________________________________
واني طالعه سمعت تلفون يرن جاي من دار محمد تبعته و لقيته ناسي نقاله في الشحن
لقيت اسم عصام......اووف شن اللصقه هدا شن يبي من محمد ....
فكيت النقال و نزلت بيه ندور في محمد سألت ماما قالتلي قاعد في المربوعه ....
مشيت للمربوعه عطيتهله قالي اووو نسيتك يا عصومه بكل و رد عليه ..
طلعت و اخر حاجه سمعتها نراجي فيك غدوا العصر ....
خشيت للحوش و بابا و ماما يهدرزو قلت لبابا نبو نطلعو عيينا من الحوش .
قالتلي ماما بنمشي لعرس امشي معايا
قلتلها عرس منو ..قالتلي خو صاحب محمد ..قلتلها مابعده .. قالتلي المرا تجيني ..قلتلها امتى قالتلي الخميس هدا.. قلتلها لا البرانيه فكيني منهم..قالتلي ع راحتك
........
فات باقي اليوم عادي و في الليل خشينا لسرايرنا قالتلي جنى كيف بتديري شعرك غدوا
...شن الموضوع هدا 🤦♀️..
قلتلها فوتي الموضوع بالله عليك ...
قالتلي خيرك ماتبيشي مهند ولد كويس
قلتلها مشكلتي مش في مهند اني معارضه الفكره من أصلها 😑
قالتلي ارقدي ارقدي غدوا ساهل
برمت و جهي و رقدت ......
نضت تاني يوم ع صوت دوشه لوطا ماما و جنى يوتو لجي الناس و ماما توصي في محمد ع حاجات ...
نزلت صبحت عليهم قالتلي ماما فيسع خشي دوشي و وتي شعرك....
صبرك يا رب 🤭 ..
ركبت دوشت و جففت شعري و نزلت للغدي..
ماما و جنى يهدرزو و محمد قاللهم بيجيني ولد قاعد في المربوعه تبو شي كلموني وقتها تفكرت الشاب وقفته و نظرته و شخصيته ....
قالتلي ماما تغدي بسرعه بيش تبدي توتي في روحك قلتلها كأنكم عاطيين الموضوع اهتمام اكثر من اللازم يعني مش مفروض تاخدو رايي بالاول قالتلي رايك ناخدوه بعدين توا اطلعي للناس وما تديريش حركات يحشمن وافقتي او لا احترمي الناس لي جاييين قلتلها به حاضر ..
تغدينا و ضميت اني و جنى السفرة و ركبنا بدت جنى توتي فيا و تواسيلي في شعري كملنا مع العصر و نزلنا نوتو في سفرة القهوة و شويا و دق الباب مشت ماما تفتحلهم و اني قعدت في المطبخ و نسمع في ماما ترحب بيهم و تقوللهم انستونا
جتني جنى قالتلي حطي القهوه ع النار و بعد تجهز جيبيها و تعالي قلتلها باهي و طلعت ....
حطيت القهوة و ووتيتها و رفعتها واول ما خشيت قالت ام مهند ما شاء الله علي بنيتي تبارك الرحمن احني مش جايين نشوفوك لان نعرفوك من قبل و عاجبتينا و حتى وليدي شايفك و دوالي عليك ...
ابتسمتلها و عطيتها القهوة و قعمزت جنبها دوت هي و ماما كلام واجد بس ماكنتش مركزه معاها و كل تفكيري في صاحب محمد يلي قاعد في المربوعه ......
شويا و ناضو وقالت ام مهند لماما شوفو روحكم و ردو علينا و احني نتشرفو نعودولكم الجيه مره تانيه قالتلها مره الشرف لينا .....
طلعن من عندنا وبرقت في ماما قلتلها شن الثقه هدي و كأن ولدها الف بنت تتمناه 😂
برقت فيا نظره جديه و قالتلي و خيره ولدها ما شاء الله عليه اصلا الف بنت تتمناه....
قلتلها و اني مش منهن... قالتلي ما ترفضيش طول بس لانك معارضه الفكره فكري زين وكانك ع القرايه سمعتيها قالت نراجو لين تكملي الثانوي .....
قلتلها يصير خير ان شاء الله
طلعت جنى من المطبخ و قالت عجبتني سلفة خالتي اول مرة نهدرز معاها عن قرب كويسه سعدودك بيها....
قلتلها حتى انت 😩.. المهم ربي يجيب يلي فيه الخير اني توا بنركب نبدل دبشي سلام....
بدلت دبشي و نزلت ع خشه محمد بسفره القهوه يلي كانت في المربوعه قالي خطيبك نزل هدرز معانا و دارو صحبه هو و عصام صاحبي .... قلت في خاطري لا ...لالالا 🤦♀️
قلتله من خطيبي تدويلي ني..هههه غالط اني لجين مش جنى ..
قالي عارف ندويلك انت مالا في حد غيرك هنا مهند نقصد 😛
قلتله وسع ترا من قدامي ما تزيدهاش عليا .. قالي خيره شاب كويس ما ترديشي طول فكري زين و استخيري .. قلتله ان شاء الله..
روح بابا و نسمع في يهدرز مع ماما ع الناس بس ما بيتش نقعمز جنبهم تحشمت ☺..
نسمع في بابا يقول لماما هو شاب ما شاء الله عليه بس القرار الاول والاخير للبنت ما نقدرش نقول كلمه قبل ما توافق...( الله قديش نعمه يكون عندك اب عنده راحتك بالدنيا و همه الاول تكوني راضيه و مقتنعه ❤💓)...
قالتله ماما توا نقنعها لان ما يتفوتش... قاللها بابا لا تقنعيها لا شي قوليلها تستخير بس و ربي يجيب يلي فيه الخير..قالتله ان شاء الله...
ركبت لداري فرحانه لان عندي اب كيف بابا ودعيت ربي يسلمهلي و يطولي في عمره 😍
******************
تابعوني الجاي افضل ان شاء الله
قصص واجد ح يصيرن بين لجين و مهند
و قصص واجد ح يصيرن بين لجين و عصام
وبين مهند و عصام....
ماتننسوش دعمكم يشجعني 👍
