طلع الصبح عليهم و فانا معرفتش تنام كتير ، كانت بتفكر في الأمير طول الوقت .
الاول مخبيش عليكوا كانت الجنيه مش فارقه مع الامير كانت مجرد فضول بالنسباله حاجه كان نفسه يشوفها او يوصلها و بقت بتاعته و معاه علطول .
الاول كان متحمس لوجودها معاه طفوليتها و حركاتها العفويه كانت بتضحكه ساعات .
كان في البدايه بياخدها معاه في كل حته ، حاجه جديده فرحان بيها .
بس كان صحابه بيضحكوا عليه .
انت بتعمل ايه بيها دي جنيه صغيره ملهاش لزمه .
انت امير و المفروض تدور علي حاجه اهم من جنيه أطفال صغيرين .
انت امير و محتاج اميره جنبك .
مع الوقت زي ما كل حاجه زهوتها بتضيع ضاع اهتمام الأمير بالجنيه و بقي يسيبها كتير في الصندوق .
اصله ميعرفش ان طاقه الجنيات بيستمدوها من اصحابهم كل ما بيسبها اكتر كل ما طاقتها بتضعف و ثقتها بتقل و لو سابها كتير يمكن تموت .
كانت ملكه الجنيات متابعه اللي بيحصل مع الجنيه الصغيره ، و في يوم راحتلها و قالتلها ان مجلس الجنيات اجتمع و بيطلبوا منها انها ترجع ارض الجنيات علشان الأمير مستهتر و مش هيقدر يخلي باله منها هي تستاهل صاحب احسن من ده بكتير .
رفضت فانا انها تبعد ، هي خلاص اتعودت عليه و مش عايزه تسيبه حبت وجودها جنبه يمكن كمان هو اللي كان امنيتها مش هي اللي كانت امنيته .
رفضت فانا ترجع و حذرتها ملكه الجنيات انه لو سابها كتير هتموت وافقت فانا و كانت مراهنه انه عمره ما هتسيبها تموت .
بعد فتره صحاب الأمير عرفوا علي اميره من مملكه تانيه . أعجب بيها الأمير جدا و راح القصر و فتح الصندوق و قعد يحكي للجنيه عن الاميره اللي اتعرف عليها ، الجنيه قعدت تسمعه باهتمام و ابتسامه كبيره علي وشها بس كان قلبها بيتكسر حتت صغيره سمعت و بعد ما سمعت الأمير قالها انه صعب يهتم بيها دلوقتي و انه هيضطر يسيبها شويه ، حاولت تدارس وجع قلبها و طارت جنب كده و باسته و قلتله طبعا المفروض الأمير يهتم بأميرته انا هكون كويسه هنا . و لو احتاجت اي حاجه هتلاقيني موجوده .
مردتش تقوله انه لو بعد عن تعب و تموت مردتش يبقي وجوده جنبها عطف بس ابتسمت و سكتت .
دخلها جوه الصندوق و نسيها ، كانت خايفه وحيده و حزينه ، صعبت الجنيه علي ملكه الجنيات و راحتها تاني تطلب منها ترجع رفضت الجنيه تاني و قالتلها ان قلبها بيقولها انه هيرجع و هيفهم انها هي اميرته ، ملكه الجنيات كانت بتحبها اوي قالتلها طيب هنديله فرصه اخيره كمان .
لو افتكرك و فتح الصندوق تاني هتكون فرصتك الاخيره هيكون قدامك اختيارين يا ترجعي ارض الجنيات او اخليكي معاه لو فضلت معاه مينفعش يرجعك الصندوق ابدا و لو رجعك او كسر قلبك تاني هتختفي و مش هيكون ليكي وجود .
