روايه هو ثورجي وانا كوزة💛
الجزء الثاني
للكاتبه أمنيه عبدو
قلت ليها امشي واتصرفي عادي وقلتها بصوت واطي شويه فعلآ مشت ليهو وقال ليها كيفك ي تسنيم قالت ليهو كويسه وانت؟ قال ليها الحمدلله قال ليها أمس م جيتي صح؟ قالت ليهو ايوة م جيت قال ليها الليله ارجعي بدري بيتكم قالو احتمال تحصل مظاهرات بسبب الرغيف الزائد وكميه الناس البتقيف صف والبنزين البقى ماف لاقاني بوست ف الفيس وقالو كدا قالت ليهو اول م تخلص المحاضره الجايه دي بمشي طوالي قال ليها طيب يلا مشت منو وجات حكت لي قلت ليها كويس م فتح معاك موضوع الاعتراف دا قالت لي اي حرفيا قلت ليها نحضر المحاضره الجايه ونمشي البيت قالت لي طيب اخدنا لينا بريك زي عشره دقائق والدكتور جا وبدأ يشرح وبعديها خلص محاضره إتصلت علي امي قالت لي امنيه انتي وين؟ قلت ليها ليه ف شنو ي امي؟ قالت لي البلد جايطه ي بتي تعالي البيت هسي دا قلت ليها طيب حاضر جايه وقفلت منها قلت ليها تسنيم امي اتصلت علي وقالت فعلا البلد دي جايطه ارح نرجع بعد دا قبل تحصل لينا مصيبه كمان قالت لي اي خلاص ارح فعلا ركبنا المواصلات ووصلنا البيت قدمتها لحدي بيتهم ورجعت بيتنا.
وصلت البيت لقيت يوسف مارق قلت ليهو ماشي وين؟ قال لي جيتي بجمب ناس بتتظاهر؟ قلت ليهو لالا قال لي خشي جوة خلاص فعلا دخلت سلمت ع امي ولقيت هبه اختي نائمه قلت ليها هسي ي امي نحنا كشعب ذنبنا شنو قالت لي الله اعلم يحصل شنو؟ قلت ليها انا حاليا تعبانه ماشه انوم واجي اشوف الأخبار شنو؟ قالت لي طيب حاضر فعلا مشيت نمت وصحيت ع صوت هبه بتقول لي امنيه قومي من النوم ف ناس بتموت ي امنيه قلت ليها شنو قلتي! قالت لي ف ناس بتموت قمت صحصحت قلت ليها منو البموتو قالت لي ف ناس طلعت مظاهرات وفكو فيهم بمبان وكمان شوية رصاص قلت ليها نعم نعم وليه يعني؟ وكم الماتو قالت لي حاليا 4 الاتوفو قلت ليها لا حولا ولا قوه إلا بالله قالت لي تعالي معاي نحضر سوا الأخبار غسلت وشي ولقيت الساعه 5 قلت ليها ربنا يرحمهم يارب هسي أهلهم حيكون شعورهم شنو؟!! 💔 قالت لي الله يصبرهم بس اتذكرت مؤيد مشيت جريت فتشت تلفوني وبحثت اسمو اتصلت عليهو قلت ليهو مؤيد انت كويس؟ كويس انت ي مؤيد انت وين حاليا؟ قال لي منو معاي؟ امنيه؟؟ قلت ليهو ااي اي انت كويس قال لي لا لا ي امنيه قلت ليهو مالك ووين انت حاليآ ؟ قال لي ف المستشفى قلت ليهو كيف يعني وليه عندك شنو!! قال لي طلعت مظاهرات الليله مع الناس دي وف واحد كان جمبي جات طايره فيهو بمبان وجات ف يدو وحاليا معوق شديد والدم ي امنيه والدم قلت ليهو الكلام دا جد يعني قال لي اي يااخي انا حاليا ف المستشفى برجع ليك بعدين لمن أفضى قفلت منو وبقيت شايله همو تحصل ليهو مصيبه وبديت ادعي يارب احفظ لي مؤيد من كل شر يارب اصلح السودان واحفظو لينا يارب ارحم الناس الماتت يارب يارب يارب😭 امي جات لقتني بدعي وشايله هموم ف وشي قالت لي بتتكلمي مع منو كنتي؟ قلت ليها دا واحد صحبي قال مشى المظاهرات وف واحد اتعوق وجاهو بمبان طاير ف يدو قالت لي الله يستر ي بتي ويرحم كل الماتو قلت ليها امين امين ي أمي قلت ليها وين ابوي؟ قالت لي جاي ف الطريق قلت ليها كويس هو؟ ي امي انا خائفه اخسر لي زول، انا خائفه نبقى زي باقي الدول الادمرت، انا عاوزة اعيش ف سلام وأمان ي امي😭 قالت لي ربنا يصلح الحال يارب قلت ليها آميين بعديها ابوي جا خاشي قال لينا اوعكم تمرقو اي مظاهرات قلت ليهو حااضر ودخل غرفتو جبتا ليهو العشاء ومشيت اتصلت ع مؤيد تاني رد لي قلت ليهو اها وين انت؟ قال لي مارق من المستشفى قلت ليهو ي مؤيد تاني م تمرق مظاهرات يااخ المره دي م جاتك شي بس المره الجايه يمكن تجيك قال لي كيف م امرق والحاجات ماشه تزيد والناس بتموت وبتتعوق قدامي قلت ليهو عشاني طيب ي مؤيد انا م بقدر اخسر لي زول وم بقدر ع الكلام دا والله قال لي كدي خلينا لبكره نتفاهم قلت ليهو خلاص تصبح ع خير قال لي وانتي بخير بعديها رتبت الغرفه ونمت.
صحيت لقيت اتصال من خالي قلت ليهو ي هلا ومرحبتين قال لي أصبحتو كيف؟ قلت ليهو الحمدلله قال لي قلت انبهكم م تمرقو الايام دي الشارع عاوزين حاجه رسلو يوسف اخوكم قلت ليهو يا خالو لو الناس دي بدت تمرق مظاهرات وكدا الوضع ح يتحسن يعني؟ قال لي والله ع حسب حظنا يمكن اي ويمكن لا بس حاليا نحنا محتاجين ادعيه من ربنا قلت ليهو اي فعلاً قال لي كلمي اختك وامك قلت ليهو طيب حاضر من عيوني ي عيوني قال لي طيب يلا، مشيت لأمي لقيتها بتشرب ف الشاي قلت ليها حقتنا قال لي ايوة قلت ليها خالو اتصل هسي وقال م نمرق من البيت وقال نرسل يوسف لو احتجنا لحاجه قالت لي كويس قلت ليها الليله م عندي جامعه وبكره عندي امشي ولا لا؟ قالت لي لا طبعا انتي م شايفه الحاصل شنو قلت ليها خلاص ي امي م تكوركي فيني سألتك بس انا قالت لي سمح، جانا يوسف قال لينا حلتنا قالو ح يطلعو مظاهرات وي امنيه م اشوفك مرقتي بره وكلمي هبه اختك دي برضو سامعه ولا اعيد ليك كلامي دا؟ قلت ليهو طيب لكن ي يوسف قال لي لا لكن لا شي اظن لي كلامي واضح طوالي سكتَ.
فتحنا الجزيرة وبدينا نشوف الأخبار جا ابوي طالع الشغل قلت ليهو ح تمشي الشغل انت؟ قال لي اي ماشي قلت ليهو م تمشي بتحصل ليك حاجه قال لي ربنا حافظني ي بتي واستاذن ومشى.
ابوي دا حرفيا عندو إيمان كبير ف ربنا ودي اكتر حاجه بحبها فيهو💛.
وانا ماسكه تلفوني مؤيد اتصل لي قلت ليهو ايوة قال لي انا مارق المظاهرات قلت ليهو مؤيد الله يرضى عليك م تمرق ياخ ، قال لي والله ي امنيه م عارف بس انا مارق لو حصلت لي شي اعفي لي قلت ليهو مؤيد مؤيد اقيف اوريك وقفل الخط ف وشي، بقيت بفكر وبدعي ف نفس الوقت شهر 12 دا بالتحديد كل يوم وكل ليله بكون قلقانه اكتر من القبليها☹
الوقت مرا لحدي م العصر أذن اتصلت عليهو جاني قافل بقيت شايله قلبي ف يدي ومنتظره متييييين يرجع لي وف نفس الوقت دعواتي م وقفتها لحدي م اذن العشاء وانا لسه ماسكه تلفوني وراجيه اتصال منو، مشيت ع جهه التلفزيون اشوف الأخبار شنو؟ ولسه ماسكه قلبي ف يدي لحدي م قعدت ف الكنبه وشالتني النومه.
أصبح الصباح امي جات صحتني قالت لي قومي الساعه عشره جات قلت ليها قلتي شنو قالت لي قومي الساعه عشره قمت ع حيلي صليت واتذكرت مؤيد جريت شلت تلفوني لقيت م منو اتصال وبقيت اقول يارب يارب م يكون حصل لمؤيد شي يارب يارب احفظو لي من كل شر يارب، يارب يارب صلح الأوضاع ف السودان يارب يارب ارحم كل الشهداء لحدي م خلصت دعاء، اتصلت ع تسنيم قلت ليها ي بت الحاصل شنو قالت لي ف الناس البتموت دي قلت ليها اي فعلا والله احساس أهلهم حيكون شعورهم شنو؟ قالت لي الرحمه والمغفره ليهم قلت ليها امين قالت لي قالو احتمال تقفل الجامعات قلت ليها كيف عرفتي؟ قالت لي لقيت منشور ف الفيس وقالو كدا قلت ليها وبعلينا قالت لي كنت ماشه الليله بس م خلوني أمشي قلت ليها انا زاتي قالت لي صحي خالد بقى يتونس معاي عادي قلت ليها كويس طيب وقلت ليها صحيي ادعي معاي مؤيد يكون م حاصل ليهو شي انتي عارفه لو حصلت ليهو شي انا ح ارجع ضعيفه شديد ماف زول ح يقدر يرجعني زي م كنت غيرو هو!! هو الوحيد ي تسنيم 😭 عليك الله ادعي يكون كويس وم حصلت ليهو شي قالت لي لالا م اظن قلت ليها هو مرق معاهم وتلفونو مقفول كمان قالت لي إن شاء الله يكون كويس وم حاصله ليهو حاجه قلت ليها امين كبيرة كبيره.
الساعه حولين 3 جات وم عرفت خبر عن مؤيد القلق زاد قلقين والخوف زائد والادعيه مستمره والوقت ماشي وانا لسه بحاول اتصل ليهو لحدي م فتح معاي وجاني جرس رد لي وقال لي ايوة ي امنيه قلت ليهو مؤيد انت كويس؟ كويس كويس انت؟ قال لي اي الحمدلله قلت ليهو تلفونك ليه مقفول؟! وانا مش قلت ليك م تمرق مظاهرات تاني انت م عارف اني م بحب اخسر لي زول ف حياتي! مؤيد الله يرضى عليك اسمع كلامي وليه تلفونك مقفول؟؟ انت م عارف انا كنت قلقانه عليك قدر شنو؟ قال لي دقيقه اصبري احكي ليك مش كان اتصلت عليك وقلت ليك مارق مظاهرات فعلا مرقت م اكذب عليك ومنها لاقيت واحد صحبي ف المظاهرات شال تلفوني لانو قال عاوز يصور بيهو وبعديها اختفى وضاع مني رجعت البيت من غير تلفوني وبعديها نمت وأصبح الصباح اتصلت عليهو وقال لي اجيهو الليله ف بيتهم اشيلو منو مشيت ليهو بالصباح شلتو وجيت ختيتو ف الشاحن ويادوب فتحتو بس دا كل الموضوع ! قلت ليهو لا انت جادي!! طبعا انت لو عارف كنت خائفه عليك قدر شنو م كنت طلعت مظاهرات اصلا عارف ولا م عارف؟ قال لي اي عارفك بتخافي علي واي شي م ناكر ليك بس يا امنيه نحنا لمتين حتكون السودان دي كئيبه كدا لمتين ح نعيش ونحنا كل يوم بنعاني انا حاليا طالع وحاطلع كل مرة عشان بلدي يبقى احسن وأفضل كلنا بنتمنى لسودانا الأفضل بس كيف؟ لازم نتظاهر لحدي م يسقط البشير دا قلت ليهو وح تفتكر حيسقط بكل السهولة دي الحكايه صعبه شديد م بالساهل يعني! قال لي عشان كدا نحنا بنطلع وعندنا مطالب ولازم تتحقق قلت ليهو م عارفه بس م اظن يحصل الفي بالك حاليا انا همي ف الشهداء بس قال لي ربنا يرحمهم وقال لي انا مستعد اموت عشان بلدي تتقدم مستعد اموت عشانها م اكتر قلت ليهو طيب وانا موقفي وين؟ ح أمشي وين انا من بعدك! حياتي حتكون كيف من دونك؟ ح اقدر استمر ولا ح أفضل اتذكر ذكرياتنا سوا؟ مؤيد م تمرق يااخي البلد بتتصلح لمن الناس تكون مع بعض حنينه ومتفقه ف نفس الأسعار ولمن نكون قراب من ربنا السبب الرئيسي ف الخراب الحاصل دا بعدنا عن ربنا! قال لي اي فعلا قلت ليهو وم تفتكر اني واقفه مع البشير ولا غيرو انا برضو عاوزة اعيش ف سلام وأمان كمان بس م عاوزة تحصل مظاهرات وضرب وموت نحنا بلدنا م بستاهل كل دا وحتى لو سقط يمكن يجي اكعب من البشير لو انت شايف البشير كعب م معروف نتقبل الواقع نحنا بس قال لي خلاص برجع ليك بعدين قلت ليهو خلاص طيب 💛
فعلا مؤيد كل مرة بمرق مظاهرات وكل مره بقلق عليهو خائفه اني اخسرو زي ف الاول،انا حرفيا م صدقت رجع لي وبقينا سوا، هو يمكن عنيد شديد وبحب وطنو شديد بس انا موقفي وين معاو؟ المدارس والجامعات قفلوها لحدي م الأوضاع تتحسن، الحياة ف السودان ماشه أسوأ والمواطنين كل مرة واحد بستشهد.
عدت فترة وكانت فترة صعبه على كل الشعب السوداني.
لحدي م كان ف قرار لمليونيه 6 أبريل لقيت اتصال من مؤيد قلت ليهو لعلك مارق؟؟ قال لي ايوة وانتي ح تمشي معاي كمان😌 قلت ليهو شنو شنو! بري ما ماشه وانت زاتك م ح تمشي قال لي هبله انتي دا يوم تاريخي بعدين نحكي لاطفالنا عنو قلت ليهو انت عقلك دا وين ي صحبي؟ الليله ح يكون يوم عباره عن شهداء م تمشي يا زفت انت قال لي والله مارق بطريقتك ح يفوتك وحيكون حلو ارح امشي معاي مرة واحده م حتخسري شي قلت ليهو لالا طبعآ وانت م تمشي زاتك قال لي خلاص يلا مارق وطالع هسي وقفل الخط ف وشي رجعت ليهو لقيتو قفل تلفونو كل مرة لازم يقلق بي.
اتونست مع تسنيم وقالت لي ماشه المليونية قلت ليها حتى انتي كمان! قال لي اي اي ح تكون رهيبه قالو قلت ليها كيكه شوكلاته هي؟ عشان تكون رهيبه!! يخوانا خليكم واعين المسأله حياة وموت بقت قالت لي لالا ماف شي زي دا ح نهتف هتافاتنا ونسقط النظام ونرجع البيت قلت ليها نشوف ح يحصل شنو واتحصني وامرقي قالت لي طيب يلا قلت ليها انتبهي كويس يابت قالت لي طيب حاضر ودعتها وقفلت الخط منها.
اتونست مع امي وقلت ليها تفتكري البلد حتتصلح يعني؟
قالت لي القصه مافي الكيزان ولا غيرو لا لا البلد دي ي بتي ناسها بقو كعبين المشكله ف النفوس زاتها والكيزان ديل م كلهم كعبين منهم الفعلا غلطو وربنا حيعاقبهم ومنهم الما عندهم ذنب، الناس كلها بقت تنبز الكيزان هم ليه بجمعو يعني؟ الغلطانين المفروض يحاسبوهم براهم قلت ليها كيزان معناهم شنو اصلا؟ قالت لي اي كوز عاوز الدين ف دوله السودان دي فهمتي علي؟ زمان نحنا كنا جاهلين وم عارفين للدين شي شويه شويه دخلو علينا ناس وحببونا ليهو بقينا نتحجب ونلبس محترم امهاتنا زمان كانو جاهلين ي بتي ما كانو بعرفو للدين حاجه لحدي ما جو جزء من الناس ودخلو الدين فينا وف قلوبنا فهمتي علي؟ وديل ياهم الكيزان في منهم غلطو واسرفو ف القروش وطمعو فيها وفي وحدين ما اكلو قروش البلد دي وهم المظلمين عرفتي؟ قلت ليها طيب الناس بتنبز الكيزان ليه يعني؟ انا كوزة معناها لانو م بسمح لدوله مسلمه زي دي يحكمها ناس علمانيين أو حتى شيوعيين انا م عاوزة انتمي لحزب لانو م بتهمني انا عاوزة بس اعيش فسلام وأمان ويكون ف دين ف البلد م عاوزة اكتر من كدا قالت لي كلنا عاوزين كدا وربنا يصلح البلد دي بس قلت ليها آمين.
بقينا متابعين الأخبار ومنها كان ف إطلاق رصاص وكالعاده بمبان بقيت خائفه ومتوتره وف نفس الوقت بدعي... الوقت ماشي والبلد جايطه وما معروف الحي منو والميت منو💔.
مشى الوقت وبقيت بتصل لتسنيم عشان اطمئن عليها كان بجيني إحساس ف حاجه حاصله والتوتر والخوف ماسكين فيني وانا لسه بتصل وماف رد وحاولت اتصل لمؤيد كالعاده قافلو.
بقيت بتكلم مع هبه اختي قالت لي صحباتها كلهم مرقو قلت ليها سجمهم اقسم بالله الناس المشو ديل بين الحياه والموت بس قالت لي اي فعلآ بقينا نتكلم لحدي ما المغرب اذن صليت وجيت لقيت مكالمه من تسنيم قلت ليها تسنيم اها الحصل شنو؟ بتتكلم معاي وبتبكي قلت ليها مالك ي بت ف شنو؟ حاصله ليك شي؟ وهي لسه بتبكي قلت ليها يااخي مالك وريني؟؟؟ قالت لي لمن كنت ف القياده قبيل لاقيت مؤيد هناك بالصدفه وف أثناء ما نحنا اتلاقينا الكجر جو وجو يقبضوني هو جا عشان يحميني منهم فقام مسكهم وحاول يفكني منهم لحدي م اتفكيت وجريت ومشيت منهم بمسافه قلت ليها اها اها تميي؟؟؟ قالت لي بعداك للأسف قبضو مؤيد وهو حاليا معاهم قلت ليها كيف كيف يعني؟ تسنيم انتي جاده لالا يااخ اصبري انتي متأكده من كلامك دا؟ قالت لي اي والله قلت ليها وااي هسي هو وين ياربي انا كنت محذراهو ما يمرق بس هو متين ح يسمع كلامي ربنا يحفظو وما تحصل ليهو شي قفلت منها ودموعي لا إرادياً بقت تنزل لحدي م بكيت لي مسافه وانا خائفه تحصل ليهو مصيبه أكبر.
بقيت بلوم فيهو لانو هو ولا مره ما حصل سمع كلامي كنت حاسه انو ح تحصل حاجه ف نهايه الموضوع. وكالعاده مؤيد لازم يخليني متوتره وقلقانه عليهو مشيت صليت العشاء وبقيت بدعي ليهو وبدعي لكل الشعب السوداني على المصيبه الجاتو دي.
فعلا كل الكنت خائفه منو حصل بالضبط.
مشيت ع جهه الأخبار جاتني هبه قالت لي اخو صحبتها اتوفى وهو شهيد قلت ليها لا حولا ولا قوة الا بالله ربنا يرحمو ويغفر ليهو يارب💔
وكالعاده شهيد ورا شهيد لحدي ما اليوم البعديهو جاا وكان فيهو وفاه بعض الشهداء لهم الرحمه والمغفره.
عدت فتره وانا ما عارفه اي خبر عن مؤيد هل هو حي ولا ميت؟ لو ميت هو وين حاليا ولو حي قعد ياكل ولا قاعد من دون اكل؟ ولا الحاصل ليهو شنو بالضبط؟؟ وكنت لسه مستمره ف الادعيه.
مؤيد جزء كبير من قلبي، مؤيد كان العوض من ربنا بعد ما اتخطبت لواحد ويوم الخطوبه مشى وخلاني من غير أي سبب من غير أي مبرر مؤيد جاني ع شكل ملاك ف الارض انا ابدا ما مستعده اخسرو وح أفضل ادعي ليهو دائما وأبداً💛
يوم ورا يوم لحدي ما جات مليونيه 11 أبريل كنت متردده امشي القياده واشوف الحاصل بعيني واشوف شكلها والناس كلها بتحكي عنها كان عندي فضول اعرف الحاصل شنو هناك بالضبط؟؟
يوم 10 أبريل بليل الناس كلها كانت متأكده انو حيسقطو البشير ومنها السودان حيبقى حر فعلا أعلنو الخبر صباح 11 أبريل ومنها فعلا هو سقط وعمَ الفرح لجزء من السودانيين.
ف ناس كانت خائفه انو يسقط لانو يمكن يجي واحد اكعب منو وف ناس كانت فرحانه لانو سقط واتحققت الحاجه يلي هم عاوزنها وف ناس تانيه كانت بتطمع ف السلطه وف ناس كانت عاوزة تعرف حيجي منو بدلو؟وهل فعلا لو جا بدلو واحد ح يتغير السودان من كل النواحي ولا ح نرجع لورا اكتر والحاله تبقى اكعب؟
ف الجزء التالت حنعرف تفاصيل كتيره خلونا نتلاقى ونعرف شنو حيحصل؟
#والجاي_احلى
