طبعا الراجل فاوضني علي الفلوس .. واتفقنا ناخد المركب بأربعين جنيه لمده ساعتين
وهوب .. بقايا المحاربين الساموراي نطوا بقوا في المركب ..
المركب الشراعي اللطيف اللي القعدة فيه علي كنب قماش مزركش مريح .. والمركب منور بلمبه جاز جميله رومانسيه متعلقه جنب إيد الراجل الاي بيحرك المركب والشراع والدفة وكاسيت قديم نشغل عليه أغاني علي حميدة .. لولاكي .. لولا لولا لولا .. لولاكي ما اتسميت .. ترالم ترالم
وطبعا انطلقت المركب الجميله بفعل الرياح .. وبدأنا نرقص ونغني ونستمتع لفتره جميله .. وبعد كده ابتدينا نأفور ونهزر ونمسخ بقي ونمد ايدينا علي بعض علي سبيل الهزار التقيل .. ونجري ورا بعض في المركب .. ونضحك ضحك ماجن بقي .. وحقيقي هزار ممكن اي أنسان سوي يصنفه علي إنه هزار غبي .
طبعا عمو المراكبي ابتدي يتضايق .. ودي حاجه معجبتش أسامه الليبي صاحبنا .. السهير ب( مازنجر ) اساسا .. اللي اتدخل لما المراكبي قال :
- يا شباب يا شباب .. نخف الهزار شوية الله يخليكم
- إيه يا اسطي ؟! فيه ايه ؟! براحتنا !
- ايوه ي كابتن .. بس بردو بالأصول
- مافيش اصول .. احنا براحتنا .. إنت ليك فلوس وتسكت !
طبعا كلمه من هنا علي كلمه من هنا .. في اصحاب اتحمقوا لصحابهم والباقي تدخل للتهدئه .. إنما كان فيه برضه مد ايد ..
وهووووووووب .. أسامه بيشد الراجل من هدومه يسحبه عليه كنوع من انواع الهاخلي يومك اسود .. الراجل بيشوح بدراعه علي سبيل اليليله ابوكو طين .. إيده جت في اللمبه الجاز اللي متعلقه جنبه في المركب وقعت اتدشت .. الجاز مسك في قماش الكنب .. المركب ولعت في اقل من اربع ثواني ونص إلا خمسه .
والآن موعدكم اليومي مع فيلم السهره .. فيلم : اليختااااااااااي المفترس
إنه إنتقام الرب .. هنولع في النيل يختااااي جري بقي .. إنما هنجري نروح فين ؟ هنجري فين يختااااااي !
نصفنا خايف وبيلطم .. والنص الثاني بيحاول يتصرف .. طبعا انا معروف في انهي نص .
- هنعمل ايه ي شريييييف ؟؟؟
- عملكم اسود يا ختااااااااااااي
____________________________________
جزء كمان اهووو 😂💛
أنت تقرأ
ذكريات ممنوعه " شريف اسعد "
Teen Fictionحقبة الثمانينيات والتسعينيات ، تلك الحقبة الماسيه التي كونت لجيل كامل ، ذكرايات متشابهة إلي حد كبير . نحن عائله مصريه بسيطه ، كالسواد الأعظم من العائلات المصريه أسره مكونه من خمسة افراد ، يقودهم الاب المصري الصميم ، وترعاهم الأم الرؤوم لكل فرد في مص...
