#رواية_الأيام_ماترحمش
#بقلم_مسرة_أسامة
تحت عنوان
#ضحايا_جرم
قراءة ممتعة 🌹
#الحلقة_الثالثة_والاخيرة
و بدت تقرا في الإيميلات قريب ثلث ساعة لين طاحت في إيميل صدمها و خلاها تشد راسها بين ايديها و تبكي في حالة تانية
رسايل تهديد لفاطمة بالقتل بخصوص القضية اللي ماقدرتش تكسبها
باعتيلها صور صغارها و هما مروحين من المدارس و صور هبة واقفة في الجامعة و يبتزو فيها بيهم ان يخطفوهم و يعذبوهم
و فاطمة كانت تقرا في الرسايل بس مش رادة عليهم
خشت هاجر على الايميل ماعرفتش من يكون .. سكرت اللاب توب بسرعة و طلعت
مشت للحمام و فتحت امية الدوش خشت تحتها بحوايجها تبكي و تايهة في افكارها
___________________________
طلعو مصطفى و هبة من سوق المشير بايعين الذهب بمبلغ كويس جمعوه مع باقي الفلوس و بدلوهم بدولارات
روحت هبة الحوش حطت الفلوس و خدت شنطة هديل و الجوازات و طلعت مع مصطفى تاني
خطمو في طريقهم على مكتب سفر بس ماحصلوش حجز قريب و الإسعاف الطائر يبي واسطات
ركبت هبة للسيارة تبكي : كيف بندير توا يا مصطفى لازم نسافر بيها في اقرب وقت
مصطفى فاتح تليفونه : خليني ندير اتصالاتي و ان شاء الله خير
و طلع بالسيارة ..
بعد شوية وصلو المستشفى و ركبو لحجرة هديل لقوها مقعمزة تتفرج ع التلفزيون ، خشمها ملفوف بالفاشّه على خاطر النزيف و ف ايدها شكارة تغذية و عيشة تصلي في العصر
مصطفى قرب من هديل و ابتسملها : شنو حالها بطوطتي ؟
هديل : وينكم لتوا عطلتو عليا
جتها هبة و حضنتها : سامحيني ياعمري عطلت عليك مشيت جبتلك حوايجك و جيت بس
هديل تشوفلها ببراءة : علاش اني هني ؟ نبي نروح لحوشنا
هبة تشوفلها حابسة دمعتها و قلبها محروق : انتي تعبانة شوية لازم تقعدي هني الليلة و غدوا ان شاء الله نروح بيك
هديل اضايقت : لالا اني مانقدرش نرقد في سرير غير سريري مش متحملاته
هبة مسحت على شعرها : لو قعدتي و سمعتي الكلام نسافرو اني وياك
هديل فرحت و ضحكت من عيونها : بجديات نسافرو ؟!'
هبة دمعتها نزلت : ايه نسافرو .. نمشو لعمي ميلاد في الاردن شن رايك ؟
هديل فرحانة : ياريت قداش خاطري نشوفه اني .. خلاص نقعد حتى اسبوع المهم بعده نسافرو
هبة قعمزت جنبها و حضنتها تبكي بحرقة ( يارب قويني و صبرني .. يارب يسر امورنا ولا تعسر يارب )
سلمت عيشة من الصلاة و قربت منهم : شن صار معاكم ؟
مصطفى جاه تليفون طلع يرد برا
و هبة بدت تحكي لعيشة بالألغاز قدام هديل و شوية هديل غفت و خش عليهم مصطفى
عيشة شبحتله : في حويجة يمي ؟
مصطفى : حصلتلها اسعاف طائر و الموعد غدوا العشية
هبة ردت فيها الروح و وقفت : الحمد لله يارب الحمد لله
مصطفى : توا انتي لازم تروحي لخوتك و تجهزي حاجاتكم
عيشة : منو ماشي منكم ؟
هبة شبحتلها : بناخد معاي محمد مانقدرش نسافر بروحي و هاجر قلتلها لازم تقعد لان مرات نستحق شي من هني ع الأقل يكون فينا حد في الحوش
مصطفى : كيف بتخلي اختك بروحها بعقلك يا هبة ؟! امبكري مابيتش نعلق نحسابك قلتيها هكي و خلاص
هبة : والله رسمي ماقعد فيا عقل لكن ضروري حد يقعد مننا
عيشة : بري توكلي و شوفي روحك و اني توا نقعد مع هديل و بالنسبة لهاجر تقعد عندي لين تروحو بخير و سلامة
