1 aña despues..
Lo bo'n kere, pero Ashana a disidi di duna Eugene un chèns mas. Apesar di tur e engaño nan a disidi di purba atrobe paso kon ku bai bin ta e ta tata di e yu hòmber presioso ku Ashana a haña.
Hopi kos a pasa den e un aña ei. E ku Eugene ta biba huntu bèk i nan ta hasiendo tur nan posibel pa traha riba nan relashon pero tòg Ashana ta sinti un bashi di paden. Ta manera falta algu. E pashon ku e tabata sinti manera Eugene mishi ku n'e ya no tei mas. Kada bes ku Eugene trata na aserka su mes na Ashana, e ta klap sera. E sèks no tabata sinti mes dushi mas. Promé nan relashon tabata basá riba sèks i awor ni atrakshon seksual e no ta sinti mas p'e. Ademas nunka e tabatin sintimentu pa Eugene i ni maske kuantu e fòrsa su mes, e no ta sinti e amor ku e mester sinti pa su pareha. E ta sinti'e bashi di paden, hopi bashi i pa ser sinsero e ta serk'i bira loko paso e no sa mas.
Pa evitá ku e ta bira loko el a tuma un desishon hopi impulsivo. E ta kue su laptop, subi klm.nl i kumpra un pasashi rumbo pa Kòrsou. E tabata den nesesidat di hairu fresku pa e por pensa ku di bèrdat esaki ta e bida ku e ke. Un ratu for di tur kos, un ratu for di e bida fòrsa ku e ta bibando, un ratu pa ser su mes, un ratu pa laga e maskarada di 'felisidat' kai. Un momentu for di Eugene!!!
Ha! mar'e e kier sa ku e trip pa Kòrsou ei lo bai kompliká su bida mas di loke e tabata...
