كانت روان في دار مع يماها و سناء ...يماها في فراش ليوم خرجوها من سبيطار هبطلها سكر من خلعة تاع راجلها ....لي كان حكموه ديجا لابوليس هو و سي حكيم ....
روان كي شافت يماها رقدت شرت لختها براسها باه تخرج و مايديرونجوهاش ....
روان غير خرجت رفدت تيليفون تعيط لسفيان لي كان يدير بوسيبل تاعوا باه يلحق لباباه في حبس ...دار على كامل صحاب باباه لقدم و معارفوا هو الحمد لله لي وقفوا معاه
روان:" ألوا سفيان ..كاش خبر ؟
سفيان :" مزال مابان والوا رانا نستناو محامي راه يخدم خدمتوا و منعرف !!........و يماك كيفاش راهي؟
روان :" مقلقة على بابا بصح حمد لله خير من لي كانت ...
سفيان :" الحمد لله...انتي وقفي معاها و ماتقلقيش روحك ندير محال باه نخرجهم ...
روان :" ان شاء الله سفيان ان شاء الله...
سفيان :" دوك كوبي كاش خبر راني نعيطلك نتي لولى اوكي..
روان :" اوكي سلام
كوبات معاه و قعدت في صالون تخزر في يديها لي شدت بيهم إيهاب ...
روان :" هو ...مانيش نتخايل كي عادة ياك ؟
سناء :" شكون هوا ؟
قفزت روان و شافت في ختها لي نسات جدها كامل ...
روان :" خلعتيني ...(سكتت شوية) راكي مليحة ؟
سناء :" تحرشي واش من مليحة بابا في حبس يما كانت في سبيطار واش بقى يزيد يصراا ..
جات تريبوندي صونات الباب شافت في ختها و استغربت نااضوا يجروا و كلهم أمل بلي سي خير الدين جا ...
حلت روان قلبها يخبط متمنية باباها حتى لقات زوج رجال و معاهم شوية لابوليس. ..
نطق سيد :" هنا دار خير الدين****
شافت فيه روان و شرت براسها اييه ...
سيد عطاها ورقة و كمل يهدر :" مدام ...معانا أمر بإخلاء منزل على 48 سا ..سواء كنتوا متعاونين والا لالا نضطروا نستعملوا قوة ...
لاح كلاموا لروان و حط ورقة بين يديها ...
روان اونفان تشجعت :" علاه علاه خرج قرار كيما هاكا و بلخف هاكا ؟؟
سيد :" أوامر نيابة العامة مدام! و نتمناو تسهلونا خدمتنا ..
روان بلعياط :" و وين راح نروحوا مثلا وين ؟؟
سيد هبط راسوا :" مدام من فضلك حنا رانا نديروا في خدمتنا ....
راحوا و خلاو روان و ختها في الباب مشوكيين ...
سناء :"راح ...راح يحوزونا من دارنا ...
غمضت روان عينيها
سناء بدات تبكي :" دوك تسمع ماما واش راح يصرا فيها ....
روان :" ماراح يصرالهاااا ... والوا ..
دخلت لدار عيطت لسفيان ديركت و حكاتلوا واش صرا ...
سفيان :" ماتقلقيش ...حتى دار بابا حجزوا عليها ...طونوبيل و كلش على إسموا ....أرفدوا واش تسحقوا من دار نجوز نخرجكم من لتم ....
أنت تقرأ
HE Is My Boy Friend
Romance🇩🇿كرونيك بلهجة الجزائرية 🇩🇿 قصة حب باينة ♪ \\(^ω^\\ ) للبطلة روان و حكايتها مع أعز صديق لها، راح تطور الاحداث و تتغير حياتها، و تجمعها بحب حياتها في دار وحدة. الرواية ذات طابع رومنسي ♡♡
