Pipikit at magbibilang mula isa hanggang tatlo,
Umaasang maibabalik ang dating masayang ako,
Nagbabakasakali na sa pagmulat ay magkaroon pa ng mga pagbabago,
Na hindi tuluyang naglaho ang binuong munting paraiso.
------------------------------------------------------------
Sa isip ay muling binalikan kung gaano ako dati kapuno ng pag-asa
Ngunit sa kung ano ako ngayo'y walang mag-aakala
Kay sarap sanang ibalik ang mga magaganda't pinaka pinapahalagahang alaala
Ngunit ang saya ng kahapon ay mas masakit lang tuwing nagpagtatantong hindi na ito maibabalik pa.
------------------------------------------------------------
Sa bawat pagpupumiglas ay lalo lang pinanghihinaan
Paanong sisigaw, kung sa una pa lang ay agad nang hinuhusgahan
Kahit anong paliwanag ay hindi rin naman paniniwalaan
Hanggang sa dulo, ako pa rin naman ang may kasalanan.
------------------------------------------------------------
Nakakarindi na pakinggan ang mga mala-demonyong pagtawa,
Nakakapagod na magpanggap na masaya sa harap ng iba,
Pagod na akong masaktan sa sarili kong mga espada
Nakakasawa na gawin ang susunod na hininga.
------------------------------------------------------------
Ayoko na, ayoko nang marinig ang bawat panghuhusga
Ayoko nang makita sa salamin ang mga pagkakaiba
Ayoko na, ang tanging hangad ko lang ay magtapos na,
Magtapos na ang ilang taong pagdurusa.
------------------------------------------------------------
Sa nagdaang araw ay sinubukan pa ring lumaban
Ginawa ang lahat at pinilit na ang mundo'y maunawaan
Pinilit maglakad kahit matinik pa ang daan
Hinanap ang liwanag sa napakadilim na kalangitan.
------------------------------------------------------------
Sinubukan ko naman kalimutan ang bangungot ng nakaraan
Ngunit sadyang mahirap tumakas kung nangyayari pa rin sa kasalukuyan
Wala nang sapat na lakas upang ipanalo ang laban
Pahinga ang hanap, ngunit pangmatagalan.
------------------------------------------------------------
Sa paglipas ng oras
Sa pagtakas sa sariling mga rehas
Sa bawat pagtangkang tanggalin sa kamay ang mga posas
Sa bawat hiling ko na sana ay may maganda nang bukas.
------------------------------------------------------------
Bakit tila gusto ko na tanggapin ang aking kapalaran
Isampal sa sarili ang mapait na katotohanan
Na kahit anong gawin ay hinding-hindi ko na makakamtan ang kalayaan
Pananahimik ang sagot upang magwakas na ang sinimulan.
------------------------------------------------------------
Kaya't sa huling pagsulat ko
Tulang ito'y iniiwan ko
At sa muling pagbilang ko
Sana'y ibalik ang dating paraiso
Isa, dalawa, tatlo...
Enit-sircH
