للكاتبة 🍀QABAS ADAM🍀
ذاكرتي مثل الغيوم تجي وتختفي بسرعه هنا اتذكر كان عمري خمس سنوات اروح للروضه والعب و اتذكر حتى اسم معلمتي كانت حلوة وحنونه واسمها (سعاد) وارجع وراهه الى حضن امي بسرعه واتذكر هنا من كنت صغيرة بالمدرسه والعب وي الاطفال وكان عمري هنا عشر سنوات تقريبا واتذكر شلون كانت المدرسه مليانه بالناس معلمين وطلاب واولياء امور وكراسي ورحلات كان يوم اجتماع اولياء الامور ومن بين كل الناس لمحت امي تسال عني والكل يحمد بيه وبذكائي وينتقدون اختي الكبيرة لان كسلانه امي لابسه قميص بيجي ستن وتنورة كبس سودا وعبايه ام الراس بس تخليهه على راسهه وشحاطه شويه عاليه وركضت وحضنتهه اني اسمي(( روان)) بيضا وشعري احمر طوخ ومجعد عيوني خضرا وجسمي حلو وبس وجهي بيه نمش وكلش مضوجني )) امي حنطيه وشعرهه ناعم كلش واسود فاحم وعيونهه سود وطويله ورشيقه الكل يشبههه بالهنديات وابويه هم اسمر وشعره اسود ملامحه حاده وعندي خمس اخوان اخت وحده اكبر مني بسنتين واربع اخوان ولد كلهم اكبر مني اني سادس فرد بالعائله اخر العنقود بس اخواني واختي كلهم يشبهون امي وابويه سمر وشعرهم اسود وحتى ملامحهم الا اني كنت اسال اخواني يكولون انتي مو اختنه لكيناك بالشارع واروح ابجي على امي وابويه يبقون يضحكون وابويه يكول لا هاي امك كانت حامل بيك بالليل طبت للمطبخ تشرب حليب ولان ظلمه شربت قاصر وهيك طلعتي ويحضنني ابويه كان لطيف ويايه على عكس اخواني كان ميضحك ويسولف وياهم صارم جدا وياهم وقاسي ويضربهم من يغلطون الا اني كان لطيف ويايه اعتقد لان صغيرة وشاطرة ابويه كان مهندس يداوم بالبصره بميناء ام قصر وطلع تقاعد لان تعارك وي دكتور وياه ابويه كانت دائما عيونه حمر ومعصب ويكعد وحده حتى اغلب الاوقات ياكل وحده وبعدين كام ميجي للبيت فترات بعيده يله نشوفه مرات توصل لحد اربع او خمس شهور من نسال امي تكول بالبصرة ومن كبرنه عرفنه هو متقاعد من جننه اطفال وامي بكل اوقاتهه حنونه وطيبه وشايله همنه كلنه امي ماكو بحنيتهه اسالهه من تمشطلي ليش ما طلعت مثلك شعري ناعم تكول لان انت تشبهين خالتي الكبيرة احلى وحده بكرايبهم ومن تكبرين كل الناس تتعارك عليك تكول اني طلبت من الله انه انتي تكونين احلى كل جهالي والله حقق امنيتي وتحضنني ماكو بحنيتهه بعد غياب ابويه اللي يطول دائما امي كانت تتعب وتتعذب علمود توفر عيشتنه اضطرت انه تشتري مكينه وتكوم تخيط للناس وشويه شويه تعودنه انه العيشه كلهه توكع على امي وحياتنه صارت اصعب وحتى الاكل هم صار شويه شويه يتغير يعني مو سهله على مريه وحدهه تربي ست اطفال وهي سابعتهم بوحدهه اهل امي كانو فقرة كلش ميكدرون يساعدوهه واهل ابويه حالتهم زينه بس محد يساعد احد وامي نفسهه عزيزة متنزل روحهه لاحد بقت تربينه بعذاب كنت افكر ليش امي مو مثل باقي الامهات متعوف ابويه من سألتهه كالت ما اكدر لان احبه جيته علينه كل كم شهر تسوى الدنيا صراحه ما قنعتني بس اعتقد عدهه اسبابهه كانت اكبر امنياتي بهذاك الوقت انه اكل وجبه دسمه او مشاوي او حلويات لان كانت وضعيتنه كلش محلوة كلش واحنه طلباتنه تزيد كل مانكبر ومرت الايام وصرت بالمتوسطه والاعداديه كنت متفوقه كلش بالدراسه ودائما اطلع الاولى وامي تميزني عنهم اختي تضوج لان هي متقرا ابدا وبالرغم من انه هي اكبر مني الا انه هي بعدهه بالمتوسطه واني صعدت للاعداديه ومن تشوفني اقرا هواي كانت تكوم تمشط شعرهه وترتب بيه وتكولي انت ابقي اقري ام صوفه الطلي تعيب على شعري ومر الوقت واقاربنه كلهم يلتقون بالعيد وشفت هناك اولاد عمتي وبعد العيد بايام سمعت انه ابن عمتي يريد يتقدملي وانعجب بيه بس بيومهه تعجبت لان محاجيتهم ولا ركزت على واحد منهم لان كان عندي امتحان كيمياء ومركزة وبرغم الهوسه ماخذة كتابي وكاعده بالحديقه ادرس المهم بنفس اليوم اجتي عمتي الكبيرة واخذت امي ودخلت للغرفه واجتي اختي كالت يمكن راح تسويهه صدك وتخطبك والله اني مااقبل اني اكبر منك ميصير كلتلهه اخذي اشبعي بيه اني اريد اخذ شهاده وانت اصلا متحبين المدرسه العرس يفيدك الك كالت اي والله كلامك ذهب وفرحت طارت من الفرح شويه وسمعناهه تكول لامي متصير جنتي لو اموت وبالذات من بيتك ما اخذ مريه وطلعت عمتي وبسرعه تمشي ومعصبه وطبينه عمي امي لكيتهه تبجي بس ما عرفت شنو السبب بس كالت طلعو من الغرفه ومرت الايام وكبرت وامتحنت اليوم السادس وكان اخر امتحان هواي تعبت لان ما كدرت امي تلزملي دروس خصوصيه بس بقيت اقرأ وحدي واسهر واتعب واليوم خلصت الامتحانات وانتظر النتيجه بس وضعننه المادي بقه نفسه واعتقد صار اصعب لان كبرنه وطلباتنه صارت اكثر اختي (هدى ) تزوجت ابن خالتي وعافت المدرسه واخواني كل واحد لزم صنعه بس اصغر واحد منهم يحب الدراسه وطلع كليه معلمين وصار معلم واتعين والباقين الكبير فيتر والباقين واحد نجار وواحد فتح محل صغير وكعد امي تعبت تقنعهم يدرسون وياخذون الشهاده وهم ميقبلون يكولون العيشه صعبه واحنه مو مال دراسه ابونه صار مهندس وشوفي تاليهه واستمرت الايام ..........يتبع
للكاتبة 🍀QABAS ADAM🍀
