Sudan revaluation ✌✌

#blue _for _sudan

قصة الهاشتاق العالمي #BlueForSudan 💙💙

القصة وبدت بشكل عفوي من أهالي وأصحاب الشهيد محمد مطر اللي استشهد في #مجزرة_القيادة_العامة. غيروا صورة بروفايلاتهم للون الأزرق اللي كان الشهيد بيحبه.
انتشر الهاشتاق في العالم واتحول لحملة تضامن مع السودان ككل في ثورته ضد المجلس العسكري الإنقلابي ودعم الشباب وللتنديد بالجرائم ضد الإنسانية الحصلت
تويتر وانستجرام اتحولوا للون الأزرق والمشاركين من جنسيات العالم المختلفة أكتر من السودانيين زاتهم "اللي ممكن ما عارفين الحاصل زاتو"
والناس بقت بتسأل عن الشهيد محمد مطر قصته شنو؟ وبيعرفوا من وين جا اللون الأزرق
وسودانيين مفتحين تلقاهم بيكتبوا عن العصيان المدني الحصل في نفس الهاشتاق الأزرق ده، وعليه حيفهم الناس أكتر وأكتر ثورتنا دي
بل بدت تظهر رسومات وإبداعات تعبر عن الثورة السودانية وكلها باللون الأزرق

الفنانة ريحانة، وبعد الستوري الأمس في الإنستجرام اللي اتكلمت فيه عن الثورة السودانية والضجة العالمية الحصلت، قامت الليلة وغيرت صورة ال cover في تويتر باللون الأزرق تضامناً مع الثورة
بل حتى أعضاء في العائلة المالكة القطرية شاركوا في الحملة مع شعار "فليعش سوداننا علماً بين الأمم" .. سياسة وكدا
صحفيين عرب وأجانب شاركوا في الحملة واتكلموا عنها، وتقارير اتكتبت!

والموضوع لسة بيكبر والدعم والزخم العالمي "بلا مبالغة" يخليك تفرح للحد الأقصى، انو ثورتنا بقى العالم كله بيتابعها وبيشيد بيها وبالتاريخ اللي بيكتبه الثوار في نضالهم السلمي للحرية 💙
في البوست الجاي حأنزل تقرير إخباري كان اتكلم عن الحملة دي

في حرب إعلامية كاملة ربح فيها الثوار الرأي العالمي والقضية ككل بشكل مبهر والله
برغم فصل شبكة النت بشكل شبه كامل، الشباب المغترب كان على قدر التحدي وقالها بأعلى صوته:
هذه الأرض لنا فليعش سوداننا .. علماً بين الأمم 🇸🇩💙

المجد للشهداء
المجد للثوار
و #تسقط_بس

#العصيان_المدني_الشامل