جار القلب ❤️ ( روايات ليبية )

حلقة 1🔥

💜 رواية 💜 #جار_القلب 💜

♥️ المقدمة والحلقة الاولى ♥️

⚘Hăbošh⚘ للكاتبة ⚘

💜💜💜💜💜💜💜💜💜💜💜

يوم كله نشاط وفرح و على اصوات كلاكسات
وعيت الصبح بفرحة قعدت نلعب بشعري ونتخيل كيف زعما شكله هل تغير ولا كيف ماهو 💓 خذيت نفس طويل وصبيت ومن الحمام للمطبخ واني انغني اغنية نانسي

🎶🎶بالعين ولا اليدين بدينا بسلام 🎶🎶🎶 مش فكرة يومه مين يلي ابتدأ بالكلام لاكن فكرة عينية لما جريت عليك ولقيت قلبي في ثوني مليان منك غرااااام ياسلام ياسلام اد ايه حلو الغرام 🎶🎶😉

...................💜💜💜💜💜💜

تعالوا انعرفكم
اني اسمي جنات موليد 97 نقراء  تقنية طبية عصبية و عنيدة كل العناد وغيورة موت
بابا محمود موليد 60 .ماما سالمة موليد 65
عندي ثلاث خوت اثنان اكبر مني واحد اصغر واخت وحدة اصغر العنقود
خوتي سراج .م. 85 مهيمن م. 89 وبعد سنوات جيت و بعد سنتين جاء خوي عبد الله م . 99 وبعدين اختي الوحيدة جيهان م 2001

نحكيلكم على عائلتي بوي راجل حازم و عملي ايحب الشغل و من الساعة 10 مفيش حد لا يطلع ولا ايخش ايحب الهدوا ونحن نرجوه لين يرقد و هوبا 😂😂
. امي انسانة مطيعة لاخر حد ايقوللها بوي طيحي في النار اطيح
خوتي سراج هذا الحزار والعصبي عندنا معنداش الريح وين اتهب. 😏 خوي مهيمن  طيوب وحباب و قريب مني بس حتى هو عنده فصلات 🤗 عبودي ايهبل مسخراني وجوه حلو وديما طالع 😄 اختي وحيدتي وصاحبتي جيهان  ام السان وتعرف تاخذ حقها و من اللسانها 😂 ايخافوا منها 🤣
و خوتي يلي يشتغل ويلي مازال يقراء ويطلعوا بالليل ويسهروا مع اصحابهم
واني وجيهان ياما تلفزيون وصوته واطي ياما نرقوا للسطوح بالخلسة بعد مايرقدوا

واليوم جيرانا دايرين عزومة لولدهم امروح كان يقراء في كندا وعزمونا على العشاء ولانهم جيران عمر وساسنا على ساسهم امشينا انساعدوا فيهم 
وما نحكيلكم اني طايرة من الفرحة اخيرا انشوف قصي
اي قصي ❤ حبي ولد جيرانة يلي قبل خمس اسنين واني انراقب فيه من السطوح و هو كيف يقراء وهو ياكل وهو ايمشط شعره على المرايا و حتى لما ايجي ايغير نقعد نشبحله لما ينحي التيشرت 😍 لاكن باقي الحوايج كنت انغمض في عيوني
😜 لالا انبصر معكم كان روشنهم عالي 😁
و إني انحبه موت ونستنا بس امتا يرجع ونشوفه 😍😍😍😍😍

💕 واليوم هو احلى يوم وعيت على صوت كلاكسات رجعته 💕

.....................💜💜💜💜💜💜

امي/ هيا عطلتيني ساعة وانتي تلبسي

انا/ باهي ياماما خلاص اهو قريب انكمل اصبري خمس دقائق

امي/ وعلاش كل هالوقت البسي اي حاجة واطلعي نحن مشيين انساعدوا فيهم مش مشيين للفرح

انا/ واااك توا معندهمش من ايعاونهم غيرنا بالله عليك ياماما اسكتي تلقيهم جيبين كل حاجة واتية