الحَـــلْـــقـــة الــثـامِــنَــة عــشـــر 🌹 للكتابه الشاعرة شهرزاد😍😍😍😍😍😍
روايــــة #غاليتي ❤
منجي يضحك : باهي ياقلبي انا مخطم على استيقاف توا نحكي معاك بعدين
غاليه : اسمع اسمع
منجي : نعم
غاليه : ادعي ربي يكمل علينا بالخير
منجي : امين يارب
_________________
#بعد_يوم 🌹
امينه عند سعاد
تشرب في القهوه : طولو معش جو
سعاد : ان شاء الله خير يارب ؛ خودي اغريبه ياامينه
امينه : توا ناخد مانش برانيه
غاليه خشت قعمزت و متوتره اتهز في كراعها
امينه بحتت فيها : توا عليش قاعده تحرقي خلاص توا ربي يحلها
غاليه سكتت
سعاد : ان شاء الله خير
الباب دق
صفاء مشت تجري تفتح
فتحت الباب
منجي : طييري
صفاء ضحكت : مانجا ياطيري
منجي خش يضحك : شن الجووو
سعاد بحتت في غاليه : صبي البسي محرمتك
غاليه خشت تجري
منجي بصوت عالي : السلام عليكم
امينه : وعليكم السلام شن صار
منجي : والله تمام الحمدلله
سعاد : قعمز تريح
منجي قعمز : قال نسأل البنت باتي قاله البنت موافقه وامها موافقه غير انت في مكان بوها و لازم تعطي كلمتك
سعاد : هو جمال كويس خيرتهم
المنجي يلعب بمفتاح السياره : خلاص قاله توا انلكمهم و انرن عليك انقولك ؛ حسيته فرح بجيتنا له كبر بيها
امينه : ان شاء الله خير وربي يكمل علينا
سعاد : ان شاء الله ؛ انس عدا
منجي : اها حطيته ف المحل وانا جاي سيارته قاعده هنا هو ماعداش بيها
منجي صبا
امينه : وين ماشي
منجي : شويا ماشي للمربوعه اندير تليفون
وطلع خش للمربوعه
طلع تليفونه ورن على غاليه
غاليه فتحت الخط : الو
منجي قعمز ع الصالون : وينك انتي تعالي شويا ف المربوعه
غاليه : لالا فكني من امك
المنجي : تي تعالي قتلك
غاليه : فكني وراسي انا
منجي رقاله : به توا انوريك ..
وقعد يضبح : ياصفاء صفاااء
صفاء جاته تجري : نعم
منجي بصوت عالي : كلميلي غاليه
صفاء خشت تجري للدار : تعالي يبيك منجي
غاليه اتأفأف وطلعت : عليك تزليط بصراحه
خطمت على دار المقعد
سعاد : وين ماشيا
غاليه ارتبكت وسكتت
صفاء قعمزت : منجي قالي كلميها
امينه بحتت وسكتت
منجي يضبح مالمربوعه : وين ياصفاء
غاليه طلعت
خشت مالباب وجها مقلوب
منجي ضحك بصوت عالي : ناس ماتجيش الا بالعين الحمره
غاليه بصوت واطي : عاجبك اهو قلبن وجهن هن الاثنين
منجي مدلها يده : ماتبش اتسلمي عليا يعني حتى بعد خطبتك
غاليه ضحكت ومدتله يدها : اهلا كيف حالك ؟
منجي يضحك بصوت عالي : قولي والله !! 😂
غاليه ضحكت : مبردك
منجي كرها من يدها : قعمزي باه نحكي معاك شويا قبل مانطلع
غاليه قعمزت ع الكرسي الي احداه : شن صار في عمو جمال
المنجي : ان شاء الله خير مبدئياً موافق قال نسألو قلناله خود راحتك وانا عارف هايسأل مش هايلقى شي
غاليه ضحكت : عليك ثقه
المنجي بحت فيها : والله جديات هو قال نحنا عندنا في العيله اهم حاجه الشهاده عند الراجل واخلاقه عاليه وصلي خاطي هكي مانبو شي
غاليه هزت راسها بمعنى اها : صح هلي هك كلهم
المنجي باس على يده من قدام ولاوره : خلاص وانا الحمدلله يعني عندي الشهاده وانصلي و اخلاقي عاليه
غاليه قعدت اتكح وتضحك
منجي ضربها على كتفها : شن قصدك بالضحكه هذي كنهن اخلاقي
غاليه مسكت مكان الضربته وتضحك : والله ماقصدي جت صدفه الكحه
منجي كشر وجه : تي والله عارفك انا
غاليه اتحك في كتفها : وجعتني يامانو يدك ثقيله
منجي قرب منها
غاليه برمت بحتت في الباب وفنصت فيه : كنك انت بطل
منجي فنص فيها
ويحكيلها بصوت واطي : اسسس وين الضربه
غاليه حطت يدها على كتفها : هنا
منجي حول يدها وباسها على كتفها : عدي ياأحّا ياشينا
غاليه تضحك : شن اتشوف فيا بنيه صغيره ؟
منجي صبا يسقم في سير السروال : مهما كبرتي هاتقعدي بنيتي الصغيره
وطبس باسها على راسها : ماتبي شي حبيبي ؟
غاليه صبت وراه : سلامتك
منجي : مش ناقصك شي وراس عيوني عارفك ماتحبش تطلبي انا
غاليه : هو انت منقص عليا حاجه اصلا
منجي : باهي تعالي وصليني للباب نبي نعطيك حاجه مالسياره
غاليه صبت وراه : شنو الحاجه
منجي فتح الباب وطلع
غاليه تباوعاته : تي قولي شنو
منجي برم فنص فيها : معقوله مطلعه وجك يشوفو فيك الناس
غاليه ضحكت وكرست ورا الباب
المنجي جا وماسك شكاره كبيره : كنك انتي انهبلتي
غاليه ابتسمت : تي باهي لابسه محرمتي عادي
منجي : عندي انا مش عادي
غاليه : شنو ع الحال هضا اتلبسني خمار
منجي ضحك : والله كان تطربي بس انلبسه لكي لكن مانخليكش تلبسيه غصب
غاليه تنهدت : باه الحمدلله معناها مش هانلبسه
منجي ضحك ومدلها شكاره
غاليه خدتها منه : شنو هضا ؟ ..
وفتحتها لقتها كلها شكلاطات : وااجد هضا كله
منجي عض فمه وغمزها : اسمني مانبش ناخد عصاة
غاليه ضحكت : توا انا عصاة
منجي بحت فيها ورفع حاجبه : ناعليا منك هكي بس زيديلي شويا
غاليه تحشمت : سامط ؛ خلاص هيا عدي
منجي ضحك وطلع : سكري الباب
غاليه سكرت الباب : اوكي باي
أنت تقرأ
غاليتي 🤤 ( روايات ليبية )
Romanceللكاتبة : شهرزاد ، كتبت الكاتبة شهرزاد قصة عاشتها صديقتها ، تعتبر من اجمل الروايات الليبية و أشهرهم ، و نهايتها غير متوقعة ابدا
