#اسيرة_الشيخ_شاهين

بارت 2

#اسيرة_الشيخ_شاهين
بارت 2
ريتاج الوسوي ،،،

حازم گاعد بزواية الغرفه ومخلي ايديه على راسه
فجئه تدخل سلوى
تبجي وتشهگ ويا بجي مريم
...حازم هاك اخذ مريم لذوله الناس الي يردون يتبنون طفل بلكي يعالجونها

حازم..بصدمه واستغراب..صدگ تحجين
يعني موافقه انطيها الهم

سلوى تهز راسها بالموافقه ...وترجع تبجي

حازم ..يبتسم نص ابتسامه ..سلوى حبيبتي صدگيني لمصلحتها وهالشي راح ينطيها فرصه بالحياة
انو تعيش
عيشة ملوك ....وداعتج باجر عگبه تكبر واصير هيه الوريثه الوحيده
الهذوله المسيحين بس يموتون اروح اجيبها منهم

سلوى..تمسح ادموعها..صدك يعني راح اشوفها بعد
ماانحرم منها للأبد

حازم ..اوعدج يجي اليوم الي تشوفينها بيه
لا ويمكن تعيشين بقصرها بعد
بس خليها عدكم شكم سنه علما يسفرونها ويعالجونها النه

جهزتلها ملابس وخلتهن بجنطه ودموعها تنزل وحده وره الثانيه..بقهر ..
العوز كافر ممكن يخليك تتنازل عن اغلى شي تملكه في سبيل تمشي حياتك..
سكتتها وگدرت اقنعها بشكم كلمه
بقيت اليل كله گاعد ..من الفجر وقبل ماتگعد سلوى اخذت ملابسها واخذتها

اجرت جارنا ووداني للگراج صعدت البغداد
طول الطريق مريم تبجي تگول ماما وتتقيأ عندي ماعرف شسويلها

جانت مريه جبيرة بالعمر گاعده يمي
تباوع عليها وگالت ..يمه چا هاي البنيه امها وين

سكتت وماعرفت شجاوبها
..هاا يمه مو احجي وياك امها وين

حازم..حجيه امها متوفيه وماخذها للطبيب

..ياا عمت عيني
شو اطينياها فدوة اغديلها
بس شلون تگول ماما اذا امها ميته

..حجيه تبجي على عمتها هيه المربيتها

خلتها بحضنها شويه سكتت ..ونامت ..بقت عدها لحدما وصلنه لبغداد
اخذتها وتشكرت منها
انوب رحت للكراج اجرت سيارة والعنوان مخليه بجيبي هم نطيته اله ووصلني
لبيت صفوان ..همه من طبيعتهم باب الحديقه مايقفلونه بس مردود

فتحته وجان اشوف جنط كبار مطلعينها بره
وكراتين هم
دگيت الباب وانه حاضن مريم ..طلعلي صفوان
..اهلا وسهلا ب اخ حازم زارتنه البركه

تفضل
..وبالمهلي تسلم استاذ

دخلني للصاله اغراضهم هوسه والقنفات مغلفينها بنايلون
صفوان ...اعذرنه البيت مهوس
لان طيارتنه بكرا ان شاءالله رايحين على تركيا

حازم ..اهاا توصلون بالسلامه ان شاءالله
..يدنگ ويسحب نفس ..ويرجع يرفع راسه ..استاذ انته طلبت مني اجيبلك طفل تتبنا

..صفوان يباوع للطفله ويرجع يباوع لحازم ..اي صح

حازم..وانه جبتها
هاي بنتي انه راح انطيها الك لان مريضه وعلاجها بس بره
وتعرف بحالتي الماديه موزينه
واذا بقت عدنه تموت ..لان مانگدر نسافر ونعالجها ..

اول واحد خطر على بالي هو انته استاذ
شنو رأيك تاخذها وتتبناها احسن ماتموت وبهاي الطريقه هيه تعيش
وماينكسر گلب امها عليها

صفوان بتعجب ..معقوله؟ يعني امها هسه عادي عدها احد ياخذها منها

..والله يااستاذ شگلك
امها حالتها ماتسر عدو ولاصديج الصبح بگتها بوگه منها

الله وكيلك لو ماالحاجه ماجبناها بس خفنه تموت عاد عدله وبعيده احسن ماميته ومأيسين منها

صفوان ..تمام والمطلوب

حازم ..بس تعالجونها وتاخذونها

لشويه دخلت زوجته سلمت عليه وبعدها صفت وي زوجها وحجو بينهم بهمس ماعرفت شنو
وهيه الفرحه بينت على وجهه

رأسن اجت عليه واخذتها مني ..شنو اسمها

..اسمها مريم

..صدوگ
الحمدالله اسمها على ام يسوع
العذراء بوستها ...يحفضج الرب يابنتي

اخذت مريم وراحت لداخل البيت صفوان راح وراها بالربع ساعه انه مشتول الوحدي
لا من مرجعين بتي ولا من محاجيني

اجه صفوان واجت زوجته شايله مريم والضحكه على وجهه تلاعب مريم

..اني اشكرك اخ حازم انته فضلت عليه
وهذا جميلك مراح انساه الك صدگني لتخاف عليها هاي من اليوم طلعت من عهدتك وصارت بعهدتي
اني و نيرمين
راح نسافر لتركيا نقيم هناك ونعالجها

حازم ..بس ديرو بالكم عليها ترا هاي الغاليه

صفوان ..لاتوصي حريص
وبقه يبوسني ويتشكر مني ..ردت اگله ينطيني فلوس بس عزت عليه
شلون اگله انطيني فلوس بدال بنتي واعتبر بايعها بيع

سلمت عليهم وطلعت ..خاطري مكسور
رجعت بطريق رجعتي واني بالسيارة گعدت افكر
شلون عفت قطعه مني ببيت ناس ماعرفهم ولا اعرف عنهم شي
وفوك هذا كله مو مسلمين
مو على ديانتنه

انه ليش سويت هيج شنو هالتصرف الغبي المفروض اخليها عندي ببيتي تعيش وتموت عندي
واذا الله كاتبلها عمر راح تعيش
سواء عندي او عدهم
الطبيب مجرد سبب .قررت اروح ارجعها......

حاجيت السايق ونزلني اخذت سيارة اجرة من الشارع وورجعت لبيت صفوان
نزلت بالباب دگيت بالجرس ماكو احد طلعلي الحارس
گال ..صار ربع ساعه من راحو
باوع ع الساعه وگال لازم هسه طيارتهم طارت لان صار موعدها

بقيت اصفگ بأيديه من الندم ليش سويت هيج
وليش تصرفت هذا التصرف
ليش ماخذت حجاية سلوى من گالت لا
هسه شگول للعالم لو نشدتني عنها


رجعت للبيت لگيت سلوى املخه روحها تبجي وتلطم
اول مادخلت ..لزمتني من ياخة الدشداشه ...وبصياح ..وين وديت بنيتي
وين اخذتها

حازم ..هاي شبيج سلوئ تخبلتي
غير انتي گتيلي وديها الهم

سلوى..وانته صدگت ترا جنت اتكشمر وياك مو صدگ
فدوة اغديلك روح جيبها ابوس ايدك
نزلت على رجلي تبوسها وتبجي

نزلت للگاع ..گومي مايصير تسوين هيج بروحج
گولي الحمدالله والشكر من لگينه ناس يعالجونها احسن ماتموت وتدفنينها جوا التراب

بقت تبجي وتصيح
الناس سمعو صياحها واجو گتلهم مريم ماتت
وسوينالها فاتحه ..حذرت سلوى ماتحجي الحقيقه لأي احد
لان الناس تاكل وجهي كلها تلومني ليش تنطي بنتك
ويعتبروني بعتها
لذالك ماحجيت ولا خليت سلوى تحجي مريك سوينالها شهادة وفاة بواسطه

بعد مرور سنه سلوى جابت ولد وسميناه فهد
لان بأثناء ما تبجي على مريم وگعت
اخذناها للمستشفى وعرفنه بيها حامل
فهد گدر ينسي سلوى فقدان مريم او بلأحرى يملي عليها البيت ويعوضها رغم انو عدها
غيره بس هذا كان الها مثل جبر الخاطر ....

مرت السنوااات كما هيه بدوون احداث
بعد مرور 15 سنه

...واگف ع السطح ..يباوع بنظرته الحاده للقفص الصغير
يبتسم علئ منظر الحمام
يجيه الصوت من خلفه ...عمي شاهين الحگ

يتفاجئ من الصوت الي اجاه ...يلتفت يشوفه
سالم يلهث من التعب
يعقد حواجبه ويرد عليه ...هاا سالم
خير ياستار الحگ عليمن

سالم ...بصوت متقطع ..ع عمي الشيخ سلمان يريدك
بسرعه

شاهين ..غير اعرف شيريد شصاير

سالم..مادري عمي هو وداني عليك گال ناديه بسرعه

شاهين ..يهز راسه ..ويجاوبه ..زين روح انته وانه لاحگك
..يحجي بينه وبين نفسه ..شيريد ابوي ليش مودي عليه اجيه بسرعه
مو من عوايده يدري بهذا الوكت انه اگضيه يم القفص

نزل لاگته بسعاد ( مرت شيخ سلمان )
..هاا يمه وين رايح بسرعه

شاهين ..لا ماكو شي بس ابوي مودي سالم عليه
يكول خلي يجيني بسرعه

بسعاد..خوش يمه الله وياك

شاهين يدخل للمضيف ويسلم على الموجودين ..الكل يرد عليه السلام يگعد بصف الشيخ
..ها بويه ءامرني

سلمان ..هذا رعد المختار
الي بعشيرة الشيخ ساهي تعرفه انته غير

..اي بويه اعرفه شبي

..عنده گاع يم گاعنه واليوم متعارك ويه الفلاليح ع الماي ..اريد تاخذ زلمك وتروحله
تشوف شعنده ليش جاي يتشاكون منه فلاليحنه

شاهين..صار بويه
ياخذ سلاحه ويگوم ..يلا ادهم(اخوه) و همام (ابن عمه)
امشونه نروح عليه
گامو الولد وياي ورحنه لعشيرة الشيخ ساهي
سألنه على رعد المختار ودلونه على بيته انه ماشايفه بس سامعه بيه ...

دگيت الباب طلعلي رجال متوسط بالعمر ..لحيته اغلبها شيب وقليل شعر اسود
سمين وگصير شويه .....السلام عليكم

..وعليكم السلام اتفضلو بويه

شاهين ...عمي انته رعد المختار صح؟

رعد..اي وصلتو خير عمي شرايدين

شاهين ...احنه زلم الشيخ سلمان وانه ابنه الجبير شاهين جايينك علمود طلابتك ويا الفلح
وعركتك وياهم
انه سمعت منهم واريد اسمع منك وافهم الموضوع منك

رعد..بصوت عالي..ماعندي شي اكوله
بس گول لفلاليحكم مايعترضون طريقي مرة ثانيه

شاهين باستغراب..يعترضون طريقك؟ هيج بدون سبب غير لازم اكو شي يخليهم يسون هيج

رعد ...لا بدون سبب

شاهين ..ابو محمد كلنه نعرف انته الحلال مالتك مؤذي
وعابر ع گاعنه ومخرب الزرع وهاي اكثر من مرة تتكرر
ولما جاينك الفلح
وطالبين منك تلزم حلالك متعارك وياهم ومسويلك مشكله

رعد..والمطلوب شنو

شاهين ..بنفاذ الصبر..ابو محمد مو انته رجال جبير ومااگدر اهينك
او اقلل من احترامي الك ...لا تحجي وياي بأسلوب يستفزني
انته تعرف شريد ..عرك وطلايب وي فلاليحنه ماريد ومشكلتك وي حلالك حلها عسى ماتبيعه مايهمني
بس لا يجي يوميه احد مشتكي منك

رعد ...اسوي اليعجبني دامني ماغلطان

شاهين ..همام رص على اسنونه وراد يضربه لزمته ورجعته
گتله ...ترا اذا اجه احد يشتكي منك مرة ثانيه
مااجي عليك
اروح لشيخ ساهي يشوفله صرفه وياك خووووش لان الضاهر انته ماتحترم احد
...يباوع ل ادهم وهمام
يلا امشونه

همام ...شاهين ليش ماخليتني اكسر اسنونه بحلگه هذا الشايب الخرفان

شاهين ..لا مو هيج تنحل المشاكل
اذا ضربنا راح يشتكي من عدنه وتصير طلايب لان احنه دخلنه لقريتهم بدون اذن الشيخ
وهاي الوحدها مشكله ..مانريد نكبر المواضيع بدل مانحلها

همام ...يعني عاجبك اهانته النه
وحته ماكلف على نفسه يگلنه ادخلو للبيت
لو نظراته علينه ..عبالك شايف جهال ويستحقرنه

شاهين ..انه ماغافل عنه
بس ردت هالروحه تحذير اله والمرة الثانيه اسويله جرة اذن

طلعنه من يم رعد ورجعنه للمضيف وانه احس النار تطلع من عيوني من الحرگه
رايح ومتعني اله تالي يباوعلنه بأحتقار ولا چن احد تارس عينه
متعود محد يردلي طلب ولا يوگف بوجهي احد

سلمان ...ها بويه شكو شو
جايني وجوهكم مغضبه
شگاللكم رعد

همام ..عمي هذا الي اسمه رعد رحناله لا احترمنه ولا عبرنه اصلا
انوب فوگ هذا يستهزء بينه عبالك جهال عنده

سلمان..يهز راسه ..خير ان شاءالله بويه
سهله انتم العليكم سويتو
بويه شاهين

شاهين..أءمرني بويه

سلمان..بس لا تعاركتو وي الزلمه

شاهين..لا بويه انه الحجيت ويا وانته تعرفني ماارضه بالغلط والعيله

سلمان..كفوو منك ابني اعرفك اصيل وماتطلع منك العيبه

يقطع حجيهم همام بتنرفز..شنو قصدك عمي انه متهور وتطلع مني العيله

سلمان..يبتسم ويرجع يباوع لهمام ..لا بويه همام
موش هيج گصدي
بس شاهين مو مثلك انته وادهم عصبين ووكت العصبيه ماتشوفون گدامكم
اهم شي عدكم تطفون نار گلوبكم ...شاهين يتصرف بحكمه وعقل

همام ..بغيظ..عمي تامرني على شي
رايح لبيتنه

سلمان..لا بويه كفيت ووفيت ماگصرت يالذيب

طلع همام واستأذن ادهم
شاهين ..يخلي السلاح ع الأرض ويگعد بصف الشيخ ..بويه شكم مرة گايلك لاتمدحني يم همام
انته تعرفه كلش زين يغار
ومايقبل احد يفضلني عليه بحكم هو اكبر مني

سلمان..انه اعرف شجاي اسوي
ماعليك اريد بلكي يصير ثگيل ومايتهور يتحكم بأعصابه
لشوكت يبقه هيج

شاهين..بس هيج جاي تخليه يكرهني ويشيل بگلبه عليه وهو ابن عمي ماريد ينغث بسببي

سلمان ..لا مايكرهك بس يحاول يصير احسن منك
انه اكبر منك شفت وعفت وعلمتني الدنيا هواي امور من الصغيرة للجبيرة
...يطبطب على كتف شاهين ..يلا بويه گوم ارتاح اكيد تعبان

شاهين..اي والله بويه
يلا من رخصتك

..مرخوص

..شاهين يوصل للباب ويوگف يلتفت للشيخ ..بويه نسيت اگلك ترا باجر اروح لبغداد

سلمان..ليش دوامك بعدله يومين

..اي بويه بس گلت اروح من وكت علمود الصيرفه محد يديرهه انه والولد التهينه
وهذا الأسبوع محد راحلها وشاف المشغلينه هناك شسوه بغيابنه

...اذا هيج توكل على الله
هذا حلالنه خو مانخلي الغريب يلعب بكيفه بيه

گمت من يم ابوي ورحت للبيت الي يبعد بمسافه عن المضيف
..دخلت للصاله واجتني امي
بسعاد..جوعان يمه اصبلك غدا

شاهين...اي يمه ميت من الجووع

..هسه اصبلك

شاهين..انتي تصبيلي چا طيبة وين؟

بسعاد..يووو يشاهين شلعت گلبي هاي البت
من ابوك گاللها بطلي من المدرسه
وهيه تبجي ماترضى تاكل ولا تشرب بس تبجي

شاهين ..يزفر بصوت عالي ..ووينها هسه
خلي اشوفلها حل

..فوگ بغرفتها

صعدت وگفت يم غرفتها اسمعها تشاهگ بالبجي دگيت الباب وبدون مااسمع منها رد فتحت الباب
لگيتها مجمعه كتبها حاضنتهن وتبجي

..افاااا طيوبه الحلوه تبجي ليش

بس شافتني شمرت نفسها بحضني تبجي وتشهگ بصوت متقطع
...هسه غير افتهم عليمن هالنوح والبجي

طيبه..ابوي يگلي ماتروحين للمدرسه بعد

...مسدت على راسها وگعدتها ع الجربايه گعدت بصفها
وانداريت عليها .گالت
ابوس ايدك شاهين حاجي ابوي مايبطلني

شاهين ..طيوبه حبيبتي
انتي خيتي الوحيده وتعرفيني مااردلج طلب لو تردين عيوني المركبه هم ماابخل عليج بيهن
بس سالفة المدرسه هاي عوفيها انتي تعرفين عاداتنه وتقااليدنه خما غريبه علينه

البنيه من تصير بگدج عيب تطلع بعد
ونتي مو اي بنيه بت الشيخ سلمان ماانريد احد يمسج بحجايه
لو يجيب طاريج بالشينه

طيبة..بس انه مامسويه شي غلط

شاهين..ادري والله ادري بس هذا الماشي عدنه بعشيرتنه وعيب نخالفه
ترضين الناس تحجي على عرض ابوج واخوج

سكتت ودنگت

لاتسكتين جاوبيني ترضين؟

طيبة..لا ماارضى مااعاش اليحجي عليكم

شاهين..تمام اذا هيج انسي هاي السالفه وشيليها من بالج صدگيني وداعت عيونج
اي شي تردينه يوصل العندج لو اغلى شي اخوج موجود بعد شتردين

طيبة ..تمسح دموعها بكف ايدها ..اريدك سالم

شاهين..يعني هاهيه هسه ماتبجين بعد

..لا ماابجي

..وعد

..اي وعد بس اريد منك شغله من تروح لبغداد

..اعيوني الج شكم طيوبه عندي

طيبة..من تروح لبغداد جيبلي تنورة
مثل هاي التلبسها المذيعه بلأخبار

شاهين...هههههه هسه نتي عفتي كل الشغلات الحلوة الي بغداد ورحتي ع التنورة
شنو تردين تصيرين بغداديه

طيبه..اي اريد البسها ليش بنات بغداد احسن مني

شاهين..هههههه يرحلج فدوة بنات بغداد
اعتبريها عندج بس اروح

طيبة...ههههه مشكور شاهين

...العفو ويلا مسحي دموعج وگومي صبيلي غدا امي مااتگدر

..صار تدلل

لثاني يوم حظرت الجنطه مالتي ورحت للگراج
صعدت لبغداد
ومنها رحت للشقه مالتي فتحتها ودخلت خليت جنطتي وسبحت گلت استراح اشويه
واروح للصيرفه
سمعت صوت جاي من المطبخ عقدت حواجبي بأستغراب ...منو الداخل للشقه والمفتاح عندي
گمت حته اشوف منو وتفاجئت

يتبع ...