معبي الدنيا .. موسيقى عالية ... بنات عرااياا و يشطحووو و يميلووو ... رجال قاعدين فوق طوابل و يشربو ... قلبها تزير عليهاا ... تمنات تهرب من تم مي ما عندها وين تروح ...عمار راح يقتلها و يشرب من دمها ... اذا خممت تهرب منو .... قعدها فوق لكرسي و طابس يحكي معاها
- ريحي هنا درك نرجع

..................#مايا