بقيت فالكاشة وجسمي كيحرق .. ومقاداش نتحرك ومكليت والو .. مشاعر دالصدمة والقهرة والخوف والترقب .. مجموعة فيا.. فهاد اللحظة.. بقات ختي مقابلاني وانا بالي مراهش معاها.. نعسو كلشي.. حتى انا ماشي نعست نقدر نقول فقدت الوعي.. احساس غريب بزاف.. صبح الصباح .. فيقاتني ختي باش نمشي الخدمة.. ولكن حسيت ضلوعي مقاداش نحركهم.. ومقدرتش حتى نبزز على راسي اني نوض.. بقيت فبلاصتي.. ومبغيتش نوض.. او بالاحرى مقدرتش نوض.. جلست ومنضتش .. مفكرتش اني بدون مبرر غادي يقدر يجريو عليا من الخدمة.. ولكن اش كنقول.. مول الشركة وخدا مني بزاف.. غانمشي عندو وهو يتصرف.. كما تصرف فالغياب دالبارح.. اش هادشي كناقشو.. واش اكرام مازال عندك الامل فالدنيا.. ولكن لا.. الى فقدت كلشي.. مغايبقاش قدامي حل من غير اني نمشي نقتل راسي .. واش نسيتي اكرام.. نسيتي باللي مازال عليك 3 دالمليون دين.. وخاصك تمشي لخدمتك باش تخلصيها.. هو بداكشي دالبارح ردليك غا مليون.. اللعنة على ايام كيتباع بيها الشرف بمليون .. نضت وانا مقادراش.. بحال شي وحدة فيها سكرات الموت.. دخلت للدوش .. بديت نغسل جسمي من الخنز اللي قاسو.. حاسة نفسي محاملاش جسمي .. دوشت بزز وخرجت شفت فالمرايا ..بقيت كنشوف وجهي صفر بزاف .. وعينيا منفوخين.. قصت فوجهي وحطيت يدي على فمي وبديت نبكي بحرقة وفصمت.. مبقيتش نسول علاش.. مبقيتش.. خوف حتى من البكا ومن الانهيار.. كنخاف نبكي على هادشي لا تصدق الدنيا ضارباني .. اكتر من هادشي.. لبست حوايجي بتثاقل كبير.. حيت كل بلاصة فجسمي كتحرق.. بسبب خويا وزاد كمل عليا داك الحيوان.. اش غاندير باش ننسى هادشي .. ونبدا من جديد.. لبست وخرجت لقيت امي كتسب النهار اللي تزادينا فيه حيت منفعناها بوالو.. عندك الحق امي عندك الحق.. انا لعنة تزادت.. منفعت راسي.. كيفاش حتى نفعك نتي.. حنيت راسي وخرجت.. كانت الساعة 11:30 .. والبوز ديال الغدا قريب.. عولت اني نمشي لعند داك الحيوان في حالة الى دارلي احمد شي بلان ولا .. بقيت كنتمشى بزز.. ورجليا تقال عليا بزاف.. حتى بانتلي ام جلال جاية ومثقلة بالسخرة ديال السوق.. حسيت بغصة فقلبي وتنحيت باش منتلاقاش معاها.. بحال هادو تشمتو حيت جلال تخلى عليا.. شنو غايديرو الى عرفو اش وقعلي .. كملت طريقي للخدمة حتى وصلت والنفس مقطوع عليا.. وليت كنحس اني كنفشل من ابسط مجهود.. دخلت لقيتهم غايخرجو الغدا دخلت ومشيت جلست فبلاصتي وكلشي بقا كيشوف فيا.. والنفس كيطلعلي بزز حيت عييت بالطريق.. حتى سمعت احمد مورايا.. احمد: على سلامة الالة اكرام. كون بقيتي شوية كتر لاش معدبة راسك اكرام: 😓 مريضة وجيت بزز.. وزايدون خديت اذن من السي ايهاب البارح( الله يلكيها ليكم بجوج) احمد: الالة انا اللي هنا الرئيس المباشر ديالك.. تعلميني انا اللول.. وديك الساعة نشوف اكرام: اووف مناقصنيش نتا فهاد النهار.. عطيني بالتيساع .. احمد: غالطة وزايدة بالفهامات.. خرجي برا .. انا غانعرف شغلي معاك.. جيت نوض حيت مافيا اللي يتناكر معاه .. وانا نسمع صوت.. كيعيط لاحمد .. كولشي التفت عندو .. هاد الصوت ديجا سمعتو وعرفتو.. تقلبت .. شفتو هو كان حاط يديه فجيابو.. اقترب منا وحنا ليه احمد الراس احتراما.. ايهاب: اش واقع هنا.. احمد: هاد البنت اسيدي صحابليها المعمل ديال باها.. عاد جاية دابا وغيبات بدون مبرر.. ايهاب: حتا نتا المعمل ماشي دباك باش تقوليها خرجي.. اكرام خدات مني الاذن.. وعندها يوماين ماشي غا نص نهار.. مشايفهاش كيباين فوجهها المرض.. شاف فيا وكمل كلامو.. ايهاب: سيري رتاحي.. حتى تبراي اجي تخدمي ديك الساعة.. حنيت راسي محملتش نشوف فيه.. كمل كلامو ومشا.. كلشي بقا مصدوم من هادشي اللي وقع .. حيت السي ايهاب .. عمرو منزل من قيمتو ونزل عندنا للمعمل.. ولا دافع على شي حد.. وحيت هو ممسوقش مرضي ولا موتي..خديت حوايجي ولقيتها مزية ومشيت بحالي.. مع الخرجة ديال الباب حسيت الدنيا كتتهز من قدام عيني ومبقيتش كنشوف.. ديك الساعة غيبت ومبقيت عاقلة على والو..
