حريتي حياتي

بارت 1

هلو حبايبي اليوم جايبتلكم قصه تختلف عن باقي القصص مابيها خطف ولا بيها سحر ولا بيها حب ولا فصليه ولا اي شي من هاي القصص الي اغلبها مو حقيقيه مجرد{ وهم  }احنه نلجأ اله بس حتى نتهرب من الواقع الي عايشين بي 

# حياتي  من جنت 17 سنه 

ا درجاتي  جانت عاليه بالمدرسة ودائما اطلع من الاوائل واعتقد السبب انو اني اقرة هواي لان ماعندي شي ثاني يلهيني غير القراية ..

ومن اكول ماعندي شي اني اقصد هذا الحجي حرفيا تخيلو بنيه ببغداد  شابه عمرها 17 سنه وما عدها تلفون !!؟؟

اقضي اغلب وقتي بلقراية وباخر فترة صرت اقرة كتب خارجيه يعني روايات ومقالات وهواي كتب بمختلف المواضيع بس حتى اسد الفراغ الي بحياتي 

باقي البنات الي بعمري عدهم تلفونات ويلتهون عالانستا وعالوتيوب وعالفيس وووو

يمكن تكولون اهلها لازمين عدها شي بلتلفون ومعاقبيها  وماخذي منها اني اكللكم لا بالعكس اهلي مينطوني تلفون حتى لا يصير عندي شي 

يعني  يعاقبوني قبل لا اسوي شي غلط بالبداية جنت اكول يخافون عليه والوكت هسه مو زين وهواي مشاكل تجي من ورة التلفون وهم ادرى بمصلحتي  جانت امنيه حياتي وهمي الوحيد انو احصل على تلفون مثل صديقاتي  بس من بديت اكبر بدة هذا التفكير يتغيرمن بديت اقرة كتب واشوف الدنيا والعالم وين واصلين واحنه وين بعدنا نخاف من حجي الناس حسيت انو هذا مجرد بداية لطريق طويل كلش 

ومو بس عند اهلي حتى عند باقي الناس وباختصار المجتمع العراقي كله {مع احترامي للبعض} بس تفكيرهم حيل محدود يا عالم احنه وين وصلنا صرنا نسمع اخ يكتل اخته والله شنو شايفها طالعه وي صديقها 

اوك اني وياكم الشي الي تسوي غلط وجان لازم تتعاقب بس مو كتل مو كبل موت ودفن اكو 100 الف طريقه وطريقه حتى يعاقبها خصوصا انو هي ما مسويه شي جبير هي ما زنت ما ارتكبت شي محرم هي بس طلعت وياه لمكان عام ..

زين اكيد سمعتو بقصه اسراء غريب {الله يرحمها} اخوانها كتلوها بس لانو طلعت وي خطيبها بدون علمهم زين اوك انت اخوها شلون كلبك انطاك تكتلها وهي اختك وتربيتك وانت تعرفها كلش زين واصلا اخت الولد جانت وياهم يعني مو وحدهم ليييش هيج سويت؟؟؟؟

اني اكللكم لييش اخو اسراء وغيرة وغيرة يخافون من حجي الناس يخافون لا احد يجيب طاريهم بالموزين هذا كل همهم انو سمعتهم تظل زينه اهم شي يرضون الناس والباقي مو مهم ومستعدين يسوون اي شي حتى مستعدين يقتلون!!؟؟