روايه هو ثورجي وانا كوزة💛
الجزء التالت والأخير
للكاتبه امنيه عبدو
قررت اطلع اشوف القياده واشوف شكلها عامل كيف؟ حماس الناس وكلامهم الكتير عنها خلت تجيني لهفه اشوف الحاصل شنو هناك هل هي فعلا حلوة زي ما بقولو ولا هل هي كعبه وكلها تحرشات وفيها جزء فيهو ناس شايله مخدرات كنت عاوزة اعرف ف شنو هناك بالضبط؟؟
يوم 11 أبريل جهزت هدومي واتوكلت واتحصنت ومشيت وصلت بعد تعب ومعاناة وخوف اتخلعت بكمية الناس الهنا وكميه الفرح الفي عيونهم وكيف هم بتبادلو الحاجات وكيف كانو فرحانين قدر دا؟ بقيت ماشه وماشه لحدي م لاقيت زميله لي ف الجامعه بالصدفه اتونست معاها واتفارقنا بقيت لافه وما عارفه امشي بوين وسامعه ناس بتهتف وانا ما حافظه اي هتاف م كان عندي علاقه بالثورة كل همي اعيش ف سلام وأمان وبس.
كنت بعاين ف وش كل واحد يلاقيني كان الفرح باين ف وشوشهم والشوارع كانت مليانه وكميه زحمه وف كميه مواكب مرت بجمبي كانو منتظرين متين يعلنو الرئيس الجديد وحيكون منو اصلا؟؟ عدت ساعات لحدي ما الناس بقت تقول جابو واحد اسمو عوض ابن عوف..ف ناس سألت عوض ابن عوف دا منو؟ لحدي ما اكتشفو انو هو كوز قررو يسقطوهو ويجيبو البديل ليهو فعلا الناس بدت تكورك موكب ورا موكب لحدي ما اليوم خلص ف ناس رجعت بيتهم وف ناس كانت بايته ف القياده.
رجعت البيت امي سألتني مشيتي وين؟ قلت ليها القياده قالت لي شنو شنو عيدي كلامك دا؟ قلت ليها مشيت اشوف هناك ف شنو بالضبط؟ قالت لي الكلام دا ما كويس ي بت اوعك تاني بحذرك والمره الجايه بكلم ليك يوسف اخوك فاهمه ولا ما فاهمه؟؟ قلت ليها طيب حاضر مشيت منها وطوالي رقدت نمت.
شالتني النومه لحدي اليوم البعديهو جاا لقيت اتصال من مؤيد اتخلعت شديد رجعت ليهو وكلي شوق ليهو قلت ليهو مؤؤؤؤؤيد😭😭😭 وين انت ياااخي!! قال لي والله تقولي شنو بس قلت ليهو تعبت منك حرفياا انا احكي لي الحاصل شنو معاك؟ قال لي مشيت المليونية ولاقيت صحبتك تسنيم هناك الكجر جو يقبضوها وانا ما رضيت بالحاجه ديي حاولت شديد افكها منهم لحدي ما فعلا قدرت وخليتها تهرب منهم قلت ليهو اها تم لي شنو الحصل تاني؟ قال لي بعداك مسكوني انا وودوني معاهم محل كدا ومعاي مجموعه دقونا وامس بالليل طلعونا وقالو لينا دي اخر مره تمرقو قلت ليهو وبعلي وبعلي يااخي الحمدلله انت حاليا كويس المشكله ما هنا المشكله انو انت لسه حتمرق وما ح تشتغل بزول قال لي اصلا ي بت😂😂 قلت ليهو ووووب منك ما بتتوب انت قال لي متعه والله الكلام دا قلت ليه قول لي متعه لحدي م تجيك رصاصه وتضيع فيها قال لي ومالو اموت ف سبيل وطني قلت ليهو امممممممممممم قال لي اها انتي عامله كيف؟ واشتقنا شديد قلت ليهو ما وريتك طبعا قال لي اها؟؟ قلت ليهو طلعت أمس المليونية وشفت القياده كمان قال لي كذابه والله م بصدق قلت ليهو والله جد قال لي معجزة دي حقيقه يعني😂 قلت ليهو اي اي ودي آخر مره وكانت أول مره قال لي لالا يااخ قلت ليهو الحياة دي قاسيه كدا ليه؟ قال لي قاسيه من كل النواحي كمان قلت ليهو حزن شديد والله قال لي بعدين بتصل ليك حاليا عاوز اجهز وماشي القياده تاني قلت ليهو عشاني ممكن م تمشي؟ قال لي انتي شفتي أمس كان ف ضرب؟ قلت ليهو لالا قال لي خلاص بس ويلا يلا قلت اطمئنك عني قلت ليهو طيب يلا ربنا يحفظك💛
شربت الشاي بهنا الضهر اذن بهنا صليت وبقيت بشوف ف الأخبار ومعاي امي وهبه اختي وجات بت جيرانا بقينا نتونس قالت لي يا كوزة قلت ليها ي هلا ي هلا قالت لي كمان فرحانه قلت ليها وليه ما افرح حصل شفتيني سرقت لي قروش حقت شعب ولا من زول؟ ولا حصل قتلت لي زول ما هو ي جماعه ما اي كوز أو كوزة كعب أو كعبه عرفتي؟ قالت لي عرفت لكن برضو كوزة مندسه قلت ليها واظبط كوزة ممكن تلاقيك كمان قالت لي اها الجامعات حيفتحوها متين؟ قلت ليها بري ما بعرف ريحونا منها زاتو قالت لي مش كدا عليك الله قلت ليها يب يب قالت لي بعد دا بدور امشي البيت قلت ليها ونسي شويه قالت لي مره تانيه يلا يلا قدمتها لحدي الباب وجيت راجعه.
امي قالت لي انا مبسوطه منك قلت ليها ليه من شنو؟ قالت لي بقيتي واعيه وفهمتي كل الشرحتو ليك قلت ليها يب يب🙈.
الوقت مرا لحدي ما المغرب اذن وقالو حيكون ف بيان مهم لكل الشعب السوداني كالعاده بقينا منتظرين البيان لحدي ما جا وقت البيان والرئيس عوض ابن عوف اتخلى عن الحكم واستقال الناس طلعت الشوارع وكانت فرحانه جدا جدا قدرو يسقطوهو ومنها فعلا هو سقط.
اتصلت على تسنيم قلت ليها ي بت قدرتو تسقطوهو بس المشكله الحيجي بدلو منو؟ الشغله دي بقت لعب بعد دا قالت لي ربنا بسهلا يا زوله قلت ليها اميين شديد.
اليوم خلص لحدي ما اليوم البعديهو جاا وكان ف قرار عن تعيين رئيس المجلس العسكري الإنتقالي يلي هو البرهان وكان ف يوم 13 أبريل كنا مستغربين دا منو وعاوز يعمل شنو؟ كل الشعب السوداني فرح بيهو شديد لانو ما كان منتمي إلى أي حزب بعديها ظهرت أحزاب كتيره وظهر كمان نائب رئيس المجلس العسكري الإنتقالي حميدتي وهو كمان قائد قوات الدعم السريع بقينا مستغربين ديل ظهرو من وين وزمان كانو وين؟؟ لحدي ما فعلا البلد هدت شويه.
عدت فتره لحدي ما جات مليونيه كبيره يلي هي 9 رمضان يلي ماتو فيها ناس كتيره واستشهدو (لهم الرحمه والمغفره).
علاقتي كانت مع مؤيد ماشه زي الفل ماشه للأحسن رجعنا حلوين زي ما كنا ، مؤيد حرفياً حاجه جميله شديد ف حياتي ، حيفضل هو دائما معاي ودائما بين دعواتي موجود💛.
تسنيم اعترفت لخالد بحبها ليهو وندمت على كل شي قدمتو ليهو لانو طلع فالنهايه هو ما بستاهلها ربنا عوضها بواحد واتقدم ليها والأهل كلهم وافقو.
فعلا مهما مريتي بأيام كعبه وانكسارات حيجي عوض يعوضك عن كل شي انتي مريتي بيهو انتي بس خليك متفائله.
مرت الايام لحدي ما مؤيد اتصل لي قال لي امنيه قلت ليهو ايوة احكي قال لي لو قلت ليك اني مشتاق ليك ح تصدقي قلت ليهو وااي اخيرا بقيت تقول كلام يفتح النفس😂 قال لي الليله ماشي القياده ومقرر ابيت هناك قلت ليهو وليه يعني ما تمشي قال لي ههههه وليه ما امشي قلت ليهو ما عارفه بس خليك ف بيتكم احسن قال لي لالا لازم امشي قلت ليهو ليه لازم؟؟ قال لي ما عاوز ادس منك شي بس م تزعلي مني قلت ليهو ليه مالك ي ولد؟؟ قال لي والله يااخي ما فضل لي كتير ف الدنيا دي قلت ليهو بسم الله مالك هااا؟؟ قال لي عاوز اوريك اني ليه زمان مشيت وخليتك قلت ليهو ليه؟؟ قال لي للأسف الشديد طلع عندي كانسر ف الكلى قلت ليهو مؤيد بطل يااخي عاوز تختبرني عارفاك انا قال لي لالا جادي معاك قلت ليهو كيف يعني ي ولد قال لي عدييل كداا ما كنت عاوزك تتعلقي بي لانو ما فضل لي كتير عشان اعيشو قررت امشي واخليك وتتعودي تعيشي من دوني قلت ليهو مؤيد عليك الله قول لي انك بتكذب علي يا مؤيد قال لي والله دي الحقيقه قلت ليهو ما عارفه حاسه الدنيا ضلمت ف وشي حرفيا الدنيا دي كل يوم بتثبت لي انو هي قدر شنو قاسيه قال لي كل القساوة فيها هي بس قلت ليهو اكيد طبعا انا بحبك ي ولد فخليك قوي وانا معاك ف كل خطوة ربنا يغفر لي لانو اليوم داك حققت معاك كتير اعفي لي عليك الله قال لي لالا يااخي م عملتي شي انتي بس ادعي لي معاك قلت ليهو طيب حااضر ما قادره اصدق استغفرالله يارب😭😭😭😭😭😭😭😭😭 قال لي يلا مع السلامه عاوز اجهز هدومي لانو حابيت هناك قلت ليهو ربنا معاك ما تنسى تتصل علي بعدين قال لي طيب يلا بحبك قلت ليهو وانا كمان والله😭 قفلت منو رقدت ف سريري وبقيت ببكي معقوله ياربي الدنيا دي كدا؟؟انا ح اصبر لحدي متين؟ هل ح اقدر اتحمل كل البحصل معاي دا؟ هل انا فعلا حظي كعب دائما كدا؟ هل هو بالجد عندو كانسر ولا بطلس فيني (جاوبت لنفسي) لالا ياخ ما اظن يكذب دي ما حاجه بكذبو فيها كملت كل الدموع الفيني ومسحت دموعي وطوالي اتوضيت صليت وبقيت بدعي.
فعلا الصلاه هي الوحيده الكانت بتقيف معاي ف كل أحزاني😭😭
المساء جاا اتصلت عليهو قلت ليهو اها وصلت؟؟ قال لي ااي قال لي طبعا ف حلاوة جوو انسي بس قلت ليهو من غيري طبعا ما حلو حيكون قال لي اي والله بس فيهو شويه حلاوة وناقصك انتي بس قلت ليهو يا ريت لو كنت جمبك وطبطبت عليك قال لي اها الجلسه الجايه حتمشي معاي؟ قلت ليهو طوالي جداا قال لي خلاص تمام وانا بحبك شديد يا امنيه قلت ليهو وانا بحبك اكتر يا مؤيد قال لي طيب يلا نواصل بكره ونسه قلت ليهو طيب يلا.
مشيت نمت لحدي ما أصبح الصباح واعلنو عن فض الاعتصام يوم 3 يونيو اول ما عرفت دموعي جرو بقيت بفكر ياربي مؤيد هو وين والحاصل ليهو شنو يارب احفظو لي ما عندي زول غيرو ياربي م تمتحني اكتر من كدا ياربي كون معاي واحفظو لي من كل شر(وبتكلم مع نفسي) ياريتك لو ما مشيت يا مؤيد هسي ما عارفه انت كويس أو لا؟؟ يارب لطفك بس يا ريتك لو بتسمع كلامي ي مؤيد وما كان مشيت وبقيت بدعي ليهو وقلبي في يدي ومتوتره لأبعد حد.
اتصلت لتسنيم عشان تخفف علي شويه وتطمئني انو هو كويس وقالت لي ما عارفه اقول ليك شنو بس ربنا يحفظو وما تجيهو حاجه قلت ليها عليك الله ادعي ليهو يااخي ، الحياه ح تكون من دونو قاسيه شديد لو مشى وخلاني واتخيلي يا تسنيم طلع عندو كانسر😭😭 عشان كدا هو مشى وخلاني عشان ما اتعود عليهو ليه حياتو دي قاسيه كدا محل ما يمشي لازم تحصل ليهو مصيبه واااي ياربي ألطف.
الساعه 8 صباحا بقيت بشوف ف التلفزيون الأخبار فعلا كان بفضو الاعتصام جريت على جهه تلفوني عشان اتصل ليهو واشوفو حاولت اتصل كتير بس للأسف ما كان ف رد ركزت ف شاشه التلفون ف رساله نصيه منو هو ومرسلها الساعه 1 صباحاً كاتب لي فيها (امنيه سامع الناس بتقول ح يفضو الاعتصام الليله دي او ف الساعات الصباحيه ما متأكد من الخبر بس لو طلع حقيقه اعفي لي عن كل شي عملتو ليك ولو حصلت لي حاجه خليك مع امي دائما وامشي زوريها واتفقديها حاسس بانو الموت جايني خلي كل الناس تعفي لي بحبك شديد وكان نفسي نكمل سوا اعفي لي يلا ودعتك الله😭) رسالتو دي حطمت أجزاء قلبي وحده وحده فجاه من غير مقدمات الدنيا ضلمت ف وشي رغم رسالتو دي كان عندي يقين بانو حيكون عايش حيكون هرب مع الناس الهربت كان بجيني إحساس اني ح افقدو بعد رسالتو دي وف نفس الوقت احساس بانو هو لسه عايش كنت محتاره شديد بينهم لحدي ما اترميت ف الارض وبقيت ببكي ، ببكي وانا ما عارفه هل هو حي ولا ميت؟؟ ببكي لانو م عندي اي استعداد اتقبل انو هو يمكن يموت أو حتى يستشهد ، بحاول اطمئن ف نفسي انو هو حيكون كويس لانو هو ثورجي بطل والشجاع حقي ، الساعات الصباحيه الأولى كانت مفزعه شديد لكل الشعب السوداني اغلب الأهالي يلي كان عندها ناس ف القياده كانت خائفه تحصل ليهم حاجه يوم 3 يونيو يوم مرعب شديد لكل أم أو أب أو أخت أو اخ أو حبيبه أو صاحب يوم مليان حزن شديد ، لحدي ما الوقت مرا ولسه كنت بحاول اتصل ليهو عسى ولعل يرد لي الوقت لسه كان ماشي ونحنا متابعين الأخبار ف الجزيره وم عارفين الحي منو ولا الميت منو؟!💔.
يوم 3 يونيو بالنسبه لي يوم مليان توتر مليان خوف مليان بكا ، قفلت الغرفه علي ومنتظره منو اتصال يطمئني عليهو لحدي م خلص اليوم وجا اليوم البعديهو ، يوم 4 يونيو كان أسوأ يوم ف حياتي، خسرت اكتر زول مهم ف حياتي، خسرت مؤيد للأسف الشديد اترسلت لي رساله من واحد زميلي وزميلو وقال لي مؤيد استشهد للأسف مع الناس الأمس ، الخبر جاني زي الصاقعه حاولت اوريهو انو لالا هو عايش انا متأكده وكنت متأكده انو مؤيد م حيخليني ويمشي ، لالا مستحيل يكون مشى وحياتو كدا انتهت يعني؟ أو بالأصح حياتي زاتها أنتهت معاو ، اتصلت على زميلي وأكد لي الخبر بانو فعلا هو استشهد ، قلت ليهو لالا يااخي بكونو غلطو وبعدين هو كان واعدني بانو م ح يمشي سريع كدا يااخي اتأكد لي من الخبر دا انا ما قادره والله وعايشه على اعصابي ، حاسه نفسي ف حلم مليان سواد مليان خوف قال لي والله للأسف استشهد خلااص قفلت الخط ف وشو وم اتكلمت كلمه واحده تاني ، قفلت الغرفه علي وبكييييييتتت طلعت كل الجواي لحدي م فعلا هديت شويه اتذكرت رسالتو لي الأمس لبست هدومي سريع سريع واتصلت ع زميلنا ووصف لي بيتهم الجديد يلي رحلو فيهو وصلت هناك لقيت فعلا ف ناس كتيره ، قعدت ف زوايه براي كملت كل دموعي قمت من مكاني فتشت امو بين الناس عاينت ليها والحزن كلو ف وشها بكيت زياده ع فقدان ولدها ع فقدان سندها ع فقدان مؤيد حبيبي حاولت اني ابقي قويه بس ابدا كنت ضعيفه شديد ومهزومه وانا قدامها م حاولت امشي اسلم عليها اكتفيت بانو شفتها من بعيد لحدي ما جابو الجثمان شفت الجثمان طوالي اغمي على ، شالوني وكبو فيني مويه وبقيت بقول ليهم زحو مني جيبو لي مؤيد بس جيبو لي مؤيد انتو م بتسمعو الكلام دا؟؟ قولو ليهو امنيه عاوزاك تعال😭😭😭😭 ف كتار البكو فيني والبكو معاي وقالو لي بس ادعي ليهو معاك وربنا يصبرك عليو.
م قدرت اقوم امشي عليهو م قدرت رجولي منعتني وم كان عندي اي استعداد اشوفو مكفن كدا.
رجعت بيتنا رجعت لحضن سريري وبقيت بتذكر كل ذكرياتنا سواا، هبلنا وعوارتنا وضحكتو البتخطف قلبي، بقيت بتذكر كل الذكريات ومع كل ذكرى لي معاهو دموعي بتنزل مضاعفه.
حاولت اني اتقبل الوضع حاولت اني اشيل فكره انو هو حي، حاولت أصدق انو هو فعلا مشى وخلاص.
وكل يوم كنا بنسمع باسم شهيد جديد لحدي ما تم أسبوع من وفاتو كان اكعب اسبوع يمر علي وكيف ما يكون كعب وانا خسرت الثورجي حقي!!
بعد اسبوع من وفاتو قررت امشي زياره لامو زي ما هو وصاني عليها شديد مشيت ليها ف بيتها عزيتها قالت لي انتي منو من صحباتو يا بتي؟ قلت ليها امنيه قالت لي انتي امنيه بالله؟ قلت ليها ايوة بتعرفيني انتي؟ قالت لي كيف ما بعرفك ي بتي ومؤيد كل مره بحكي لي عنك يااخي جنني عديل بيك قلت ليها بالجد؟ كان بقول ليك شنو عني يا خالتو؟ قالت لي م حصل قال عنك كلام ما كويس بالعكس كان دائما بشكرك لي ودائما بجيب لي سيرتك قلت ليها ربنا يرحمو يارب ونحسبو شهيد قالت لي اميين اميين قلت ليها هو صحي عندو كانسر ف الكلى؟ قالت لي اي يا بتي يحليلو ما شاف للدنيا دي شي وقالت لي انتي كيف عرفتي وهو قال لي م عاوز يوريك؟ قلت ليها وليه م يوريني قالت لي هو بحكي لي دائما من هو صغير ما بدس مني شي وقالت لي هو يا بتي من شده ما بحبك لمن عرف انو هو عيان وانو هو خلاص ح يموت جا سألني يوريك كيف انو هو عيان ويقول ليك شنو وانتي ح تستحملي كلامو؟ هو طوالي قرر يخليك براك كان نفسو تكوني معاو واكون انا نسيبتك يحليلو يا بتي القى مؤيد تاني وين انا😭😭 قلت ليها انا اشتقت عليهو شديد وربنا يرحمو ونلاقيهو ف الجنه إن شاء الله.
ودعتها وطلعت منها قدرت اطبطب عليها بس لنفسي ابدا م لقيت زول يطبطب علي ويقول لي انو هو خلاص مشى من الدنيا دي وانو انا مفروض أصدق الحاجه دي.
رجعت البيت طلعت دفتري وبقيت بكتب وكتبت:-
(ع فكره ي مؤيد انت فارق معاي شديد ، حياتي من دونك ولا شي ماشه ساي ف الدنيا دي من غير أي أهداف من غير أي طموحات، يا ريتك لو سمعت كلامي اليوم داك وم مشيت ياريت لو منعتك وقلت ليك لا م تمشي وسمعت كلامي ايوة نعم انت كنت حاسس انك ح تموت حاسس انك فعلا ح تمشي تخلي الدنيا دي بقولو ي مؤيد الزول بجيهو احساس انو حيموت وحيفارق الحياه ، انا حاليا بكتب عنك كتابات كتيره وبحكي ليك حاجات كتيره ف دفتري قعد تصلك هي؟؟ كنت بتمنى تكون معاي لحدي هسي بس ما مشكله انت قاعد ف مكان احسن من الدنيا القاسيه دي ع قولك كل القساوة فيها فعلا زي ما قلت كل القساوة فيها ).
انت عارف انا بشوفك ف وش كل زول بلاقيني حتى ملامحك البحبها بشوفها حتى سماع صوتك قعد اسمعو حاسه انو انت لسه موجود بينا وموجود ف وسطنا.
انت كنت بتحب وطنك شديد وزي ما كنت بتقول لي انا مستعد اموت عشان وطني فعلا ي حبيبي انت مت ف سبيل وطنك انت شجاع شديد ع فكره فأنا بحبك حتى وانت قاعد حتى وانت مافي م حتصدق انا مشتاقه ليك قدر شنو!!
بقيت متوحده شديد ما بطيق الناس دي كلها حتى بقيت بقعد ف ركن ف غرفتي وبقعد ابكي واطلع كل الجواي من غير صوت.. ببكي من جوة قلبي حتى اهلي لاحظو للحاجه دي وكنت كل مره بشوف ف صوري معاك واتذكر ذكرياتنا الجميله ، حتى الجامعه بمشيها وبرجع طوالي اتغيرت شديد من بعدك بتمنى انو الزمن يرجع لورا عشان امنعك تمشي بس للأسف دا حال الدنيا بتشيل الناس الحلوين والطيبين دائما💔.
ف ناس كتيره حبتك حبتك وانت ما موجود من خلال سيرتي دائما عنك ف ناس حبتك شديد معقوله بالسهوله دي؟؟ قول ليهم اني بغير يااخي وريهم انت معاي وحقي ولسه موجود.
اعفي لي يا مؤيد انا اسفه شديد ربنا يتولاك برحمتو ما مشكله ح احسن عملي عشان اشوفك ف الجنه إن شاء الله بالمناسبه بحبك شديد شديد💛.
عدت فتره ي مؤيد لحدي ما جا يوم 21 أغسطس جا واحد اسمو عبد الله حمدوك رئيس مجلس الوزراء السوداني ، بعد فتره فجاه الناس بقت تقول شكرا حمدوك اتخيل بس؟ وين حقكم انتو الشهداء !! (يخوانا خليكم واعين شويه العاوز يقول شكرا يقول لربنا م يقول لإنسان وبعدين هو لسه م أنجز لينا وم حقق لينا المطالب يلي انتو طلعتو عشانها فبس يعني بطلو تقولو شكرا حمدوك خليكم واعين).
طبعا ي مؤيد حصلت مظاهرات كتيره شديد وكل مره بتكون بسبب حاجه معينه ، ولسه الوضع م اتحسن شديد بالعكس نحنا بنرجع لورا اكتر ولسه الأسعار زائده ولسه ف صفوف عيش وبنزين وغيرهم لسه نحنا بنعاني قول ليهم انو انت مرقت عشان يتصلح الحال ما عشان نرجع لورا وريهم ياااخي.
يوم عرفت انو فضو الاعتصام خلاااص خفت شديد عليك كنت بحاول اطمئن ف نفسي انك عايش مع انو هو ف ناس كتيره ماتت وف ناس كتيره قدرت تهرب كنت بقول انو انت هربت معاهم بس لا للاسف الشديد جاتك رصاصه وطوالي وقعت استشهدت.
من شده ما قعد انشر ف الفيس عنك وعن سيرتك ف واحد خش لي خاص وقال عاوز يلاقيني عشان يحكي لي عنك يوم فض الاعتصام حصل شنو؟ وطوالي اتلاقينا وحكي لي وقال انو الطلقه كانت حتجي فيهو هو ما انت وانت كنت شايف الرصاصه موجهه فيهو جيت وقفت سريع قدامو وجات فيك انت بدلو هو انت عارف هو بحكي لي وببكي عدييييييل قال لي اعفي لي عشان حرمني منك انت قلت ليهو انا عافيه ليك وبعدين يومو تما والكلام دا كلو مكتوب انا كنت مؤمنه وعارفه اي زول عندو مواعيد حيموت فيها عشان كدا م اتناقشت معاهو كتير لكن اثبت لي انك فعلا راجل وانك قوي وانا حأفضل فخوره بيك شديد قدام الناس.
تعال احكي ليك الحصل شنو تاني عدت فتره ومنها خلصت جامعه كلو كلو وعملت البحث واتخرجت بس م مبسوطه عارف ليه؟ لانو تخريجي من غيرك م ليهو طعم أساساً كنت فعلا فاقداك شديد.
خليك عارف اني ابدا م نسيتك ، انت لسه موجود ف قلبي ولسه انت قاعد ف وسطنا اعفي لي لو نسيتك ف يوم تعال احكي ليك اول ما اتخرجت قدمت لي ف كم محل فالنهايه قبلوني ف واحد وحاليا شغاله ، عارفاك عاوز تسألني عرست ولا لسه😂 والله يااخي لسه ولسه كمان ما قادره اتقبل الوضع دا ولسه ما جا الزول المناسب لي وعاوزة اوريك كمان الزول المناسب لي انت والله مافي زول غيرك فاقداك شديد تصدق؟😭.
صحي نسيت احكي ليك تسنيم صحبتي عرست طبعا وجابت ليها بيبي لطيف شديد فاجأتني بانو سمتو مؤيد حبيتها شديد لانو سمتو بأسمك.
انت هسي كيف؟ والحاصل ليك شنو اها وريني اشتقت لي ولا لا؟
ح احاول غايتو أتجاوز كل شي وأكمل طريقي براي مع انو من غيرك صعب شديد بس مفروص اكملو براي لو عرست وجبت شافع صدقني ح اسميهو باسمك ي ثورجي انت ح احكي ليهم عنك وح احكي ليهم قصتي معاك من البدايه للنهايه حاوريهم انو الوطن أهم حاجه ف حياتهم انت حرفيا غيرتني شديد يلا اعفي يلا مع السلامه💛.
خلونا نختتم بأنو الحب فعلا حلو مع الزول المناسب بس ، خلونا م ندي قلبنا وحبنا لزول هو م مدينا اعتبار ، خلونا ندعي لكل الشهداء من غير استثناء خلونا نبني سودان خالي من النفوس الكعبه خلونا نحب بعض ونتفقد بعض الموت بقى بخطف فجأه خلونا اي زول انتو متشاكلين معاهو ترجعو تتصالحو وتبقو احسن من الاول لانو حرفيا الدنيا مره واحده والدنيا ما مستاهله كل دا خلونا نكون حلوين مع بعض يااخي ، خلونا م نرمي الوسخ ف الشوارع خلو سودانا يكون ف أفضل حال خلونا نتصدق ونكسب الاخره خلونا نصلي ونقرأ قرآن دائمآ عشان نكون قراب من ربنا خلونا ندعي لبعض خلونا نبطل غيره وفتن ونبطل نكون خسيسين كمان خلونا نضيفين من جوة لحدي م ربنا يستلم امانتو ، خلونا نشوف حل للأطفال المشردين ديل خلونا نشوف حلول للمستشفيات وتوفير الحاجات اللازمه.
فالنهايه الوطن دا حقنا كلنا وواجبنا نحبو لانو هو اعتبارو بيتنا الأول و اي حاجه بنتمناها لبيتنا نتمناها لوطنا كمان ، خلونا ننضف الشوارع تبقى زي باقي الدول النضيفه خلونا نتغير ونمشي للأحسن بس بالعكس نحنا كل مره راجعين لورا اكتر ، خلونا يااخي نبطل تنمر ف الناس خلونا نخلي الناس ف حالها ف النهايه هي خلقه حقت ربنا في ناس كتيره بتعاني من الحاجه دي ، خلونا نتغير خلونا نحترم المواعيد ، وأهم حاجه خلونا نغير سلوكنا للأحسن ، نحنا محتاجين عقوبه لأي زول برمي الوسخ ف الشارع وفرو لينا مواصلات لانو نحنا حاليا بنعاني شديد عاوزين حل للمشكله دي بأسرع وقت والمصيبه حاليا بقت ف العنصريه قد تكون هي أكبر مصيبه ف السودان ما عاوزين تفرقه كلنا سودانيين كلنا أبناء الوطن كلنا واحد من الليله ولقدام م عاوزين عنصريه.
واخيرا حبو السودان كفايه انو كان حلم كل شهيد وأخيراً خلونا نبني سودان جديد ونحن لازم نكون على الوعد والعهد.
إن شاء الله الروايه تكونو استفدتو منها وإن شاء الله كلنا نتغير للأحسن ونبنى سودانا الجديد يلي حيكون محقق كل الحاجات الفوق دي خلونا نتغير💛
_________________________________________
*كان هو ثورجي الذي أحُب وكنت انا كوزته التي يحبها*
_________________________________________
#ختاماً:-
اول شي عاوزة اقول انو الروايه ما بتحكي عني أغلبها من وحي خيالي وف شويه كلام من الحكاوي البسمعها وف أفكار من الكاتب حامد علي ، تانيه حاجه دي الروايه التانيه لي مبسوطه شديد من نفسي وتالت حاجه الروايه الأولى اسمها *تكلمت مع الكثير ولكن أحببتك انت* امشو اقروها لأنها مفيده شديد رابع حاجه ربنا يرحم كل الشهداء ويتقبلهم ويرحم جميع موتى المسلمين خامس حاجه بعتذر شديد لانو هي كلها 3 أجزاء بس مفروض تكون اكتر من كدا لكن الجزء الواحد فيهم طويل شديد فبس يعني ما حنك سادس حاجه وأخيراً حب شديد وكبير لأي زول بشجعني وبحمسني أكتب وأخيراً نتلاقى ف روايه تالته ابقو طيبين💛
#النهايه.
