__________________________________
نضت الصبح ع صوت ماما تحكي تحت شباك داري... الكلام مش باين زين بس كأني سمعت اسمي..
تلفتت لقيت جنى راقدة
نضت خشيت الحمام و صليت ...و نزلت لوطا
ع خشه ماما من بره
قلتلها من كنتي تكلمي قالتلي خالتك حنان
قلتلها خيرها قالتلي تهدرز بس .. شنو ناضت جنى قلتلها سيبتها راقده
مشت من جنبي و ركبت فوق
كنت عارفه ان في موضوع صاير و الموضوع كأنه شوري.. بس ما حبيتش نطول الدوه
خشيت المطبخ فتحت الثلاجه ما عنديش نيه نفطر سكرتها و طلعت ....
مع خشه محمد خوي
قالي خيرك قالبه وجهك قتله خيرنني عاديه قالي كان هكي عاديه مانبيش نشوفك قالبتيه
لانك تخوفي.😂
ضحكتله ضحكة بلا نيه و قلتله بارد ومشي و سيبته 😑
ركبت لدارنا و نسمع في ماما و جنى يهدرزو.. ولما خشيت سكتو قلتلهم خيركم سكتو قالتلي جنى لا ما سكتناش كملنا
مره أخرى يحكو في نفس الموضوع بس ما ركزتش واجد ...قالتلي ماما بنطلع اني و جنى للسوق اليوم لما يروح بوك حطيله غداه
قلتلها باهي وطلعت ماما ..
تلفتت لجنى و قلتلها شن داسيين عليا
قالتلي مش داسيين شي و ناضت للحمام
تأففت ... وفتحت تلفوني قلبته شويا و سكرته و انطرحت ع سريري بملل وقعدت نفكر
طلعت جنى من الحمام .... قالتلي خيرك اليوم منكده .. قلتلها انتم خيركم معايا مبكري محمد وتوا انتي..
قالتلي بجد خيرك قالبتيها اليوم قلتلها لا شي قالقه بس ...
طلعت و سيبتني و اني قعدت نفكر... فعلا خيرني قالبتها اليوم ممكن لان ليا كم يوم ما طلعتش من الحوش من لما تمت القرايه
فتحت تلفوني من جديد و سكرته .... اوووف شن الجو البايخ هدا خليني ننزل خيرلي..
نزلت لقيت ماما بدت في الغدي و جنى تمسح في الحوش خشيت مع ماما وتيت معاها الغدي و تغدينا و طلعت هي و محمد و جنى للسوق و اني ركبت انطرحت في داري...
مش عارف كم رقدت بس نضت ع صوت سياره وقفت بره عرفته بابا روح نضت بنوتيله الغدي نزلت وسمعت الباب يدق ...
غريبه بابا معاه المفتاح...
فتحت الباب و لقيت شاب قدامي طويل و ابيض شعر كستنائي و لحيه مرسومة وعيون صفر قعدت نشوف فيه بس بعدين تفكرت اني في توته و من غير وشاح ..
سكرت الباب طول و من ورا الباب قلتله من انت.... قالي محمد موجود....؟ ..قلتله لا طالع
قالي تمام اسف ع الاحراج لما يروح قوليله عصام دورك.... قلتله ما احلاك و تبيني نقوله طلعتله بتوته... ضحك و قالي خلاص تو ندوره بروحي فوتي الموضوع و اسف مره اخرى....
ما رديتش عليه ..و مشي وقفت شويا و بعدها تفكرت اني قلتله ما احلاك 🤦♀️ هادا شن يقولوله.....
خشيت للمطبخ و اني نتفكر في شكله و كلامه ما صح وجهه يكلم فيا كأني اخته هالرزيل لا تحشم لا شي شكله متعود ع خلطة البنات
فتت موضوعه و خشيت من الكساد قلت خليني ندير حاجه حلوه...
درت كيكه و خش عليا بابا حضنته و قلتله طولت اليوم ...قالي هادا هو المطار اليوم زحمه لان العطله بدت كل واحد خدي اهله و سافر ...قلتله الا حني 😑 .. ضحك و قالي في حد عاقل يسيب بلاده و يمشي لبلاد الناس 🙄
قلتله باااابا 😟 كل يوم تشوف في ناس يسافرو ما يشوفوش فيك ... قالي ابدا بلادي بس ضحكت عليه و قلتله نوتيلك غداك .. قالي تمام نغير دبشي و جيبهلي في الصاله.. قلتله تمام .. باسني ع راسي و قالي ربي يحفظك و طلع ....
وتيتله غداه و رفعته للصاله و شويا و خشو ماما و جنى .. جايبين معاهم شويه اكياس قلتلهم شن جبتو معاكم قالتي ماما شويه حويجات و جبنالك قفطان .. قالتي جنى قيسيه يا لجين يناسب جسمك من غادي
قلتلها شن المناسبه .. قالتلي بدون مناسبه عجبنا جبناه .. قلتلها باهي توا نقيسهه بعدين.
خديت القفطان و ركبت حطيته في داري و انطرحت فتحت تلفوني لقيت رسايل من نها صاحبتي و قعدنا نهدرزو و حكتلي ع صاحبها و قديش تحبه و يحبها ....
خشت عليا جنى سكرت النت ...
قالتلي مازال ما قستيشي قلتلها باهي توا ما خاطريش..
قالتلي غير هيا بلاش كسل نوضي نبي نشوفه
قلتلها امري لله و خلاص
نضت قسته و عجبها واجد و شافاته ماما و عجبها و قالتلي عندك ليه اكسسوارات
قلتلها عندي بس شن صاير ... عرسي و اني ما نعلمش 🤨...
ضحكت جنى و قالتي تقريبا...
برقت في ماما باستغراب 😶...
قالتلي غدوا جايين ناس بشوفوك ولد سلف خالتك حنان ..
عيوني توسعن و قلتلها ليش اني اخر من يعلم.
قالتلي المهم علمتي و تي روحك .. وطلعت
.......
برقت في جنى بصدمه...وقلتلها تبصرو صح😟
قالتلي ليش خيرك شن فيها ...
مهند و لد سلف خالتك من شن يشكي
قلتلها ما يشكي من شي بس اني مش حاطه الموضوع في راسي ع الاقل نكمل الثانويه الاول ... قالتلي مازال عام كمليه بعدين العرس
...... ضحكت و قلتلها حددتي حتى العرس بعدين انت اكبر مني ليش ما تتزوجيش قبلي
قالتلي اني مخطوبه كان نسيتي بس العرس مازال ..... تأففت وقلعت قفطاني و طلعت ..
*******************
البدايه شوي ممله بس الاحداث الجايه مشوقه
ادعموني و اعطوني رايكم نكمل 😘
