تقدم خطوتين على الواگفين
ـ ست نرجس گولي يا رب و نزلي السچية
هزيت راسي و جحظت عيوني لان من ورة الدموع مدا اشوف شي ـ اي هو اني اريد اروح لربي و اريحهم مني
امي شهگت ـ ليش يوم و اني شعندي غيرچ و الله اموت بلياچ
تقدم خطوة ثالثة و تعابير وجهه عادية و لا كأنه مرعوب من الموقف كأنما الي ديصير
نقاش عادي ـ لعلمچ الله ميجتمع وية المنتحرين و لا يباوع بوجههم
ابوية عاط بي ـ شو اسكت انت بس اريد اعرف يا زمال خلاك دكتور نفسي هيج تهديها
مرد على ابوية و تقدم شوية قربت السچينة كلش من رگبتي حتى يوگف موگف و كمل كلامه
ـ سمعنا فتىً يذكرهم يقال له ابراهيم
و الآية الثانية إن ابراهيم كان أمة
الي يحب رب العالمين يسوة كل الناس الي حواليه بالنسبة لرب العالمين النبي إبراهيم چان مجرد فتى عند الناس بس يم رب العالمين چان أُمة كاملة
مد چفة ـ خلي عندچ ايمان و انطيني السچينة نرجس
ضليت اباوع بينه و بين بابا سجاد صاح ـ لك شنو من بشر هذا اخذها منها غصباً عنها
راد سجاد يتقرب صكيت سنوني و قربتها كلش بحيث جرحت ركبتي التفت الدكتور ليث و صاح بي
ـ لحد يتدخل اني اعرف شغلي
و رجع التفتلي ـ الامراض النفسية اصعب بهواية من الامراض الجسدية لان صعبة الملاحظة و العلاج مالها المريض يصنعه بمساعدة ملاحظات الطبيب
رفع اصبعه و اشر على اهلي ـ مو هم الي جابولچ المرض مو هم الي غفلو عنچ لمن وصلوچ لهالحالة
رفع ايدة و اشر على سجاد ـ منو هذا مو هو نفسة الي چنتي تبچين ايام يم امچ بسبب اهله بالله انهاريتي علمود ذولة؟؟؟ تكتلين نفسچ و تروحين لأسفل السافلين و انتي عندچ رب اذا تعرفينه و تمشين بأوامره يطوع الكون كله إلچ
سجاد صاح بي ـ احترم نفسك حسابك بعدين
باوعلي سجاد و جر حسرة تقرب خطوة
و گال ـ نرجس عوفي السچينة و خل نحچي براحتنا و الي ترديه يصير وعد بس عوفيها
من گالها الفرحة موسعتني بسرعة نزلتها عن رگبتي محسيت الا الدكتور صار بيني و بينه و دفعه عني
ـ گتلك لتدخل انت بمعاملتك هاي تكتلها
التفت علية ـ لچ بابا اصحي علمود شخص تردين تكتلين نفسچ شخص ما عنده ثقة بحبچ الواضح چنتي راح تنزلين السچينه علمود حچايتين گالها بس ماعنده ثقة بيچ و راد ياخذها منچ غصب انتي عندچ مرض ثنائي القطب هو الي يسويلچ هالانفعالات بدال متشتغلين على نفسچ و تعالجين نفسچ ضالة تركضين ورة شخص ميسوة ثقتچ
مد چفة ـ انطينياها اني عندي كل الثقة بيچ و بإيمانچ و قوتچ مو انتي الي تسلمين نفسچ للشيطان و تستسلمين لواقع يتحكم بي كم شخص ميحبوچ ذرة بگد حب الي خلقچ و رباچ طول 24 سنة اذا متي منتحرة مو بس خسرانة دنيا راح تخسرين حتى الي رباچ و حبچ هالحب هو الي چان من تنامين و دموعچ يجرن ينزل النعاس عليچ و يمسح دموعچ و ينسيچ همچ الصبح من چانت الناس تكره هوسچ و نرجسيتچ هو چان يدفعچ تتبرعين حتى يخفف من اعمالچ السيئة
حسيت كلماته نظفت و طلعت كل فكرة سيئة توصلني للانتحار شمرت السچينة و گعدت بالگاع اجتي امي حضنتني خلت راسي على صدرها و هي تبچي و صراخها ملة البيت
ـ الله ليوفقك سجاد ولك دعوة ام محروگ گلبها الله لينطيك
عمامي صاحو بأبوية يسكتها التفتت عليهم
ـ بيكم خير انتو احچو و سكتوني مو تگلولة هو يسكتني بس تعرفونه مبي خير و كل.....
قاطعها
ـ دكتورة حالتها صعبة لتزودين عليها دخليها ترتاح و بعدين تناقشو
هزت راسها ـ معروفك هذا ليث بحياتي ما انساه
بعدت راسي عن صدرها دا احضر نفسي اگوم وياها ابوية جر الدكتور من ايدة
ـ ترة اعرفك اني و اعرف ابوك... بس خل تدخل نرجس لجوة و نتفاهم
