رشفة عشق
لـلـكـاتـبـه الــعـبـاديــه
البارت_14_
.........
"أريـدُ أن أحيـا في مـكـانٍ
حـيـث لايكـون الحب فيه مجازا للضـعف
ولاالـصـمـتُ مجـازاً لـلـخـوف ..
مـكانـاً حـيـثُ إن استـمريـت بالـضحك طـوال اليـوم لـن تـحـتسـب بـأنـك مَـجـنـون
وإن أردت حَـقـاً أن تسـاعـد أحـدهـم
فَـلـن تـنتـظـر مـقـابـل ..!!
مكـانـاً حيـثُ لاتوجــد أحاديـث صغيـره
وحَـيثُ النـاس يهـتمــون بســخـاء،
وحَـيـثُ نكـون أنـا وأنـت بـالـقـرب معـاً....."
............🍁............
إيڤان
كملنا ريوگ ووگفت أغسل بالمواعين ،،مندمجه أغسل ومطلعه إغنيه وادندن وياهه بيه طبع إذا أسمع لطميه او اغنيه واشتغل مااحس بالشغل لان تركيزي ويه الاغنيه يصير بحيث عندي استعداد اجلف حتى السگف من دون تعب وبدون ماادري بنفسي ...
حسيت بشخص وراي بسرعه إلتفتت لكيت صفاء وأگف طابگ رجله ومتكيهه ع الباب ومبتسم صافن بيه .. عطت بيه لان خوفني
- إنتَ ماتعرف تحچي تحمحم مو خلستني
- هوَ آني أريد أخلسچ !!
- يـــاااا ..!!
صدگ عود
ضحك بصوت عالي
- ههههـه شبيچ أريد أصفن بيچ شويه
حاولت أخفي إبتسامتي الخجوله وسويت نفسي عصبيه
- أشو إنتَ صاير جريء ..!
غمزلي وحرك حواجبه بسرعه
- آني من زمان جريء مو من هسه ..!
- يـــاا (خزرته بحذر) صصصصففففاااااءءءء
- ههههـه آسفين عمي آسفين
إنداريت أكمل شغلي وهوى لگف موبايلي طلع إغنية [ أخذ الحلـوه لكاظم السـاهر ] وگال هاي عليچ .. آني إبتسمت وگتله بثقه
- أدري بنفسي حلوه ميحتاج
تقرب أخذ خدودي بين إيديه وگرصهن وضل يگرص بيهن ويهز براسي مثل الطفل ويصيح ( خب فدووه) ضليت صافنه ومصدومه بوجهه وخازرته .. من شاف نظراتي عدم قبول لتصرفه ضحك بصوت عالي ورجع خطوتين للخلف وصاح بضحكه
- إفلت
بقيت متصنمه بمكاني !! هـٰذا شسوه؟ صحيح ميانه وشقى بس ميلمسني بوجهي أبدد حتى بشقانه الوجه ممنوع وهوَ خصوصاً ميلمسني ابد ولايضربني بس اني وعباس ملافخ ..!!
بقيت صافنه وهوَ يضحك .. عبست وجهي وعگدت حواجبي بعصبيه
- صفاء شنو هـٰذا التصرف ..؟
استغرب وإختفت الضحكه من ملامحه
- شـنو؟
گتله بنتر
- ع الاسساس متعرف شـنو؟
من شافني جديه إنرسمت إبتسامه يائسه على شفته وگال
- شبيچ داتشاقى ..
زجرته بعصبيه
- هـٰذا مو شقى هـٰذا إسمه طياح حظ وبعد مااسمحلك تعيدهه ومنين جبت الجرأه وهيج تسوي ..؟
